សម្ដេចតេជោ ស្នើរដ្ឋមន្ត្រីការបរទេសអាស៊ាន ពិចារណាលើគំនិតផ្តួចផ្តើម បង្កើតកិច្ចព្រមព្រៀងបៃតងអាស៊ាន ដើម្បីឲ្យតំបន់ឆ្ពោះទៅអនាគតបៃតង មួយមានចីរភាព

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ាន បានស្នើឱ្យរដ្ឋមន្ត្រីការបរទេសអាស៊ានពិចារណា លើគំនិតផ្ដួចផ្ដើមបង្កើតកិច្ចព្រមព្រៀង បៃតងអាស៊ាន (ASEAN Green Deal) សំដៅអនុញ្ញាតឱ្យតំបន់របស់អាស៊ានអាចប្រែខ្លួនបន្តិច ម្ដងៗឆ្ពោះទៅកាន់អនាគតបៃតងមួយដែលមានចីរភាព។

ថ្លែងក្នុងពិធីបើកកិច្ចប្រជុំរដ្ឋមន្ត្រីការបរទេសលើកទី៥៥ និងកិច្ចប្រជុំពាក់ព័ន្ធ នៅសណ្ឋាគារសុខា រាជធានីភ្នំពេញ នាព្រឹកថ្ងៃទី៣ ខែសីហា ឆ្នាំ២០២២ សម្ដេចតេជោ ហ៊ុន សែន បានថ្លែងថា បណ្ដារដ្ឋមន្ត្រីការបរទេសបានកំណត់របៀបវារៈប្រកបដោយមហិច្ឆតាខ្ពស់ សម្រាប់ជំនួប ក្នុងសប្តាហ៍នេះ។ ការដោះស្រាយបញ្ហាប្រឈមទាំងអស់ ដែលបានលើកឡើងលើរួមគ្នា ប្រាកដជាធ្វើឱ្យកិច្ចប្រជុំដែលមានចំនួនច្រើនរបស់ ឯកឧត្តម លោកជំទាវ ប្រកបដោយ ភាពពោរពេញ និងមានរយៈពេលវែង។

តែទោះជាយ៉ាងនេះក្តី សម្ដេចតេជោនាយករដ្ឋមន្ត្រីក៏បានលើកជាយោបល់ពាក់ព័ន្ធ នឹងគំនិតផ្តួចផ្តើមចំនួនពីរ ដែលសម្ដេចសូមស្នើឱ្យរដ្ឋមន្ត្រីការបរទេសអាស៊ានពិចារណា និងផ្តល់ការគាំទ្រ។ គំនិតផ្តួចផ្តើមទីមួយ គឺការដោះស្រាយចំពោះការគំរាមកំហែងដល់ភាព រស់រានមានជីវិតនៅក្នុងតំបន់ និងពិភពលោក ដែលបង្កឡើងដោយការប្រែប្រួលអាកាសធាតុ និងការខូចខាតផ្នែកបរិស្ថាន។ រហូតមកដល់ពេលនេះ អាស៊ាន បាន និងកំពុងដាក់ចេញនូវ ដំណោះស្រាយជាគោលនយោបាយជាច្រើន ប៉ុន្តែការឆ្លើយតប ហាក់នៅផ្តោតតែលើវិស័យ ជាក់លាក់ និងខ្វះការសម្របសម្រួលរវាងគ្នា។ ដូច្នេះអាស៊ានចាំបាច់ត្រូវជំរុញ កិច្ចការនេះ បន្ថែមទៀត តាមរយៈការប្រើប្រាស់ឱ្យអស់លទ្ធភាពនូវលក្ខខណ្ឌថ្នាក់ជាតិផ្សេងៗ ដើម្បីផ្ដល់ ជាវេទិកា សម្រាប់កិច្ចសហប្រតិបត្តិការរវាងប្រទេសជាសមាជិកអាស៊ាន ក៏ដូចជាដៃគូ ខាងក្រៅ។

