អភិបាលខេត្តបន្ទាយមានជ័យ ជំរុញណែនាំដល់ក្មួយៗសិស្សានុសិស្សត្រូវខិតខំរៀនក្រេបយកចំណេះដឹងដើម្បីក្លាយជាធនធានដ៏សំខាន់សម្រាប់ប្រទេសជាតិ

បន្ទាយមានជ័យ៖ នៅរសៀលថ្ងៃទី២១ ខែមេសា ឆ្នាំ២០២៦ ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ អមដំណើរដោយលោក ឃ្លោក នួយ អភិបាលរងខេត្ត អញ្ជើញជួបសំណេះសំណាលជាមួយលោកគ្រូ-អ្នកគ្រូ និងសិស្សានុសិស្ស ដែលកំពុងរៀន និងបង្រៀន នៅជម្រកបណ្តោះអាសន្ន (ផ្ទះអតីតយុទ្ធជន) នៅភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ។

ឯកឧត្តម អ៊ុំ រាត្រី បានថ្លែងអំណរគុណដល់លោកគ្រ-អ្នកគ្រូដែលបានតស៊ូរាល់ការលំបាកគ្រប់បែបយ៉ាងដើម្បីធ្វើការបង្ហាត់បង្រៀនទៅដល់ក្មួយៗ ក៏ដូចជាកូនៗសិស្សានុសិស្សឱ្យទទួលបាននូវចំណេះដឹង។ ដ្បិតតែយើងមិនទាន់អាច វិលទៅលំនៅឋាន និងសាលារៀនវិញបានលោកគ្រូ-អ្នកគ្រូ បានលះបង់ពេលវេលាដ៏មានតម្លៃ ក្នុងការបណ្តុះបណ្តាលដល់កុមារភៀសសឹកឱ្យទទួលបាននូវចំណេះដឹង ឱ្យក្លាយជាទំពាំងស្នងឬស្សីនាពេលអនាគត់។

ទន្ទឹមជាមួយគ្នានោះ ឯកឧត្តមក៏បានជំរុញណែនាំទៅដល់កូនៗ ក្មួយៗសិស្សានុសិស្សត្រូវខិតខំរៀនក្រេបយកចំណេះដឹងដើម្បីក្លាយជាធនធានដ៏សំខាន់សម្រាប់ប្រទេសជាតិ។ បើទោះបីជាទីនេះមិនដូចសាលារៀនដែលយើងធ្លាប់រៀនពីមុនមកក៏ដោយ ប៉ុន្តែទីនេះវាក៏ផ្តល់នូវចំណេះដល់កូនៗ ក្មួយៗ ក្នុងសិក្សារៀនសូត្រ បណ្តោះអាសន្ន ជាជាងបណ្តោយពេលវាលចោលឡេីយ ឥតប្រយោជន៍។

ក្នុងនោះឯកឧត្តម អភិបាលខេត្ត ក៏បានធ្វើការណែនាំបន្ថែមទៅដល់កូនៗ ក្មួយៗសិស្សានុសិស្ស ត្រូវចូលរួមគោរពច្បាប់ចរាចរណ៍ ជាពិសេសត្រូវចៀសឱ្យឆ្ងាយអំពីគ្រឿងញៀន៕