អភិបាលខេត្តកែប ណែនាំសមត្ថកិច្ចពាក់ព័ន្ធ និងអាជ្ញាធរ បន្តពង្រឹងការគ្រប់គ្រងការធ្វើចំណាកស្រុក របស់ប្រជាពលរដ្ឋ

កែប៖ ឯកឧត្តមបណ្ឌិត សោម ពិសិដ្ឋ អភិបាលខេត្តកែប និងជាប្រធានគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តកែប បានណែនាំដល់គ្រប់ស្ថាប័នសមត្ថកិច្ចពាក់ព័ន្ធ និងអាជ្ញាធរមូលដ្ឋានគ្រប់លំដាប់ថ្នាក់ ត្រូវបន្តពង្រឹងការគ្រប់គ្រងការធ្វើចំណាកស្រុករបស់ប្រជាពលរដ្ឋនៅមូលដ្ឋាន ឲ្យបានច្បាស់លាស់។

នៅក្នុងពិធីទិវាជាតិប្រយុទ្ធប្រឆាំងអំពើជួញដូរមនុស្ស ១២ ឆ្នូ ២០២៥ ក្រោមប្រធានបទ «យើងរួមគ្នាដើម្បីកម្ពុជា គ្មានអំពើជួញដូរមនុស្ស និងអំពើឆបោកតាមអនឡាន» នៅថ្ងៃទី២៤ ខែមីនា ឆ្នាំ២០២៦ ឯកឧត្តមបណ្ឌិត សោម ពិសិដ្ឋ បានគូសបញ្ជាក់បន្ថែមដោយណែនាំដល់គ្រប់ស្ថាប័នសមត្ថកិច្ចពាក់ព័ន្ធ និងអាជ្ញាធរមូលដ្ឋានគ្រប់លំដាប់ថ្នាក់ត្រូវបន្តពង្រឹងការគ្រប់គ្រងការធ្វើចំណាកស្រុករបស់ប្រជាពលរដ្ឋនៅមូលដ្ឋានឲ្យបានច្បាស់លាស់ អប់រំណែនាំប្រជាពលរដ្ឋឲ្យយល់អំពីកលល្បិចរបស់ជនឆបោកតាមរូបភាពផ្សេងៗ។

ឯកឧត្ដមបន្តថា ជាពិសេសត្រូវតាមដានត្រួតពិនិត្យសភាពការណ៍ និងការវិវត្តប្រែប្រួលនៃបទល្មើស កលល្បិចជនល្មើស បញ្ហាកត្តាអូសទាញ ជំរុញ ឬនាំប្រជាពលរដ្ឋទៅរកភាពរងគ្រោះដោយការជួញដូរមនុស្ស ការរំលោភបំពាន និងការកេងប្រវ័ញ្ចគ្រប់រូបភាព ពោលគឺត្រូវសហការ ដើម្បីប្រមូលព័ត៌មានដែលអាចធានាដល់វិធានការបង្ក្រាបបទល្មើសចាប់ជនល្មើស និងជួយជនរងគ្រោះក្នុងករណីឆ្លងដែនទាន់ពេលវេលាផងដែរ បើទោះបីជាកន្លងមក និងបច្ចុប្បន្នខេត្តកែប ពុំទាន់មានប្រជាពលរដ្ឋណាម្នាក់ត្រូវបានរងគ្រោះដោយអំពើជួញដូរមនុស្សក៏ដោយ។

បន្ថែមពីនេះ ឯកឧត្តមបណ្ឌិត អភិបាលខេត្ត បានបញ្ជាក់បន្ថែមទៀតថា រាជរដ្ឋាភិបាល នីតិកាលទី៧ នៃរដ្ឋសភា បានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ក្នុងនោះ សូចនាករទី៤ មុំទី១ បានសង្កត់ធ្ងន់ទៅលើការទប់ស្កាត់ និងបង្ក្រាបបទល្មើសព្រហ្មទណ្ឌគ្រប់ប្រភេទ ហើយក្នុង នោះរួមមានបទល្មើសនៃអំពើជួញដូរមនុស្ស ការជួញដូរកំលាំងពលកម្ម អាជីវកម្មផ្លូវភេទ និងការបន្តពង្រឹងការ អនុវត្តគោលនយោបាយភូមិ ឃុំ-សង្កាត់មានសុវត្ថិភាព។

ជាមួយនេះ ឯកឧត្តមបណ្ឌិត សោម ពិសិដ្ឋ ក៏បានណែនាំដល់សមត្ថកិច្ចពាក់ព័ន្ធគ្រប់លំដាប់ថ្នាក់ត្រូវបន្តយកចិត្តទុកដាក់ឱ្យខ្ពស់ក្នុងការគ្រប់គ្រងមុខសញ្ញាជួញដូរគ្រឿងញៀនគ្រប់ប្រភេទ ដើម្បីទប់ស្កាត់ និងបង្រ្កាបបានទាន់ពេលវេលា ដោយមិនត្រូវឲ្យមានការធ្វើអន្តរាគមន៍ ការលើកលែង និងសូមប្រជាពលរដ្ឋ និងក្មួយៗសិស្សានុសិស្សកុំពាក់ព័ន្ធនឹងគ្រឿងញៀនដែលនាំឱ្យបំផ្លាញអនាគតយើង៕