តម្រូវការផ្នែកវេជ្ជសាស្រ្តសង្គ្រោះបន្ទាន់ នៅក្នុងប្រទេសអ៉ីរ៉ង់កំពុងកើនឡើងយ៉ាងខ្លាំង ហើយកញ្ចប់ព្យាបាលរបួសបឋម និងឧបករណ៍ផ្សេងទៀតអាចថយចុះ ប្រសិនបើសង្រ្គាមនៅតែបន្ត

ហ្សឺណែវ៖ បើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃសុក្រ ទី៣ ខែមីនា ឆ្នាំ២០២៦ ប្រធានប្រតិភូនៃសហព័ន្ធកាកបាទក្រហម និងអឌ្ឍចន្ទក្រហមអន្តរជាតិ បាននិយាយថា តម្រូវការផ្នែកវេជ្ជសាស្រ្តសង្គ្រោះបន្ទាន់ នៅក្នុងប្រទេសអ៉ីរ៉ង់កំពុងកើនឡើងយ៉ាងខ្លាំង ហើយកញ្ចប់ព្យាបាលរបួសបឋម និងឧបករណ៍ផ្សេងទៀតអាចថយចុះ ប្រសិនបើសង្រ្គាមនៅតែបន្ត។

មនុស្សជាង ១ ៩០០នាក់ ត្រូវបានសម្លាប់ តាំងពីសហរដ្ឋអាមេរិក-អ៉ីស្រាអែលធ្វើសង្រ្គាមជាមួយអ៉ីរ៉ង់ នាថ្ងៃទី២៨ ខែកុម្ភៈ ហើយជាង ២១ ០០០នាក់បានរងរបួស។ នេះបើតាមកាកបាទក្រហម ដែលជាទីភ្នាក់ងារមនុស្សធម៌តែមួយគត់នៅអ៉ីរ៉ង់ ប៉ុន្តែការប៉ាន់ស្មានផ្សេងទៀតគឺមានតួលេខខ្ពស់ជាង។

លោកស្រី Maria Martinez បានប្រាប់ Reuters ថាការព្រួយបារម្ភពេលនេះ គឺតម្រូវការមនុស្សធម៌កំពុងកើនឡើង និងលើសពីនេះ ហើយក៏បារម្ភអំពីសមត្ថភាពនាំយកជំនួយគាំទ្រ ចូលទៅក្នុងប្រទេសអ៉ីរ៉ង់។

តាមលោកស្រី Martinez សម្រាប់ពេលនេះ ស្តុកគ្រាអាសន្នមិនទាន់ខ្វះខាតទេ ប៉ុន្តែស្ថានភាពនឹងកាន់តែអាក្រក់ទៅៗ ប្រសិនបើការប្រយុទ្ធនៅតែបន្ត ជាពិសេសនៅពេលដែលមានការឡើងថ្លៃសម្ភារ ហើយមូលនិធិពួកគេមានកម្រិតទាប៕