ភ្នំពេញ៖ ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា និងជាប្រធានគណៈកម្មការពិសេស បានដឹកនាំគណៈប្រតិភូគណៈកម្មការពិសេសព្រឹទ្ធសភា អញ្ជើញការពារសេចក្តីស្នើច្បាប់ស្តីពីវិសោធនកម្មច្បាប់បោះឆ្នោតជ្រើសតាំងសមាជិកព្រឹទ្ធសភា នាថ្ងៃទី៣០ ខែមីនា ឆ្នាំ២០២៦ នៅវិមានរដ្ឋសភា។
ច្បាប់បោះឆ្នោតជ្រើសតាំងសមាជិកព្រឹទ្ធសភា ត្រូវបានធ្វើឡើងដំបូងតាំងពីឆ្នាំ ២០០៥ កំណត់យកភូមិភាគជាមណ្ឌលបោះឆ្នោត ដែលមានវិសាលភាពធំខ្លាំង (បណ្តុំខេត្តក្នុងភូមិភាគ) បង្កជាឧបសគ្គដល់ទំនាក់ទំនងរវាងសមាជិកព្រឹទ្ធសភា និងអង្គបោះឆ្នោត គណនេយ្យភាព និងប្រសិទ្ធភាពការងារនៅមូលដ្ឋាន។
សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា បានមានប្រសាសន៍តាំងពីដើមនីតិកាលទី ៥ «គឺត្រូវធ្វើការយ៉ាងជិតស្និទ្ធជាមួយអង្គបោះឆ្នោតរបស់យើង ជាពិសេសជាមួយក្រុមប្រឹក្សាឃុំ-សង្កាត់ ដែលតំណាងឱ្យប្រជាពលរដ្ឋនៅ មូលដ្ឋាន និងធ្វើការជាប្រចាំថ្ងៃជាមួយពួកគាត់នៅថ្នាក់ក្រោមជាតិ»។
ក្រោយទទួលអនុសាសន៍ដ៏ខ្ពង់ខ្ពស់របស់សម្តេចតេជោ ប្រធានព្រឹទ្ធសភាគណៈកម្មការពិសេស បានសិក្សាស្រាវជ្រាវយ៉ាងល្អិតល្អន់ រហូតឈានដល់ការធ្វើវិសោធនកម្មច្បាប់នេះដែលចំណុចសំខាន់គឺការផ្លាស់ប្តូរមណ្ឌលបោះឆ្នោតពីភូមិភាគ មកមណ្ឌលបោះឆ្នោតកម្រិតរាជធានី-ខេត្ត។
ឯកឧត្តមបណ្ឌិត បានថ្លែងអំណរគុណដល់រដ្ឋសភា ដែលបានអនុម័តសេចក្តីស្នើច្បាប់វិសោធនកម្មនេះ ដែលនឹងជួយឱ្យ ព្រឹទ្ធសភាកាន់តែមានប្រសិទ្ធភាព គណនេយ្យភាព ក្នុងការបម្រើផលប្រយោជន៍ជូនប្រជាពលរដ្ឋនៅតាមមូលដ្ឋានឱ្យកាន់តែចំគោលដៅ៕
