ក្រុមប្រឹក្សាវិទ្យាសាស្ត្រស្រាវជ្រាវនិងកិច្ចការសង្គម ប្រជុំបូកសរុបការងារប្រចាំឆមាសទី១ និងលើកទិសដៅប្រចាំឆមាសទី២

ភ្នំពេញ៖ ដោយបានការអនុញ្ញាតដ៏ខ្ពង់ខ្ពស់ពីសំណាក់ លោកសាស្ត្រាចារ្យ ហិរិធម្មរក្សបណ្ឌិត ឈិន សីហា ទីប្រឹក្សាជាន់ខ្ពស់សមាគម ស.យ.ញ.ក. ទទួលបន្ទុកជាអគ្គាភិបាលនៃក្រុមប្រឹក្សា ក.វ.ស.ក.ស. លោក លីម អាស៊ីគីន ប្រធានក្រុមប្រឹក្សាវិទ្យាសាស្ត្រស្រាវជ្រាវនិងកិច្ចការសង្គម នាកាលពីថ្ងៃទី៩ ខែកក្កដា ឆ្នាំ២០២២ បានដឹកនាំកិច្ចប្រជុំរបស់ក្រុមប្រឹក្សាស្ដីពី “ការបូកសរុបការងារប្រចាំឆមាសទី១ និងលើកទិសដៅប្រចាំឆមាសទី២“ ព្រមទាំងពិនិត្យអំពីគម្រោងការងារសប្បុរសធម៌ ដែលមានការ ចូលរួមពីប្រធានលេខាធិកាដ្ឋាន លោកអនុប្រធានលេខាធិការដ្ឋាន និងសមាជិកមួយចំនួនផងដែរ។

ក្នុងកិច្ចប្រជុំនេះដែរបន្ទាប់ពីកញ្ញាប្រធានលេខាធិការដ្ឋាន បានអានរបាយការណ៍សកម្មភាពរួចមក លោក សារឿន សារី និងលោក វន់ ពិសី បានឡើងធ្វើបទបង្ហាញស្ដីពីគម្រោងកម្មវិធីសប្បុរសធម៌ជូនអង្គប្រជុំ។

ជាកិច្ចបន្ត លោកប្រធានអង្គប្រជុំបានផ្តល់ជូននូវអនុសាសន៍ណែនាំបន្ថែមដូចតទៅ ៖
– បន្តទំនាក់ទំនងសមាជិកក្នុងក្រុមឲ្យមានភាតរភាព
– លើកទឹកចិត្តដល់សមាជិក សមាជិកាទាំងអស់ឱ្យចូលរួមសហការគ្នានិងខិតខំធ្វើការងារឱ្យមានភាពរីកចម្រើន
– ត្រូវចេះយល់យោគអធ្យាស្រ័យឱ្យគ្នាក្នុងការងារប្រចាំថ្ងៃ
– រួបរួមសាមគ្គីគ្នាក្នុងកិច្ចការងារមនុស្សធម៌និងចូលរួមផ្សព្វផ្សាយឱ្យបានផុសផុលដល់សប្បុរសជន
– ត្រូវរក្សាចិត្តខន្តីនិងអំណត់អត់ធន់ក្នុងការងារ
– ការប្រើប្រាស់ឯកសណ្ឋានក្រុមប្រឹក្សាឱ្យបានត្រឹមត្រូវ
– លើកកម្ពស់ការបង្កើតស្នាដៃនានា
– ណែនាំអំពីការផ្សព្វផ្សាយរបស់ក្រុមប្រឹក្សាទៅលើបណ្តាញសង្គម
– ណែនាំឱ្យសមាជិករៀបចំបាឋកថាមួយខែម្ដង
– បង្កើតឱ្យមានការបណ្តុះបណ្តាលនានាតាមលទ្ធភាពដែលអាចធ្វើទៅបាន។

ជាចុងបញ្ចប់ លោក លីម អាស៊ីគីន ប្រធានក្រុមប្រឹក្សាវិទ្យាសាស្រ្តស្រាវជ្រាវនិងកិច្ចការសង្គមបាន កោតសរសើរខ្ពស់ពីសកម្មភាពគម្រោងការងារមនុស្សធម៌និងការងារដែលសម្រេចបានកន្លងមកដែលជួយយុវជនឲ្យទទួលបាននូវចំណេះដឹងផ្សេង គឺពិតជាសកម្មភាពល្អ និងជាធនធានល្អសម្រាប់សង្គម ជាពិសេសលោកប្រធានបានផ្តល់ជាអនុសាសន៍ល្អៗដល់ប្រធាន-អនុប្រធានផ្នែកព្រមទាំងសមាជិក សមាជិកាឱ្យបន្តសកម្មភាពការកសាងអំពើល្អនៅក្នុងសង្គម ការចែករំលែកក្តីស្រឡាញ់និងស្នាមញញឹម គ្រប់ទីកន្លែងបន្តទៀត និងធ្វើយ៉ាងណាខិតខំជួយអភិវឌ្ឍសង្គមជាតិតាមរយៈការអប់រំឱ្យអស់ពីលទ្ធភាព ដែលអាចធ្វើទៅបាន។

លើសពីនេះលោកប្រធានក្រុមប្រឹក្សាបានឱ្យសមាជិកក្នុងអង្គប្រជុំមានមតិយោបល់បន្ថែមក៏ដូចជាសំណូមពរនានានិងណែនាំឲ្យសមាជិកអង្គប្រជុំគោរពជានិច្ចនូវវិធាន “៣កុំ ៣ការពារ” របស់រាជរដ្ឋាភិបាលកម្ពុជា និងត្រូវទៅទទួលវ៉ាក់សាំងឱ្យបានគ្រប់គ្នា ជាពិសេសដូសជំរុញ ហើយត្រូវថែរក្សាសុខភាពឲ្យបាន ល្អប្រសើរជានិច្ចនិងជូនពរដល់សមាជិកអង្គប្រជុំប្រកបដោយសុខភាពល្អ ជោគជ័យគ្រប់កិច្ចការ និងជួបតែពុទ្ធពរ៤ប្រការកុំបីខាន៕