ឯកឧត្តមបណ្ឌិត ហ៊ុន ម៉ាណែត៖ គោលការណ៍របស់សម្តេចតេជោ ហ៊ុន សែន គឺខិតខំប្រឹងប្រែងធ្វើយ៉ាងណា លើកតម្កើងមោទនភាពជាតិខ្មែរ

ភ្នំពេញ៖ ឯកឧត្តមបណ្ឌិត ហ៊ុន ម៉ាណែត បានលើកឡើងថា គោលការណ៍របស់សម្តេចតេជោ នាយករដ្ឋមន្ត្រី គឺខិតខំប្រឹងប្រែងធ្វើយ៉ាងណា លើកតម្កើងមោទនភាពជាតិខ្មែរ តាមរយៈការជួយកសាង ពង្រឹងសមត្ថភាពរបស់ប្រជាពលរដ្ឋ ដើម្បីមានលទ្ធភាពអាចចូលរួម ប្រកួតប្រជែងដោយស្មើមុខស្មើមាត់ នៅលើឆាកអន្តរជាតិ ។

ក្នុងឱកាសតំណាងដ៏ខ្ពង់ខ្ពស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត អញ្ជើញសម្ពោធឆ្លងមហាកុដិ និងសមិទ្ធផលនានា ក្នុងវត្តដុងឧត្តម ស្ថិតនៅភូមិដុង ឃុំព្រៃផ្តៅ ស្រុកព្រៃកប្បាស ខេត្តតាកែវ នាថ្ងៃទី៩ កក្កដា ឯកឧត្តមបណ្ឌិត ហ៊ុន ម៉ាណែត បានមានប្រសាសន៍ថា កម្ពុជាក៏នឹងបន្តពង្រឹង និងពង្រីកទំនាក់ទំនងមិត្តភាព និងកិច្ចសហប្រតិបត្តិការជិតស្និទ្ធជាមួយ គ្រប់បណ្តាប្រទេសជាមិត្ត នៅទូទាំង សាកលលោក ដើម្បីស្វែងរកឱកាសបន្ថែមទៀត ក្នុងការពង្រឹងភាពប្រកួតប្រជែង របស់កម្ពុជា និងការទាញយកផលប្រយោជន៍ ពីដំណើរការសេដ្ឋកិច្ចទីផ្សារសេរី នៅក្នុងចរន្តសាកលភាវូបនីយកម្ម និងការអភិវឌ្ឍសម្រាប់ រយៈពេលវែងទៅមុខ ។