សៀមរាប៖ ប្រជាពលរដ្ឋរស់នៅក្រុងរុនតាឯកតេជោសែន រួមមានសិស្សានុសិស្ស និងស្រ្តីក្មេងចាស់ចំនួន១៥នាក់បាន ទទួលការបណ្តុះបណ្តាលជំនាញស្មូនកុលាលភាជន៍ តាមរយៈគម្រោងបណ្តុះបណ្តាលជំនាញវិជ្ជាជីវៈដូនតា នៅទីស្នាក់ការអង្គភាពគម្រោងភូមិធម្មជាតិរុនតាឯក ដែលរៀបចំឡើងដោយអាជ្ញាធរជាតិអប្សរា និងក្រសួងវប្បធម៌ និងវិចិត្រសិល្បៈ។
លោក អ៊ុក សុជាធី ជាគ្រូបង្គោលក្នុងវគ្គបណ្តុះបណ្តាលជំនាញវិជ្ជាជីវៈដូនតា ផ្នែកកុលាលភាជន៍នេះបានលើកឡើងថា ក្នុងនាមជាគ្រូបង្គោលនៃគម្រោងបណ្តុះបណ្តាលវិជ្ជាជីវៈដូនតា លោកមានក្តីសោមនស្សរីករាយដែលបានចែករំលែកចំណេះជំនាញដល់ពលរដ្ឋតំបន់រុនតាឯក តាមរយៈគម្រោងរបស់រាជរដ្ឋាភិបាលនេះ។ ដ្បិតនៅតំបន់នេះ និងជុំវិញ ជាមណ្ឌលផលិតកុលាលភាជន៍ដ៏ធំក្នុងសម័យអង្គរ ដូចជាឡតានី ឡអន្លង់ធំលើខ្នងភ្នំគូលែន ឡសរសី ខ្នារពោធិ៍ជាដើម។ បច្ចុប្បន្ន បច្ចេកទេសស្មូនកុលាលភាជន៍នេះ បានបាត់បង់ទាំងស្រុងទៅហើយ ជាមូលហេតុដែលគម្រោងបណ្តុះបណ្តាលជំនាញវិជ្ជាជីវៈដូនតា កំពុងខិតខំរកជំនាញឯកទេសស្មូននេះឱ្យរស់ឡើងវិញនៅតំបន់នេះ។
ដោយមានស្លាកស្នាមប្រវត្តិសាស្ត្រ ស្របតាមទស្សនវិស័យរបស់រាជរដ្ឋាភិបាលផង លោក សុជាធី មានចិត្តត្រេកអរជាពន់ពេក ដែលបានចែករំលែកជំនាញស្មូនរបស់លោក ជូនប្រជាពលរដ្ឋរស់នៅតំបន់រុនតាឯកនេះ។ រយៈពេលជិតមួយឆ្នាំមកនេះ លោកគ្រូបានប្រឹងប្រែងបង្រៀនទាំងទ្រឹស្ដី និងការអនុវត្តជាក់ស្ដែង ដូចជាការស្វែងយល់ពីវត្ថុធាតុដើម បច្ចេកទេសរៀបចំដីឥដ្ឋដើម្បីសូន រហូតបានជាផលិតផលសម្រេច។ បច្ចេកទេសផលិតមាន២ប្រភេទ គឺការសូនដោយដៃ និងសូនដោយជើងអន្ទោក ឬកង់បង្វិល ដែលជាបច្ចេកទេសពាក់កណ្ដាលស្វ័យប្រវត្តិ។
លោក សុជាធី បញ្ជាក់ថា ការផ្ទេរចំណេះដឹងនេះចាប់ផ្ដើមពីការអនុវត្តចាប់ពីវត្ថុងាយៗសាមញ្ញ ដូចជា សូនពែង កែវ ចានធំ-តូច ក្អម ថូ សូនរូប បច្ចេកទេសផ្សំស្រទាប់រលោងសម្រាប់លម្អ និងធានាបាននូវគុណភាពខ្ពស់។
