មេដឹកនាំបក្សប្រឆាំងធំជាងគេរបស់កោះតៃវ៉ាន់ លោកស្រី Cheng Li-wun ចាប់ផ្តើមដំណើរទស្សនកិច្ច នៅប្រទេសចិន

តៃប៉ិ៖ បើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃអង្គារ ទី៧ ខែមេសា ឆ្នាំ២០២៦ បានឱ្យដឹងថា មេដឹកនាំបក្សប្រឆាំងធំជាងគេរបស់កោះតៃវ៉ាន់ លោកស្រី Cheng Li-wun បានចាប់ផ្តើមដំណើរទស្សនកិច្ច នៅប្រទេសចិន ក្នុងបេសកកម្ម ដែលលោកស្រីចាត់ទុកថាជាបេសកកម្មសន្តិភាព ហើយអំឡុងទស្សនកិច្ចនេះ លោកស្រីក៏អាចនឹងជួប ជាមួយប្រធានាធិបតីចិន លោក ស៉ី ជីនពីង ផងដែរ។

ទស្សនកិច្ចរបស់លោកស្រី Cheng ដែលជាប្រធានគណបក្ស Kuomintang (KMT) គឺចំពេលដែលចិនបន្តបង្កើនសម្ពាធយោធា លើកោះតៃវ៉ាន់ និងស្របពេលសភាតៃវ៉ាន់ ដែលគ្រប់គ្រងដោយបក្សប្រឆាំង កំពុងរារាំងផែនរបស់រដ្ឋាភិបាល ស្តីពីកញ្ចប់ថវិកាបន្ថែមចំនួន ៤០ពាន់លានដុល្លារ សម្រាប់ការចំណាយលើវិស័យយោធា។

ថ្លែងប្រាប់ក្រុមអ្នកសារព័ត៌មាន មុនពេលចាកចេញពីតៃវ៉ាន់ លោកស្រី Cheng បាននិយាយថា លោកស្រីកំពុងស្ថិតក្នុងការធ្វើដំណើរដើម្បីសន្តិភាព។ លោកស្រីបានលើកឡើងថា «ប្រសិនបើអ្នកពិតជាស្រឡាញ់តៃវ៉ាន់ អ្នកនឹងក្តាប់យកឱកាស ទោះតូចប៉ុនណាក៏ដោយ ពោលគឺគ្រប់ឱកាសដែលអាចទៅរួច ដើម្បីការពារកុំឱ្យតៃវ៉ាន់ ត្រូវហែកហួរដោយសង្រ្គាម។ ដូច្នេះហើយ ខ្ញុំសុខចិត្តជឿថា ប្រជាជនតៃវ៉ាន់ទាំងអស់សង្ឃឹមចង់ឱ្យដំណើរទស្សនកិច្ចនេះ នឹងទទួលជោគជ័យ ព្រោះយើងអាចប្រែក្លាយកន្លែងដែលគ្រោះថ្នាក់បំផុតនៅលើពិភពលោក ឱ្យទៅជាកន្លែងមានសុវត្ថិភាពជាងគេ នៅលើពិភពលោកវិញ»។

ចិនចាត់ទុកតៃវ៉ាន់ជាផ្នែកមិនអាចកាត់ផ្តាច់បាននៃទឹកដីរបស់ខ្លួន ហើយមិនបោះបង់ចោលដាច់ខាតជម្រើសប្រើកម្លាំងយោធា ដើម្បីគ្រប់គ្រងតៃវ៉ាន់។ ទីក្រុងប៉េកាំង បដិសេធចរចាជាមួយមេដឹកនាំតៃវ៉ាន់ លោក Lai Ching-te នៃគណបក្ស DPP ដោយនិយាយថា រូបលោកគឺជាបុគ្គលប៉ុនប៉ងបំបែករដ្ឋដ៏គ្រោះថ្នាក់។

គួរបញ្ជាក់ថា ទស្សនកិច្ចរបស់លោកស្រី Cheng កើតមានឡើង មួយខែមុនគម្រោងបើកកិច្ចប្រជុំកំពូលរបស់ប្រធានាធិបតីអាមេរិក លោក ដូណាល់ ត្រាំ ជាមួយលោក ស៉ី នៅទីក្រុងប៉េកាំង។ វាគឺជាទស្សនកិច្ចលើកទី១ របស់មេដឹកនាំបក្ស KMT ទៅកាន់ប្រទេសចិន ក្នុងរយៈពេលមួយទសវត្សរ៍ ប៉ុន្តែខាងចិនមិនទាន់បញ្ជាក់នៅឡើយទេ ថាតើលោក ស៉ី នឹងពិតជាជួបលោកស្រី Cheng ដែរឬយ៉ាងណា ខណៈលោកស្រីនឹងស្ថិតនៅក្នុងរដ្ឋធានីប៉េកាំង ចាប់ពីថ្ងៃព្រហស្បតិ៍សប្តាហ៍នេះ៕