លោក ហួត សុធី ចាត់កម្លាំងជំនាញ ចុះផ្សព្វផ្សាយអំពីផលប៉ះពាល់នៃគ្រឿងញៀន ដល់បងប្អូនប្រជាពលរដ្ឋ ដែលអញ្ជើញមកទស្សនាកម្សាន្តក្នុង ឱកាសបុណ្យចូលឆ្នាំថ្មីប្រពៃណីជាតិខ្មែរ

សៀមរាប ៖ នៅថ្ងៃអង្គារទី១៤ ខែមេសា ឆ្នាំ២០២៦ ដោយអនុវត្តតាមអនុសាសន៍ណែនាំដ៏ខ្ពង់ខ្ពស់របស់ ឯកឧត្ដម នាយឧត្ដមសេនីយ៍ ស ថេត អគ្គស្នងការនគរបាលជាតិ លោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តសៀមរាប បានចាត់កម្លាំងផែនការងារប្រឆាំងគ្រឿងញៀន ចុះផ្សព្វផ្សាយអំពីផលប៉ះពាល់ នៃគ្រឿងញៀន ដល់បងប្អូនប្រជាពលរដ្ឋ ដែលអញ្ជើញមកទស្សនាកម្សាន្ត ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដែលរដ្ឋបាលខេត្តសៀមរាប បានរៀបចំព្រឹត្តិការណ៍ “សៀមរាបសង្រ្កាន្ត” ឆ្នាំ២០២៦ ដែលក្នុងនោះកម្លាំងជំនាញ បានផ្សព្វផ្សាយ និងចែកខិតប័ណ្ណអំពីផលប៉ះពាល់នៃ ការប្រើប្រាស់គ្រឿងញៀន កម្មវិធី NO Drug (App No Drug) ផលប៉ះពាល់នៃការប្រើប្រាស់បារីអេឡិចត្រូនិច និងសូមអំពាវនាវ ដល់បងប្អូនប្រជាពលរដ្ឋទាំងអស់រួមគ្នា បង្ការ ទប់ស្កាត់ និងកាត់ផ្តាច់ឫសគល់នៃបញ្ហាគ្រឿងញៀន ដែលជាបញ្ហាសង្គមដ៏សំខាន់ និងកំពុងបង្កគ្រោះថ្នាក់យ៉ាងធ្ងន់ធ្ងរ ទៅលើបុគ្គល គ្រួសារ និងសង្គមជាតិទាំងមូល។

ជាក់ស្តែងគ្រឿងញៀនមិនត្រឹមតែ បំផ្លាញសុខភាពផ្លូវកាយ និងផ្លូវចិត្តប៉ុណ្ណោះទេ ប៉ុន្តែវាក៏ជាមូលហេតុនាំឲ្យកើតមានអំពើឧក្រិដ្ឋកម្ម ការបាត់បង់ការងារ ការបែកបាក់គ្រួសារ និងការធ្លាក់ចុះនៃសីលធម៌សង្គមផងដែរ។

ជាពិសេសយុវជន ដែលជាថាមពលសំខាន់របស់ជាតិ ប្រសិនបើធ្លាក់ចូលក្នុងអន្ទាក់គ្រឿងញៀន នោះនឹងប៉ះពាល់យ៉ាងធ្ងន់ធ្ងរ ដល់អនាគតរបស់ខ្លួន និងការអភិវឌ្ឍន៍ប្រទេសជាតិ៕