លោកបន្ដទៀតថា ការបណ្តុះគំនិតពួកគាត់ឱ្យយល់អំពីលក្ខណៈនៃការបង្កើតថ្មី ហើយតម្រង់ទិសឱ្យពួកគាត់ស្វែងយល់ពីតម្រូវការទីផ្សារ ដើម្បីក្លាយជាសហគមន៍ស្មូនកុលាលភាជន៍នាពេលអនាគត។
អ្នកស្រី ផុន ម៉ាឡែន អាយុ៣៩ឆ្នាំ ប្រជាពលរដ្ឋរស់នៅភូមិធម្មជាតិរុនតាឯក ក្នុងចំណោមអ្នកស្ម័គ្រចិត្តចូលរៀនវគ្គបណ្តុះបណ្តាលជំនាញវិជ្ជាជីវៈដូនតានេះ បានឱ្យដឹងថា គាត់មានចិត្តស្រឡាញ់ជាយូរមកហើយ និងចង់ចេះផលិតកុលាលភាជន៍ ដែលជាមត៌កដូនតាយើង។
អ្នកស្រីបញ្ជាក់ថា ការរៀនសូនកុលាលភាជន៍ពីដំបូងមានការលំបាកដែរ តែដោយការខិតខំអត់ធ្មត់រហូតមានសមត្ថភាពអាចសូនចាន កែវ ថូ ប៉ាន់តែ ដែលមានសោភ័ណភាពប្រដំត្រសងគ្នាជាមួយសិក្ខាកាមផ្សេងៗដែរ។
ចំណែកអ្នកស្រី ហុង ថាវី អាយុ៤៩ឆ្នាំ ជាសិក្ខាកាមម្នាក់ទៀត ឱ្យដឹងថា អ្នកស្រីបានមករៀនវិជ្ជាសូនកុលាលភាជន៍នេះ ដោយក្ដីស្រលាញ់មត៌កដូនតា និងការលើកទឹកចិត្តពីក្រុមគ្រួសារផង។
អ្នកស្រីបានបែងចែកការងារប្រចាំថ្ងៃ និងពេលមករៀនវគ្គបណ្តុះបណ្តាល ដើម្បីទទួលបានចំណេះដឹងមួយនេះដោយមានលោកគ្រូបង្ហាត់បង្រៀនយ៉ាងយកចិត្តទុកដាក់។
អ្នកស្រីបានរៀនជំនាញស្មូននេះជាច្រើនខែ ហើយអាចផលិតបានវត្ថុច្រើនប្រភេទ។ ស្នាដៃរបស់អ្នកស្រី ក្រសួងបានជ្រើសរើសយកទៅតាំងពិព័រណ៍នៅរាជធានីភ្នំពេញទៀតផង។
អ្នកស្រី ហុង ថាវី បានអរគុណចំពោះរាជរដ្ឋាភិបាល ដែលបានបង្កើតវគ្គបណ្តុះបណ្តាលជំនាញស្មូនកុលាលភាជន៍ ហើយផ្តល់ឱកាសឱ្យគាត់បានសិក្សាជំនាញនេះ។
សិក្ខាកាមទាំងអស់ សំណូមពរឱ្យរាជរដ្ឋាភិបាល ក្រសួង និងស្ថាប័នពាក់ព័ន្ធ ដែលបានផ្ដួចផ្ដើមបង្កើតគម្រោងបណ្តុះបណ្តាលជំនាញវិជ្ជាជីវៈដូនតានេះ សូមបន្តអនុវត្តគម្រោងនេះរហូតតទៅដើម្បីថែរក្សាជំនាញមត៌កដូនតាឲ្យបានគង់វង្ស ជាពិសេសអាចប្រកបរបរចិញ្ចឹមគ្រួសារបន្ថែមផង ព្រមទាំងអាចថែរក្សាការពារនូវមត៌កវប្បធម៌អរូបីផ្នែកស្មូនកុលាលភាជន៍របស់ដូនតាយើង កុំឱ្យបាត់បង់ផង៕
