ឧត្តមសេនីយ៍ឯក ហ៊ុន ម៉ាណែត៖ ពលិកម្ម និងភក្តីភាពរបស់មន្ត្រីស៊ីម៉ាក់ ចំពោះបុព្វហេតុជាតិ គឺពិតជាគំរូវីរភាពដ៏ប្រពៃបំផុត ដែលប្រជាជនខ្មែរទាំងមូល គោរពដឹងគុណជានិច្ច

ភ្នំពេញ៖ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក បានលើកលើងថា ពលិកម្ម និងភក្តីភាពរបស់ថ្នាក់ដឹកនាំ និងមន្ត្រី-បុគ្គលិកស៊ីម៉ាក់ទាំងអស់ ចំពោះបុព្វហេតុជាតិ គឺពិតជាគំរូវីរភាពដ៏ប្រពៃបំផុត ដែលប្រជាជនខ្មែរទាំងមូល គោរពដឹងគុណជានិច្ច ។

ក្នុងពិធីអបអរសាទរខួបលើកទី៣០ នៃការបង្កើតមជ្ឈមណ្ឌលសកម្មភាពកំចាត់មីនកម្ពុជា (CMAC-ស៊ីម៉ាក់) និងការបំពាក់ឋានន្តរស័ក្តិ កងយោធពលខេមរភូមិន្ទ ជូនមន្ត្រីស៊ីម៉ាក់ចូលនិវត្តន៍ នៅខេត្តកំពង់ឆ្នាំង នាថ្ងៃទី៤ សីហា ឯកឧត្តមឧត្តមសេនីយ៍ឯក ហ៊ុន ម៉ាណែត បានអបអរសាទរចំពោះ ការប្រារព្ធខួបលើកទី៣០ នៃការបង្កើតមជ្ឈមណ្ឌលស៊ីម៉ាក់ និងសូមវាយតម្លៃខ្ពស់ចំពោះកិច្ចខិតខំប្រឹងប្រែង និងការលះបង់កម្លាំងកាយចិត្តរបស់ថ្នាក់ដឹកនាំ និងមន្ត្រី-បុគ្គលិកស៊ីម៉ាក់ទាំងអស់ ដែលបានយកចិត្តទុកដាក់ ក្នុងការបំពេញភារកិច្ចដ៏ថ្លៃថ្លា និងឧត្តុង្គឧត្តម ជូនជាតិមាតុភូមិរបស់យើង ដោយមិនគិតអំពីអាយុជីវិតរបស់ខ្លួន។

ជាមួយគ្នានោះឧត្តមសេនីយ៍ឯក ហ៊ុន ម៉ាណែត បានថ្លែងអំណរអរគុណយ៉ាងជ្រាលជ្រៅចំពោះដៃគូអភិវឌ្ឍន៍, បណ្តាប្រទេសជាមិត្ត ព្រមទាំងអង្គការ, ស្ថាប័ន, ក្រុមហ៊ុន និងសប្បុរសជនទាំងអស់ ដែលបានជួយឧបត្ថម្ភគាំទ្រដល់សកម្មភាពបោសសម្អាតមីននៅកម្ពុជា ព្រមជាមួយនឹងសេចក្តីសង្ឃឹមយ៉ាងមុតមាំថា ការគាំទ្រ និងកិច្ចសហប្រតិបត្តិការដ៏ថ្លៃថ្លាទាំងនេះ នឹងនាំទៅដល់ការសម្រេចបាននូវទស្សនវិស័យរួម “កម្ពុជាសូន្យមីនក្នុងឆ្នាំ២០២៥” ដូចការរំពឹងទុកជាក់ជាមិនខាន ៕