សូហ្វៀ៖ ឯកឧត្តម ជា ចន្ទបរិបូរណ៍ ឯកអគ្គរាជទូតនៃព្រះរាជាណាចក្រកម្ពុជា ប្រចាំនៅប្រទេសប៊ុលហ្គារី បានចូលរួមក្នុងសន្និសីទសារព័ត៌មានស្តីពីព្រឹត្តិការណ៍ «Asian Festival 2026» ដែលរៀបចំឡើងនៅទីស្នាក់ការទីភ្នាក់ងារសារព័ត៌មានប៊ុលហ្គារី (BTA) ក្នុងរដ្ឋធានីសូហ្វៀ។ ព្រឹត្តិការណ៍វប្បធម៌ដ៏មានអត្ថន័យនេះ ត្រូវបានផ្តួចផ្តើមរៀបចំឡើងដោយស្ថានទូតឥណ្ឌូនេស៊ី ដោយមានការចូលរួមពីបណ្តាប្រទេសអាស៊ីជាលើកទី៦។
ឯកឧត្តមឯកអគ្គរាជទូត បានគូសបញ្ជាក់ថា នេះគឺជាលើកទី២ហើយ ដែលកម្ពុជាបានចូលរួមក្នុងព្រឹត្តិការណ៍ដ៏ធំនេះ ក្រោមការដឹកនាំរបស់លោក។ សម្រាប់កម្ពុជា ការចូលរួមនេះគឺជាឱកាសដ៏មានតម្លៃបំផុតក្នុងការបង្ហាញជូនសាធារណជនប៊ុលហ្គារី និងមិត្តភក្តិអន្តរជាតិ អំពីភាពសម្បូរបែបនៃវប្បធម៌ អរិយធម៌ ប្រពៃណី សិល្បៈ និងសក្តានុពលទេសចរណ៍ដ៏ទាក់ទាញរបស់កម្ពុជា។
នៅក្នុងព្រឹត្តិការណ៍ឆ្នាំនេះ ស្តង់របស់កម្ពុជានឹងរៀបចំបង្ហាញជូនភ្ញៀវចូលរួមនូវបទពិសោធន៍ដ៏ពិសេសមួយចំនួនរួមមានៈ ផលិតផលវប្បធម៌ និងឯកសារផ្សព្វផ្សាយអំពីប្រវត្តិសាស្ត្រ និងសក្តានុពលជាតិ ភ្ញៀវនឹងមានឱកាសភ្លក់រសជាតិបង្អែមខ្មែរ កាហ្វេ និងតែខ្មែរដែលមានរសជាតិប្លែក។
ការបង្ហាញជូននូវ «ក្រមាខ្មែរ» ដែលជាសិប្បកម្មតម្បាញដោយដៃ និងជានិមិត្តរូបនៃអត្តសញ្ញាណជាតិខ្មែរ។
អ្វីដែលកាន់តែពិសេសទៅទៀតនោះគឺគំនិតផ្តួចផ្តើមដ៏ប្រពៃក្នុងការបរិច្ចាគថវិកាដែលទទួលបានពីការលក់ផលិតផលទាំងអស់ជូនដល់មូលនិធិគាំទ្រកុមារដែលកំពុងប្រឈមនឹងជំងឺមហារីក។ នេះគឺជាការឆ្លុះបញ្ចាំងពីស្មារតីមនុស្សធម៌ និងក្តីស្រឡាញ់ដ៏ជ្រាលជ្រៅរបស់ប្រជាជនកម្ពុជា ដែលមិនត្រឹមតែមកផ្សព្វផ្សាយពីវប្បធម៌ប៉ុណ្ណោះទេ ប៉ុន្តែថែមទាំងមកដើម្បីចែករំលែកក្តីសង្ឃឹមផងដែរ។
ឯកឧត្តម ជា ចន្ទបរិបូរណ៍ បានសង្កត់ធ្ងន់ថា៖ «ការចូលរួមរបស់កម្ពុជាក្នុងព្រឹត្តិការណ៍នេះ គឺដើម្បីពង្រឹងចំណងមិត្តភាព សាមគ្គីភាព និងការយោគយល់គ្នាទៅវិញទៅមករវាងប្រជាជននៃបណ្តាប្រទេសអាស៊ី និងសហគមន៍អន្តរជាតិ។ យើងជឿជាក់ថា ការផ្លាស់ប្តូរវប្បធម៌ និងកិច្ចសហប្រតិបត្តិការបែបនេះ នឹងរួមចំណែកដល់សន្តិភាព និងការអភិវឌ្ឍប្រកបដោយចីរភាពសម្រាប់យើងទាំងអស់គ្នា»។
ឯកឧត្តម ក៏បានថ្លែងអំណរគុណយ៉ាងជ្រាលជ្រៅដល់ស្ថានទូតឥណ្ឌូនេស៊ី និងភាគីពាក់ព័ន្ធទាំងអស់ ដែលបានខិតខំរៀបចំកម្មវិធីដ៏អស្ចារ្យនេះឡើង ដើម្បីភាពជោគជ័យនៃ «Asian Festival 2026»៕
