ឯកឧត្ដម គង់ សោភ័ណ្ឌ និងលោកជំទាវ នាំយកនូវទៀនវស្សា ទេយ្យវត្ថុ គ្រឿងឧបភោគបរិភោគ និងបច្ច័យកសាងមួយចំនួន ប្រគេនព្រះសង្ឃ គង់ចាំព្រះវស្សា នៅវត្តក្រាំងតារ័ត្ន ក្នុងស្រុកសំរោងទង

ភ្នំពេញ៖ ឯកឧត្ដម គង់ សោភ័ណ្ឌ អភិបាលខេត្តកណ្ដាល និងភរិយា ព្រមទាំងក្រុមគ្រួសារ នាព្រឹកថ្ងៃទី៩ ខែកក្កដា ឆ្នាំ២០២២ បាននាំយកនូវទៀនវស្សា ទេយ្យវត្ថុ គ្រឿងឧបភោគបរិភោគ និងបច្ច័យកសាងមួយចំនួន ដើម្បីប្រគេនព្រះសង្ឃដែល នឹងគង់ចាំព្រះវស្សាអស់កាលត្រីមាស នៅវត្តក្រាំងតារ័ត្ន ឃុំព្នាយ ស្រុកសំរោងទង ខេត្តកំពង់ស្ពឺ។

ការធ្វើទៀនវស្សាបូជាព្រះរតនត្រៃ ក្នុងរយៈពេលចូលវស្សានេះ គឺជាការចូលរួមចំណែកលើកស្ទួយ ការគោរពប្រណិប័តន៍ព្រះពុទ្ធសាសនា ដែលជាសាសនារបស់រដ្ឋ តាមរយៈការចូលរួមដោយសទ្ធាជ្រះថ្លា របស់ពុទ្ធបរិស័ទក្នុងការផ្គត់ផ្គង់ចង្ហាន់បិណ្ឌបាត និងគ្រឿងបរិក្ខារផ្សេងៗ និងរួមសាមគ្គីគ្នាបូជាទៀនវស្សា ដោយហែទៅវេរប្រគេនព្រះសង្ឃនៅតាមទីអារាមនានា។

ទំនៀមបូជាទៀនវស្សា គឺជាផ្នែកមួយនៃក្តីគោរពរបស់ពុទ្ធបរិស័ទ រំលឹកនឹកដល់គុណូបការៈនៃព្រះសម្មាសម្ពុទ្ធសមណគោតម ដោយបូជានូវគ្រឿងសក្ការៈ មានប្រទីប ទៀន ធូប និងផ្កាភ្ញីជាដើម និងមាននិយាយនៅក្នុងសាស្ត្រាអានិសង្សទៀនវស្សា ដែលព្រះសង្ឃ និយមសម្ដែងនៅពេលចូលវស្សា។

នៅក្នុងសាស្ត្រានោះដំណាលថា កាលព្រះសម្ពុទ្ធនៃយើងទ្រង់គង់ធរមាននៅឡើយ មានបុរសកម្សត់ម្នាក់ប្រកបរបរកាប់អុសលក់ជាមុខរបរប្រចាំថ្ងៃ។ គាត់តែងសង្កេតឃើញខ្លាឃ្មុំមួយធំ លោតចេញពីរូងមួយរៀងរាល់ថ្ងៃ។ ពេលដែលខ្លាឃ្មុំនោះលោតចេញផុតទៅ គាត់ក៏ដើរទៅមើលឃើញសុទ្ធតែអាចម៍ខ្លាឃ្មុំ ហើយក៏វេចយកមកបង្ហាញអ្នកជិតខាងឲ្យជួយមើល។ អ្នកជិតខាងប្រាប់ថា អាចម៌ខ្លាឃ្មុំនេះគេតែងយកមកស្ងោរធ្វើក្រមួនធ្វើទៀនអុជ ចូរអ្នកទៅយកឲ្យច្រើនមក។

បុរសកម្សត់នោះនឹកគិតថា ចុះបើអាចម៌ខ្លាឃ្មុំនេះ គេអាចយកមកធ្វើជាទៀនអុជបាន តើគេអាចយកទៀននោះទៅអុជជាគ្រឿងសក្ការបូជាចំពោះព្រះពុទ្ធអង្គបានដែរឬទេ? ឬមួយជាការមិនសមគួរគប្បី ព្រោះទៀននេះធ្វើអំពីសំណល់មិនស្អាតបែបនេះ។ ពេលដែលបុរសនោះកំពុងតែនឹកសង្ស័យមិនដាច់ស្រេចក្នុងចិត្តបែបនេះ ស្រាប់តែឃើញព្រះមហារោហន្ទត្ថេរនិមន្តមកដល់ ក៏ទូលសួរលោកតាមដំណើររឿង។ ព្រះមហារោហន្ទត្ថេរមានថេរដីកាថា ជាការប្រសើរណាស់។

លុះបុរសនោះធ្វើបានជាទៀនច្រើនហើយ ក៏នាំយកទៅថ្វាយព្រះមានបុណ្យ។ ព្រះមហារោហន្ទត្ថេរដែលជាអ្នកដឹកនាំទៅនោះ បានទូលព្រះអង្គថា បពិត្រព្រះអង្គដ៏ចម្រើន បុរសនោះបានទៅយកអាចម៌ខ្លាឃ្មុំមកស្ងោរយកក្រមួនលញ់ជាទៀនយកមកអុជបូជាព្រះអង្គ ហើយសង្ស័យថា ក្រែងពុំបានផលានិសង្សអ្វីទេដឹង ។ ព្រះមានព្រះភាគត្រាស់ថា ម្នាលអាវុសោ! បុរសនេះនឹងត្រូវបានទទួលផលានិសង្សច្រើនប្រការប្រាថ្នាអ្វីសឹងបានដូចបំណងទាំងអស់។ បុរសនោះស្ដាប់ហើយត្រេកអរក្រៃលែង ។
ដោយអំណាចនៃបុញ្ញកម្មនេះ លុះអស់អាយុសង្ខារទៅ បុរសនោះក៏បានទៅកើតក្នុងសុគតិភពមានឫទ្ធិដ៏ខ្លាំងក្លាលើសអស់ពពួកទេវតាទាំងឡាយ។