សម្ដេចតេជោបានលើកឡើងថា ជាការប្រសើរ ប្រសិនបើអាស៊ានអាចពិចារណាលើ គំនិតផ្តួចផ្តើមបង្កើតក្របខ័ណ្ឌធំទូលាយមួយ ដែលហៅថា ជាកិច្ចព្រមព្រៀងបៃតងអាស៊ាន (ASEAN Green Deal) សំដៅអនុញ្ញាត ឱ្យតំបន់របស់យើងអាចប្រែខ្លួនបន្តិចម្ដងៗ ឆ្ពោះទៅ កាន់អនាគតបៃតងមួយដែលមានចីរភាព, ការប្រើប្រាស់ធនធានប្រកបដោយប្រសិទ្ធភាព ភាពធន់ និងភាពប្រកួតប្រជែងក្នុងផ្នែក សេដ្ឋកិច្ច កិច្ចព្រមព្រៀងបៃតងអាស៊ាននេះ នឹងអាច គ្របដណ្តប់ទៅលើវិស័យជាច្រើនដូចជា ហេដ្ឋារចនាសម្ព័ន្ធ ថាមពល កម្មន្តសាល ការប្រើ ប្រាស់ កសិកម្ម ការដឹកជញ្ជូន បរិស្ថាន និងហិរញ្ញវត្ថុ ដោយមានបច្ចេកវិទ្យា នវានុវត្តន៍ និងការកែច្នៃដើម្បីប្រើប្រាស់ឡើងវិញ បំពេញតួនាទីជាកត្តាជំរុញ។

សម្ដេចតេជោ ក៏បានស្វាគមន៍នូវមតិយោបល់របស់សមាជិកអាស៊ាន ក្នុងការធ្វើឱ្យ គំនិតផ្តួចផ្ដើមនេះក្លាយជាការពិត។ គំនិតផ្តួចផ្តើមទីពីរ គឺពាក់ព័ន្ធនឹងវិធានការ ដើម្បីស្តារនិង ងើបចេញពីផលប៉ះពាល់នៃជំងឺកូវីដ-១៩ ប្រកបដោយប្រសិទ្ធភាព។ អាស៊ាន បានឯកភាព អនុវត្តន៍គំនិតផ្តួចផ្តើម និងកម្មវិធីនានា ក្រោមយុទ្ធសាស្ត្រធំទាំង៤ នៃក្របខ័ណ្ឌស្ដារឡើង វិញគ្រប់ជ្រុងជ្រោយរបស់អាស៊ាន។ ស្របតាមយុទ្ធសាស្ត្រធំទី៣ ដែលសំដៅបង្កើនជា អតិបរមានូវសក្តានុពលនៃទីផ្សារអន្តរអាស៊ាន និងសមាហរណកម្មសេដ្ឋកិច្ចដែល ទូលំទូលាយជាងមុន។

សម្ដេចតេជោនាយករដ្ឋមន្រ្ដីជឿថា យើងត្រូវការជាចាំបាច់នូវលេខាធិការដ្ឋានដាច់ ដោយឡែកមួយឱ្យបានឆាប់បំផុត ដើម្បីសម្របសម្រួលការអនុវត្តប្រកបដោយប្រសិទ្ធភាព នូវកិច្ចព្រមព្រៀងអាសិប(RCEP) ដែលបានចូលជាធរមាន កាលពីខែមករា កន្លងទៅនេះ។

សម្ដេចតេជោគូសបញ្ជាក់ថា កម្ពុជាត្រៀមខ្លួនរួចជាស្រេច ក្នុងការធ្វើជាម្ចាស់ផ្ទះនៃ លេខាធិការដ្ឋានអាសិបនេះ ហើយថែមទាំងបានកំណត់ទីតាំងរួចជាស្រេចសម្រាប់ លេខាធិការដ្ឋានអាសិបនេះ នៅរាជធានីភ្នំពេញ និងបាន និងកំពុងរៀបចំគម្រោងសំណើ លម្អិតទៀតផង។

សម្ដេចតេជោសង្ឃឹមថា កម្ពុជាអាចទទួលបានការគាំទ្រពីប្រទេសសមាជិកអាស៊ាន ក៏ដូចជាប្រទេសជាសមាជិកផ្សេងទៀត នៃកិច្ចព្រមព្រៀងអាសិប នៅពេលដែល កម្ពុជាដាក់សំណើនេះជាផ្លូវការ ៕