កម្លាំងតំបន់ប្រតិបត្តិការសឹករងបន្ទាយមានជ័យ បន្តល្បាតតាមត្រួតពិនិត្យខ្សែរបន្ទាត់ព្រំដែន ក្នុងភូមិសាស្ត្រទទួលខុសត្រូវ
ភ្នំពេញ៖ លោកឧត្តមសេនីយ៍ត្រី ជឹម ប៊ុនអាន មេបញ្ជាការ ចាត់តាំង លោក វរសេនីយ៍ឯក កែវ ស៊ីថា មេបញ្ជាការរងតំបន់ប្រតិបត្តិការសឹករងបន្ទាយមានជ័យ ទទួលការងារព្រំដែន នាថ្ងៃទី៩ ខែកក្កដា ឆ្នាំ២០២២ ដឹកនាំកម្លាំងដើរល្បាតត្រួតពិនិត្យភូមិសាស្ត្រ និងត្រួតពិនិត្យបង្គោលសីមា តាមខ្សែបន្ទាត់ព្រំដែនកម្ពុជា-ថៃ ភូមិសាស្ត្រ ដែលអង្គភាពទទួល ខុសត្រូវ គ្រប់ចំណុចគោលដៅដែលបានកំណត់ទុក ដើម្បីតាមដានសភាពការណ៍ និងទប់ស្កាត់ការលួចឆ្លងដែនខុសច្បាប់ឬបទល្មើសផ្សេងៗ ជាពិសេសការលួចនាំចេញនៅរថយន្តចង្កូតស្តាំ តាមអនុសាសន៍ដ៏ខ្ពង់ខ្ពស់ របស់ សម្តេចអគ្គមហាសេនាបតីតេជោ នាយករដ្ឋមន្រ្តី នៃព្រះរាជាណាចក្រកម្ពុជា ហាមដាច់ខាតការលួចនាំចូល រថយន្ត ចង្កូតស្តាំដោយខុសច្បាប់។
លោក វរសេនីយ៍ឯក កែវ ស៊ីថា មេបញ្ជាការរង តំបន់ប្រតិបត្តិការសឹករងបន្ទាយមានជ័យ ទទួលការងារព្រំដែន តែងតែដឹកនាំកម្លាំងត្រួតពិនិត្យ តាមខ្សែបន្ទាត់ព្រំដែន និងបង្គោលសិមាជាប់ជាប្រចាំ និងបានសហការយ៉ាងជិតស្និតជាមួយអង្គភាពមិត្ត មានកម្លាំងការពារព្រំដែនគោក នគរបាលព្រំដែន និងអាជ្ញាធរមូលដ្ឋាន ដើម្បីចូលរួមទប់ស្កាត់ការលួចឆ្លងដែនខុសច្បាប់ និងពិនិត្យបង្គោលសីមា ។
លោក ឧ ត្តមសេនីយ៍ត្រី មេបញ្ជាការ តំបន់ ប្រតិបត្តិការ សឹក រងខេត្ត បានថ្លែងអំណរគុណ ដល់កងកម្លាំងទាំងអស់ដែលបានខិតខំ ការពារជាតិមាតុភូមិ និងសុខសុវត្ថិភាពបងប្អូនប្រជាពលរដ្ឋក្នុងមូលដ្ឋានទទួលខុសត្រូវ។ ជាលទ្ធផល ក្នុងការល្បាតត្រួតពិនិត្យ សភាពការណ៍នៅលើខ្សែបន្ទាត់ព្រំដែន ដែលអង្គភាពទទួលខុសត្រូវគ្មានអ្វីប្រែប្រួលឡើយ ៕
