ប្រជាជនហ្វីលីពីនជាច្រើននាក់ នាំគ្នាចេញធ្វើបាតុកម្មនៅដើម្បីតវ៉ាការកើនឡើងខ្ពស់កប់ពពកនៃតម្លៃប្រេងឥន្ធនៈ

ម៉ានីល៖ បើតាមការចេញផ្សាយដោយសារព័ត៌មាន New York Times នាថ្ងៃសៅរ៍ ទី២៨ ខែមីនា ឆ្នាំ២០២៦ ក្នុងសប្តាហ៍នេះ ប្រជាជនហ្វីលីពីនជាច្រើននាក់ ភាគច្រើនជាបុគ្គលិកធ្វើការផ្នែកដឹកជញ្ជូន បាននាំគ្នាចេញធ្វើបាតុកម្មនៅរដ្ឋធានីម៉ានីល និងទីក្រុងដទៃទៀត ដើម្បីតវ៉ាការកើនឡើងខ្ពស់កប់ពពកនៃតម្លៃប្រេងឥន្ធនៈ នៅក្នុងប្រទេស។

បាតុកម្មខាងលើកើតមាន បន្ទាប់ពីនាពេលថ្មីៗនេះ ប្រធានាធិបតីហ្វីលីពីន លោក Ferdinand Marcos Jr បានប្រកាសភាពអាសន្នថ្នាក់ជាតិផ្នែកថាមពល ដោយសារតែផលប៉ះពាល់ពីសង្រ្គាមនៅមជ្ឈិមបូព៌ា។ ក្រុមអ្នកតវ៉ានៅទីក្រុងម៉ានីល បាននិយាយថា តម្លៃប្រេងម៉ាស៊ូតបានកើនប្រហែលទ្វេដង គិតចាប់តាំងពី សង្រ្គាមមជ្ឈិមបូព៌ាផ្ទុះឡើងកាលពីថ្ងៃទី២៨ ខែកុម្ភៈ។

ពួកគេបានទាមទារឱ្យរដ្ឋាភិបាលលោក Marcos ចាត់វិធានការបន្ថែម ដើម្បីទម្លាក់តម្លៃប្រេងឥន្ធនៈមកវិញ ដំឡើងថ្លៃធ្វើដំណើរនៃសេវាដឹកជញ្ជូនសាធារណៈ និងបង្កើនប្រាក់ឈ្នួល។

គួរបញ្ជាក់ថា កាលពីថ្ងៃសុក្រ លោក Marcos បាននិយាយថា រដ្ឋាភិបាលកំពុងព្យាយាមស្វែងរកប្រភពជំនួសនៃប្រេងឆៅ ក្រៅពីតំបន់មជ្ឈិមបូព៌ា។ កាលពីថ្ងៃព្រហស្បតិ៍ កប៉ាល់ដឹកប្រេងឆៅរុស្ស៉ីចំនួន៧០០ ០០០បារ៉ែល បានមកដល់ប្រទេសហ្វីលីពីន ហើយរដ្ឋាភិបាលលោក Marcos បានអះអាងថា មានប្រេងសម្រាប់បន្តផ្គត់ផ្គង់ដល់ខែមិថុនា។ មិនត្រឹមតែហ្វីលីពីនប៉ុណ្ណោះទេ បណ្តាប្រទេសផ្សេងទៀតនៅក្នុងតំបន់ ក៏កំពុងជួបវិបត្តិប្រេងឡើងថ្លៃ ដោយសារតែសង្រ្គាមមជ្ឈិមបូព៌ា៕