អ្នកនាំពាក្យក្រសួងព័ត៌មាន៖ គ្មានអ្វីដែលត្រូវយកចិត្តទុកដាក់នឹងរបាយការណ៍ ដែលសរសេរដោយលម្អៀងនោះទេ
ភ្នំពេញ៖ ឯកឧត្តម មាស សុភ័ណ្ឌ អ្នកនាំពាក្យក្រសួងព័ត៌មាន បានគូសបញ្ជាក់ថាគ្មានអ្វីដែលត្រូវយកចិត្តទុកដាក់នឹងរបាយការណ៍ ដែលសរសេរដោយលម្អៀងនោះទ។
ជាមួយគ្នានោះ ឯកឧត្តម បានចាត់ទុករបាយការណ៍របស់ UNHCR ដែលបានចេញកាលពីម្សិលមិញថាជារបាយការណ៍លម្អៀងហើយធ្វើការវាយតម្លៃតាមតែអ្វីដែលពួកគេចង់សរសេរតែប៉ុណ្ណោះ។
ឯកឧត្តមបានបន្តថា កន្លងមក ទោះបីជាមានការពន្យល់បកស្រាយជាច្រើនលើកច្រើនសាររួចមកហើយរបស់ក្រសួង ព័ត៌មាន និងក្រសួង -ស្ថាប័នពាក់ព័ន្ធទៅនឹងការលើកឡើងក្នុងរបាយការណ៍នេះក៏ដោយ ក៏ក្រុមអ្នកសរសេររបាយការណ៍នេះមិនបានយកទៅធ្វើការសិក្សាស្រាវជ្រាវ និងពិចារណាលើការពន្យល់បកស្រាយបំភ្លឺរបស់ក្រសួង-ស្ថាប័ន ពាក់ព័ន្ធឡើយ។ នេះជាចំណុចដែលបញ្ជាក់បានថា ការសរសេររបាយការណ៍នេះ គឺជាសរសេរទៅតាមអ្វីដែលពួកគេចង់បានតែប៉ុណ្ណោះ។
ឯកឧត្តម អ្នកនាំពាក្យក្រសួងព័ត៌មាន បានបន្ថែមថា នៅប្រទេសកម្ពុជា ក៏មិនខុសប្លែកពីបណ្តាប្រទេសនានាដែរ ការកសាងច្បាប់ និងលិខិតបទដ្ឋាននានាគឺក្នុងគោលបំណងធានានូវការបំរើដល់ផលប្រយោជន៍ប្រជាពលរដ្ឋ និងប្រទេសជាតិសំដៅធានាបាននូវគោលការណ៍នីតិរដ្ឋក្នុង សង្គមប្រជាធិបតេយ្យ ។ ដូច្នេះរាល់ការកសាងច្បាប់ និងលិខិតបទដ្ឋាននានាពុំអាចចាត់ទុកថាជាឧបករណ៍ក្នុងការបំបិតសិទ្ធិសេរីភាព ឬរឹតត្បិតសិទ្ធិសេរីភាពនៃការបញ្ចេញមតិ ឬសេរីភាពសារព័ត៌មាននោះទេ៕
