ឯកឧត្តម ឃុន ចាន់ណារិទ្ធ ដឹកនាំកិច្ចប្រជុំបូកសរុបការងារប្រចាំខែ នាយកដ្ឋានជំនាញចំនួន២ ដើម្បីបន្ដពង្រឹងការងារ និងពិនិត្យចក្ខុវិស័យនៃការរៀបចំផែនការវិនិយោគមូលនិធិសន្ដិសុខសង្គម
ភ្នំពេញ៖ ក្នុងឱកាសអញ្ជើញដឹកនាំកិច្ចប្រជុំបូកសរុបលទ្ធផលការងារសម្រេចបានប្រចាំខែមេសា និងពិភាក្សាលើបញ្ហាប្រឈមនានា របស់នាយកដ្ឋានសេវាមូលដ្ឋានសុខាភិបាល និងនាយកដ្ឋានគ្រប់គ្រងការវិនិយោគសន្ដិសុខសង្គម នារសៀលថ្ងៃទី២៨ ខែមេសា ឆ្នាំ២០២៦នេះ ឯកឧត្តម ឃុន ចាន់ណារិទ្ធ អគ្គនាយករង ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ បានធ្វើការវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ មន្ត្រី និងបុគ្គលិកនៃនាយកដ្ឋានទាំងពីរ ដែលបានសម្រេចលទ្ធផលការងារយ៉ាងល្អប្រសើរកន្លងមក។
បន្ទាប់ពីបានស្ដាប់នូវរបាយការណ៍បូកសរុប និងការលើកឡើងអំពីបញ្ហាប្រឈមនានា ឯកឧត្តមអគ្គនាយករង បានផ្ដល់នូវអនុសាសន៍ណែនាំឱ្យនាយកដ្ឋានសេវាមូលដ្ឋានសុខាភិបាល បន្តពង្រឹងយន្តការអនុវត្តជាមួយមូលដ្ឋានសុខាភិបាលដៃគូឱ្យមានសង្គតិភាព ដើម្បីធានាបាននូវនិរន្តភាព តម្លាភាព សុក្រឹត្យភាព ក្នុងភាពជាដៃគូ ដើម្បីជាប្រយោជន៍ជូនដល់សមាជិក ប.ស.ស.។
ទន្ទឹមនឹងនេះ ឯកឧត្តមអគ្គនាយករង ក៏បានសង្កត់ធ្ងន់ទៅលើភារកិច្ចរបស់នាយកដ្ឋានគ្រប់គ្រងការវិនិយោគមូលនិធិសន្តិសុខសង្គម ដោយត្រូវបន្តសិក្សា និងវិភាគលើកិច្ចការវិនិយោគឱ្យបានហ្មត់ចត់បំផុត ដើម្បីធានាឱ្យបាននូវសុវត្ថិភាព និងចីរភាពហិរញ្ញវត្ថុនៃកញ្ចប់ថវិកាមូលនិធិក្នុងរយៈពេលវែង។ ឯកឧត្តមបានរំលឹកថា រាល់កិច្ចការវិនិយោគ និងការគ្រប់គ្រងហិរញ្ញវត្ថុ ត្រូវតែអនុវត្តឱ្យបានត្រឹមត្រូវតាមច្បាប់ស្ដីពីរបបសន្តិសុខសង្គម និងលិខិតបទដ្ឋានគតិយុត្តជាធរមាន ដើម្បីការពារផលប្រយោជន៍របស់បងប្អូនដែលជាសមាជិក ប.ស.ស.។
សូមបញ្ជាក់ថា កិច្ចប្រជុំខាងលើនេះ ប្រព្រឹត្តទៅនៅស្នាក់ការកណ្តាល ប.ស.ស. រាជធានីភ្នំពេញ ដោយមានការចូលរួមពី លោកប្រធាននាយកដ្ឋាន លោក លោកស្រី អនុប្រធាននាយកដ្ឋាន លោក លោកស្រី ទីប្រឹក្សាបច្ចេកទេសជាន់ខ្ពស់ និងលោក លោកស្រីប្រធាន អនុប្រធានការិយាល័យ នៃនាយកដ្ឋានទាំង២ សរុបប្រមាណជា ៥០នាក់៕
