បណ្ឌិត ហ៊ុន ម៉ាណែត៖ សម្តេចតេជោ គឺជាមេដឹកនាំប្រកបដោយធម៌ ដែលតែងប្រកាន់យក គោលការណ៍សច្ចធម៌ និយាយពិត ធ្វើពិត និងបម្រើពិត

ភ្នំពេញ៖ ឯកឧត្តម ឧត្តមសេនីយ៏ឯក ហ៊ុន ម៉ាណែត បានលើកឡើងថា សម្តេចតេជោ នាយករដ្ឋមន្ត្រី គឺជាមេដឹកនាំប្រកបដោយធម៌ ដែលតែងប្រកាន់យកគោលការណ៍សច្ចធម៌ និយាយពិត ធ្វើពិត និងបម្រើពិត។

ឯកឧត្តមហ៊ុន ម៉ាណែត បានឲ្យដឹងទៀតថា នៅក្នុងសង្គមអារ្យធម៌ដូចពេលបច្ចុប្បន្ន គឺរាជរដ្ឋាភិបាលតែង បានផ្តោតតែទៅលើការខិតខំអនុវត្ត គោលនយោបាយបម្រើប្រជាពលរដ្ឋឱ្យបានកាន់តែល្អប្រសើរ ដោយព្យាយាមលុបបំបាត់អំពើអវិជ្ជមាន និងកែលម្អភាពអសកម្មនានានៅក្នុងសង្គម ជាពិសេសសំដៅ ធ្វើយ៉ាងណាបន្តពង្រឹងបន្ថែមទៀត នូវលទ្ធភាពក្នុងដោះស្រាយបញ្ហាជូនប្រជាពលរដ្ឋ ទាំងសមត្ថភាព ក្នុងការឆ្លើយតបក្នុងស្ថានភាព គ្រោះវិបត្តិ ដូចជាបញ្ហាជំងឺកូវីដ-១៩ ក្នុងរយៈកាលកន្លងមកនេះជាដើម និងការបន្តកសាងអភិវឌ្ឍជាតិ នៅមុខបន្ថែមទៀត។

ឯកឧត្តម បញ្ជាក់ថា “សម្តេចតេជោ នាយករដ្ឋមន្ត្រី គឺជាមេដឹកនាំប្រកបដោយធម៌ ដែលតែងប្រកាន់យក គោលការណ៍សច្ចធម៌ និយាយពិត ធ្វើពិត និងបម្រើពិត រួមជាមួយនឹងឆន្ទៈបង្រួបង្រួមជាតិ លើកតម្កើងសាមគ្គីភាពជាតិ និងស្រឡាញ់អាណិតប្រជាពលរដ្ឋដោយមិនមានការរើសអើងបែងចែក ដែលជាក់ស្តែងនោះ គឺការខិតខំប្រឹងប្រែងប្រកបដោយការទទួលខុសត្រូវរបស់សម្តេច រហូតសង្គ្រោះបានអាយុជីវិត ប្រជាពលរដ្ឋរាប់សែននាក់ចេញពីវិបត្តិគ្រោះភ័យនៃជំងឺកូវីដ-១៩”៕