ត្រឹមតែមួយសប្តាហ៍ លោក សម រង្ស៊ី ពីប្រទេសបារាំងបន្តបន្តុះបង្អាប់ និងវាយប្រហារឯកឧត្តម ហ៊ុន ម៉ាណែត ចំនួន៣ថ្ងៃផ្ទួនៗគ្នា គឺថ្ងៃទី០១ ទី០៣ និងទី០៤ ខែសីហា ឆ្នាំ២០២២ កន្លងមកថ្មីៗនេះ ពាក់ព័ន្ធសមត្ថភាព និងគុណភាពសញ្ញាបត្រពីសាលាយោធាអាមេរិក West Pont ។ ស្រាប់តែនៅថ្ងៃសុក្រ ទី០៥ ខែសីហា ម្សិលមិញ លោក សម រង្ស៊ី បែរជាផ្ញើសារជូនពរសម្តេច ហ៊ុន សែន ទៅវិញ ដែលសារជូនពរនេះមានត្រឹមតែមួយឃ្លាចាប់ផ្តើមប៉ុណ្ណោះ។ ក្រៅពីនោះ សំណេររបស់លោក សម រង្ស៊ី បង្កប់ខ្លឹមសារនយោបាយដ៏ពិសពុល និងវែងអន្លាយ។
* វ៉ៃក្បាលបញ្ចុកចេក
ការវាយប្រហារធ្ងន់ៗទៅលើឥស្សរភាពបុគ្គលរបស់ឯកឧត្តម ហ៊ុន ម៉ាណែត ត្រូវជាបុត្របង្កើតរបស់សម្តេច ហ៊ុន សែន ដោយគ្រាន់តែប្រើអារម្មណ៍ច្រណែនស្អប់ និងគ្មានហេតុផលសមរម្យពីលោក សម រង្ស៊ី គឺជាការប្រមាថ។ រីឯសារជូនពរចំពោះសម្តេច ហ៊ុន សែន គឺជាការលេងល្បែងបញ្ចុកចេកតាមបែបក្មេងពាល។
* អញក៏អត់ ឯងក៏អត់
បច្ចុប្បន្ន លោក សម រង្ស៊ី ក្នុងវ័យ៧៣ឆ្នាំ ជាពិសេសលោក សម រង្ស៊ី អស់សង្ឃឹមនឹងមានវាសនាវិលត្រឡប់មកធ្វើនយោបាយនៅក្នុងប្រទេសកម្ពុជាវិញ ហេតុដូច្នេះហើយ ទើបលោក សម រង្ស៊ី ស្នើសុំសម្តេច ហ៊ុន សែន បង្កើតច្បាប់កំណត់អាយុមន្ត្រីរាជការក្នុងមុខងារសាធារណៈ រួមទាំងការងារនយោបាយត្រូវចូលនិវត្តន៍ចាប់ពីអាយុ៧០ឆ្នាំឡើង។ សំណើរបែបនេះត្រូវបានចាត់ទុកថា ជាសំណើររោគចិត្ត។ រោគចិត្ត ត្បិតនៅលើពិភពលោកយើងនេះ គឺទាំងប្រព័ន្ធប្រជាធិបតេយ្យសេរី និងកុម្មុយនិស្ត ពុំមានច្បាប់ណាមួយត្រូវកំណត់ចូលនិវត្តន៍នយោបាយអាយុលើសពី៧០ឆ្នាំ ដែលលើកលែងតែក្នុងករណីស្ម័គ្រចិត្ត។ នេះជាល្បិចអញក៏អត់ ឯងក៏អត់នៅពីក្រោយខ្នងរបស់លោក សម រង្ស៊ី ។ ការពិតលោក សម រង្ស៊ី ចង់រារាំង និងបិទខ្ទប់សម្តេច ហ៊ុន សែន ព្រមទាំងឥស្សរជននយោបាយជើងចាស់ដទៃទៀតរបស់គណបក្សប្រជាជនកម្ពុជាតែប៉ុណ្ណោះ។
* វប្បធម៌សន្ទនា និងសញ្ញាវិជ្ជមាន
ខុសប្លែកពីអ្នកវិភាគឯករាជ្យ និងអ្នកវិភាគក្នុងប្រព័ន្ធផ្សព្វផ្សាយមួយចំនួនយល់ថា សារជូនពររបស់លោក សម រង្ស៊ី ចំពោះសម្តេចហ៊ុន សែន គឺជាសញ្ញាវិជ្ជមាន និងយល់ថា លោក សម រង្ស៊ី ចង់ងាកមករកវប្បធម៌សន្ទនាអាចជាការសម្លឹងសំបកក្រៅ។ ផ្ទុយមកវិញ សារជូនពរនេះមានចេតនាដាក់បន្ទុក និងអម្រែកលើស្មាសម្តេច ហ៊ុន សែន ។ ម្យ៉ាងទៀត យើងគួរពិនិត្យមើលជីពចរ និងដង្ហើមនយោបាយរបស់លោក សម រង្ស៊ី ទើបជាការប្រសើរ។
* បន្ថយមិត្ត បន្ថែមសត្រូវ
មានតែលោក សម រង្ស៊ី ខ្លួនឯងម្នាក់គត់ដែលដឹងថា គាត់ត្រូវត្រដរខ្យល់នយោបាយដោយបែបណា និងដល់ពេលណា។ ដោយហេតុថា លោក សម រង្ស៊ី មានកំហុសធ្ងន់ធ្ងរ ដែលបានជាន់ឈ្លីវប្បធម៌សន្ទនារវាងសម្តេច ហ៊ុន សែន ជាមួយរូបគាត់ផ្ទាល់។ ក្រៅពីសម្តេច ហ៊ុន សែន ដែលលោក សម រង្ស៊ី ចាត់ទុកជាសត្រូវសុីសាច់ហុតឈាមតាមរយៈពាក្យសម្តី “មានសុីអត់សែន មានសែនអត់សុី” គឺលោក សម រង្ស៊ី បន្តចាត់ទុកឯកឧត្តម ហ៊ុន ម៉ាណែត ជាសត្រូវបន្ទាប់ពីសម្តេច ហ៊ុន សែន តាមរយៈការនិន្ទាឈ្នានីស វាយប្រហារមិនឈប់ឈរ និងជាចុងក្រោយលោក សម រង្ស៊ី ចាត់ទុកលោក កឹម សុខា ជាសត្រូវប្រជែងមុខមាត់នយោបាយស្លាប់រស់របស់គាត់។
សរុបសេចក្តីមក ដោយសារការបន្ថយមិត្ត បន្ថែមសត្រូវនេះហើយ ទើបលោក សម រង្ស៊ី ក្លាយជាជនអនាថានយោបាយ រហូតរសាត់អណ្តែតខ្ចាត់ព្រាត់គ្មានគោលដៅច្បាស់លាស់សម្រាប់ជីវិតចុងក្រោយ។ ប្រសិនបើលោក សម រង្ស៊ី ដើរតាមគន្លងល្ងង់នយោបាយចាស់គំរិលបែបនេះបន្តទៀត នោះលោក សម រង្ស៊ី នឹងជីកផ្នូរកប់សពនយោបាយដោយខ្លួនឯង និងជាទីបញ្ចប់លោក សម រង្ស៊ី នឹងទទួលមរតកឆ្កួតតពូជពីត្រកូល “សម” ជាក់ជាពុំខាន៕
លោកស្ទីវិន សាន់,អគ្គនាយករងអង្អភាពHNA
