ការប្រកួតកីឡាបាល់ទះមិត្តភាព រវាងកីឡាតំបន់ប្រតិបត្តិការសឹករងបន្ទាយមានជ័យ និងកីឡាវិទ្យាល័យអូរអំបិល
ភ្នំពេញ ៖ នៅថ្ងៃទី៩ ខែកក្កដា ឆ្នាំ២០២២ នៅទីបញ្ជាការ តំបន់ប្រតិបត្តិការសឹករងបន្ទាយមានជ័យ បានរៀបចំពិធីប្រកួតបាល់ទះមិត្តភាព រវាងកីឡាករតំបន់ប្រតិបត្តិការសឹករងបន្ទាយមានជ័យ និងកីឡាករសាលាវិទ្យាល័យអូរអំបិល។
ឆ្លងកាត់តាមរយៈការប្រកួតជាលក្ខណ:មិត្តភាព ដកស្រង់បទពិសោធន៍ និងមានការអញ្ជើញទស្សនាការប្រកួតដោយលោក វរសេនីយ៍ឯក មាស ប៊ុនរុន មេបញ្ជាការរង នាយសេនាធិការ តំបន់ប្រតិបត្តិការសឹករងបន្ទាយមានជ័យ លោក ឧត្ដមសេនីយ៍ត្រី រ៉ែម វីរៈ ស្នងការរងនគរបាលខេត្តបន្ទាយមានជ័យ និងសមាសភាពក្រុមការងារ គ្រូបង្វឹក របស់កីឡាករទាំង២ក្រុម ធ្វើឱ្យការប្រកួតកាន់តែមានការទាក់ទាញចិត្ត និងបង្កើននូវសេចក្តីសប្បាយរីករាយ នៅក្នុងឱកាសនៃការប្រកួតកីឡាបាល់ទះនេះផងដែរ។
ជាលទ្ធផល គឺក្រុមកីឡាតំបន់ប្រតិបត្តិការសឹករងបន្ទាយមានជ័យទទួលបានជ័យជំនះ លើក្រុមកីឡាវិទ្យាល័យអូរអំបិល ៣-១។
លោកវរសេនីយ៍ឯក នាយសេនាធិការ តំបន់ប្រតិបត្តិការសឹករងបន្ទាយមានជ័យ និង លោកឧត្ដសេនីយ៍ត្រី ស្នងការរងខេត្តបន្ទាយមានជ័យ បានធ្វើការកោតសរសើរដល់កីឡាករទាំងអស់ ដែលខិតខំប្រឹងប្រែង យ៉ាងស្វិតស្វាញ និងយកចិត្តទុកដាក់ក្នុងការប្រកួតកីឡាបាល់ទះជាលក្ខណ:មិត្តភាពនេះ ទទួលបទពិសោធន៍ និងបានបំពេញបន្ថែមនូវចំណុចខ្សោយរបស់ក្រុមកីឡាករទាំងពីរក្រុម ក្នុងពេលប្រកួតលើកក្រោយទៀត៕
