អភិបាលខេត្តស្វាយរៀង ណែនាំរដ្ឋបាលក្រុង-ស្រុក ត្រូវបន្តសហការតាមដានបណ្តាអាគារស្នាក់នៅនានា និងចុះពិនិត្យជាប្រចាំជៀសវាងមានការលួចលាក់ប្រព្រឹត្តបទល្មើសស្គែមអនឡាញ

ស្វាយរៀង៖ ឯកឧត្តម ប៉េង ពោធិ៍សា អភិបាលខេត្តស្វាយរៀង បានណែនាំរដ្ឋបាលក្រុង-ស្រុក ត្រូវបន្តសហការតាមដាននូវបណ្តាអាគារស្នាក់នៅនានា និងចុះពិនិត្យតាមដានជាប្រចាំជៀសវាងមានការលួចលាក់ប្រព្រឹត្តបទល្មើសស្គែមអនឡាញ។

ការណែនាំរបស់ ឯកឧត្តម ប៉េង ពោធិ៍សា អភិបាលខេត្តស្វាយរៀង បានធ្វើឡើងក្នុងកិច្ចប្រជុំបូកសរុបលទ្ធផលការងារប្រចាំខែមេសា និងលើកទិសដៅការងារខែឧសភា ឆ្នាំ២០២៦ របស់រដ្ឋបាលខេត្តស្វាយរៀង នាថ្ងៃទី២៧ ខែមេសា ឆ្នាំ២០២៦។

កិច្ចប្រជុំនេះ មានការអញ្ជើញចូលរួមពី តំណាងប្រធានសាលាដំបូងខេត្ត តំណាងព្រះរាជអាជ្ញាអមសាលាដំបូងខេត្ត អភិបាលរងខេត្ត លោកនាយករដ្ឋបាលសាលាខេត្ត លោកស្នងការរងនគរបាលខេត្ត លោកមេបញ្ជាការរងកងរាជអាវុធហត្ថខេត្ត លោកមេបញ្ជាការរងតំបន់ប្រតិបត្តិការសឹករងស្វាយរៀង លោកប្រធានទីស្នាក់ការត្រួតពិនិត្យច្រកទ្វាអន្តរជាតិបាវិត និងព្រៃវល្លិ៍ លោក លោកស្រី ប្រធានមន្ទីរ-អង្គភាពនានាជុំវិញខេត្ត លោកអភិបាលក្រុង/ស្រុកទាំង៨ លោក លោកស្រី នាយកទីចាត់ការ/ប្រធានអង្គភាពចំណុះសាលាខេត្ត និងមន្ត្រីពាក់ព័ន្ធមួយចំនួនទៀត ។

មានប្រសាសន៍ទៅកាន់កិច្ចប្រជុំនេះ ឯកឧត្តម អភិបាលខេត្ត បានថ្លែងនូវការអរគុណចំពោះកងកម្លាំង និងអាជ្ញាធរពាក់ព័ន្ធគ្រប់លំដាប់ថ្នាក់ដែលបានយកចិត្តសហការការការពារសន្តិសុខសណ្តាប់បានល្អជូនប្រជាពលរដ្ឋ ជាពិសេសក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនៅក្នុងខេត្ត។

ឯកឧត្តម អភិបាលខេត្ត បានដាក់ចេញនូវទិសដៅសំខាន់ៗមួយចំនួន ដូចខាងក្រោម៖

១. អាជ្ញាធរពាក់ព័ន្ធត្រូវពិនិត្យទៅលើការសងសង់សំណង់នានាដែលរំលោភមកដីចំណីផ្លូវសាធារណៈនិងត្រូវចាត់វិធានការទប់ស្កាត់ឱ្យទាន់ពេលវេលា ពិសេសៃណ្តាប់ធ្នាប់នៅតាមដងផ្លូវ។

២.អាជ្ញាធរពាក់ព័ន្ធ និងការិយាល័យចំនាញត្រូវផ្តោតការយកក្នុងពិនិត្យគុណភាពផ្លូវដែលបានដេញថ្លៃរួច ឱ្យត្រឹមត្រូវតាមលក្ខណៈបច្ចេកទេសធានាដល់ការប្រើប្រាស់ ។

៣. បន្តការយកចិត្តទុកដាក់លើការងារពង្រឹងបញ្ហា ភូមិ ឃុំ មានសុវត្ថិភាព ដូចជារក្សាសន្តិសុខសណ្តាប់ធ្នាប់ឱ្យបានល្អជូនប្រជាពលរដ្ឋ ការបង្ក្រាបក្មេងទំនើងជាដើម។

៤.ពង្រឹងការអប់រំផ្សព្វផ្សាយច្បាប់ចរាចរណ៍ផ្លូវគោក ពង្រឹងការទប់ស្កាត់ការជួញដូរចែកចាយ និងប្រើប្រាស់គ្រឿងញៀននៅតាមមូលដ្ឋានឲ្យបានម៉ឺងម៉ាត់។

៥.រដ្ឋបាលក្រុង/ស្រុកត្រូវ បន្តការសហការតាមដាននូវបណ្តាអាគារស្នាក់នៅនានា និងចុះពិនិត្យតាមដានជាប្រចាំជៀសវាងមានការលួចលាក់ប្រព្រឹត្តបទល្មើសស្គែមអនឡាញ។

៦.រដ្ឋបាលក្រុង/ស្រុក និងជំនាញពាក់ព័ន្ធត្រូវបន្តការខិតខំដោះស្រាយបញ្ហានានាពាក់ព័ន្ធនិងបណ្តឹងព្រមទាំងសំណើរសំណូមរបស់ប្រជាពលរដ្ឋក្នុងមូលដ្ឋាន៕