រដ្ឋមន្រ្តីហិរញ្ញវត្ថុអ៉ីស្រាអែល នឹងត្រូវហាមមិនឱ្យចូលក្នុងប្រទេសបារាំង ជុំវិញអំពើហិង្សាប្រឆាំងប៉ាឡេស្ទីន

ប៉ារីស៖ បើយោងតាមការចេញផ្សាយដោយទីភ្នាក់ងារសារព័ត៌មាន AFP រដ្ឋមន្រ្តីហិរញ្ញវត្ថុអ៉ីស្រាអែល លោក Bezalel Smotrich នឹងត្រូវហាមប្រាមពីការចូលក្នុងប្រទេសបារាំង ដោយបើតាមសេចក្តីប្រកាសរបស់បារាំង ថ្ងៃអង្គារ ទី៩ ខែមិថុនា ឆ្នាំ២០២៦ វាគឺជាផ្នែកមួយនៃការដាក់ទណ្ឌកម្ម ដែលសម្របសម្រួលជាមួយប្រទេសដទៃ ជុំវិញអំពើហិង្សាប្រឆាំងប៉ាឡេស្ទីន។

រដ្ឋមន្រ្តីការបរទេសបារាំង លោក Jean-Noel Barrot និយាយថា លោក Smotrich បានធ្វើសកម្មភាពយ៉ាងសកម្មក្នុងការកាត់បញ្ចូលតំបន់ West Bank ជាទឹកដីអ៉ីស្រាអែល អះអាងដោយបើកចំហរពីការបង្កើតកន្លែងតាំងលំនៅថ្មីក្នុងតំបន់នោះ និងការដាក់អាណានិគមលើតំបន់ហ្កាហ្សាឡើងវិញ ធ្វើឱ្យសេដ្ឋកិច្ចអាជ្ញាធរប៉ាឡេស្ទីនដួលរលំ និងផលវិបាកដ៏គ្រោះថ្នាក់របស់វាសម្រាប់ប្រជាជនប៉ាឡេស្ទីន។

តាមលោក Barrot ទណ្ឌកម្មរបស់បារាំង គឺសម្របសម្រួលជាមួយចក្រភពអង់គ្លេស កាណាដា អូស្ត្រាលី ន័រវែស និងនូវែលសេឡង់ ដោយកំណត់គោលដៅលើអ្នកដែលត្រូវទទួលខុសត្រូវ ចំពោះការកើនឡើងនៃសកម្មភាពតាំងលំនៅថ្មី និងអំពើហិង្សាក្នុងតំបន់ West Bank។

គួរបញ្ជាក់ថា លោក Smotrich គឺជាមន្រ្តីជាន់ខ្ពស់ទីពីរនៃរដ្ឋាភិបាលអ៉ីស្រាអែល ដែលត្រូវបានហាមមិនឱ្យចូលប្រទេសបារាំង ក្នុងរយៈពេលប៉ុន្មានខែថ្មីៗ បន្ទាប់ពីរដ្ឋមន្ត្រីសន្តិសុខជាតិ លោក Itamar Ben Gvir។ អង់គ្លេស អូស្ត្រាលី កាណាដា នូវែលសេឡង់ និងន័រវែស បានដាក់បម្រាមធ្វើដំណើរលើរដ្ឋមន្ត្រីទាំងពីររួចហើយ កាលពីខែមិថុនា ឆ្នាំមុន ពីបទញុះញង់ឱ្យមានអំពើហិង្សាប្រឆាំងនឹងប្រជាជនប៉ាឡេស្ទីន៕