ឯកឧត្តម អ៊ុន ចាន់ដា អញ្ជើញចុះសួរសុខទុក្ខ ភរិយាយោធិនជួរមុខ ដែលសម្រាលកូនក្នុងមន្ទីរពេទ្យបង្អែកខេត្តកំពង់ចាម

កំពង់ចាម៖ នៅថ្ងៃទី១៨ ខែមេសា ឆ្នាំ២០២៦ ឯកឧត្តម អ៊ុន ចាន់ដា ប្រធានគណ:កម្មាធិការសាខាខេត្តកំពង់ចាម រួមដំណើរដោយលោកប្រធានមន្ទីរសុខាភិបាលនៃរដ្ឋបាលខេត្ត លោកប្រធានមន្ទីរពេទ្យបង្អែកខេត្ត-ឯកឧត្តម នាយកសាខារួមនឹងក្រុមការងារឥស្សរជនឆ្នើមថ្នាក់ជាតិនៃសាខា បានអញ្ជើញ ចុះសួរសុខទុក្ខ អ្នកស្រី ម៉ន ផល្លី អាយុ ៣២ ឆ្នាំ ជាភរិយាវីរ:យោធិន ជួរមុខទិសថ្មដាដែលមកសម្រាលកូន នៅ ក្នុងមន្ទីរពេទ្យបង្អែកខេត្តកំពង់ចាម។

ឯកឧត្តម អ៊ុន ចាន់ដា បាននាំយកបណ្តាំផ្ញើសាកសួរសុខដោយក្តីនឹករលឹក និងអាណិតអាសូរបំផុត ពឯកឧត្តមសន្តិបណ្ឌិត នេត សាវឿនប្រធានកិត្តិយសសាខា ពិសេសពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាដែលក្នុងតូនាទី ជាឥស្សរជនឆ្នើមថ្នាក់ជាតិ សម្តេចប្រធានតែងតែបានណែនាំអោយក្រុមការងារឥស្សរជនឆ្នើមថ្នាក់ជាតិថ្នាក់សាខា ក៏ដូចជាបណ្តាញការងារគ្រប់ថ្នាក់យកចិត្តទុកដាក់ ជួយដោះស្រាយសម្រាលទុក្ខលំបាកដល់ពលរដ្ឋរងគ្រោះ និងងាយរងគ្រោះក្នុងនោះត្រូវផ្តោតជាសំខាន់ទៅលើគ្រួសារវីរ:កងទ័ពជួរមុខ និងពលរដ្ឋភៀសសឹក ពិសេសការគាំពារសុខភាព មាតា ទារក និងកុមារ ដោយមិនរើសអើង។

គួររំលឹកថា អ្នកស្រី ម៉ន ផល្លី ជាភរិយាវីរ:យោធិនជួរមុខទិសថ្មដា ដែលកំពុងបំពេញបេសកកម្មការពារបូរណភាពទឹកដីយ៉ាងប្តូរផ្តាច់នៅសមរភូមិព្រំដែន។ អ្នកស្រី ម៉ន ផល្លី បាន ស្នាក់នៅផ្ទះម្តាយបង្កើតនាភូមិបឹងបបុះ ឃុំកៀនជ្រៃ ស្រុកកំពង់សៀម ហើយត្រូវបានម្តាយនិងក្រុមគ្រួសារ ជូនមកសម្រាកនៅមន្ទីរពេទ្យបង្អែកខេត្តកំពង់ចាម ដែលសេវា សម្រាល និង ថែទាំព្យាបាល ជាបន្ទុកមន្ទីរពេទ្យបង្អែកខេត្ត ទាំងស្រុង។ដោយមានការយកចិត្តទុកដាក់ររបស់ក្រុមគ្រូពេទ្យ អ្នកស្រី ម៉ុន ផល្លី សម្រាលបានកូនទី៤ ភេទស្រី ១នាក់ ទម្ងន់២,៦ គក្រ ដោយសុវត្ថិភាពនៅវេលាម៉ោង៧ និង ៥៥ នាទី ថ្ងៃទី១៣ ខែមេសា ឆ្នាំ២០២៦។

ឯកឧត្តម អ៊ុន ចាន់ដា បានផ្តល់អំណោយរបស់សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា និងសម្តេចមហាបវរធិបតី ហ៊ុន ម៉ាណែតនិងលោកជំទាវបណ្ឌិត ពេជ ចន្ទមុនី ជូន អ្នកស្រី ម៉ុន ផល្លី រួមមាន ទឹកដោះគោស្រស់ សម្ភារមាតា ខោអាវទារក គ្រឿងឧបភោគបរិភោគ ទឹកពិសា ២កែស ទឹកក្រូច ឃីតអនាម័យស្ត្រី ១ឈុត ផ្លែឈើស្រស់១កន្ត្រក និងថវិកាសរុប ចំនួន ១,០០០,០០០រៀល៕