អភិបាលខេត្តតាកែវ ដឹកនាំកិច្ចប្រជុំជាមួយ មន្ទីរអង្គភាពជុំវិញខេត្ត អភិបាលក្រុងស្រុក ពិនិត្យ និងជម្រុញលើការងារចាក់វ៉ាក់សាំង ជូនពលរដ្ឋ
តាកែវ៖ ឯកឧត្តម អ៊ូច ភា អភិបាលខេត្តតាកែវ នៅព្រឹកទី៧ ខែកក្ដដា ឆ្នាំ២០២២នេះ បានអញ្ជើញបើកកិច្ចប្រជុំពិនិត្យមើល ដំណើរការចាក់វ៉ាក់សាំងជំងឺកូវីដ១៩ ដូសទី២ ដូសទី៣ ដូសទី៤ និងដូសទី៥ ជូនបងប្អូនពលរដ្ឋនៅទូទាំងខេត្តតាកែវ។ ដែលកិច្ចប្រជុំនេះក៏មានការអញ្ជើញចូលរួមដោយ លោក លោកស្រី ប្រធានមន្ទីរអង្គភាពជុំវិញខេត្ត លោក អភិបាលក្រុង ស្រុក ទាំង១០ និង លោកមេបញ្ជាការតំបន់ប្រតិបត្តិការសឹករងខេត្ត លោកមេបញ្ជាការកងរាជអាវុធហត្ថខេត្ត លោកស្នងការរងនគរបាលខេត្ត ព្រមទាំង លោក លោកស្រី មន្រ្តីរាជកាពាក់ព័ន្ធជាច្រើនរូបផងដែរ។
មានប្រសាសន៍នៅកិច្ចប្រជុំនាឱកាសនោះដែរ ឯកឧត្តម អ៊ូច ភា អភិបាលខេត្ត ក៏បានធ្វើជម្រុញនិងណែនាំ ដល់អាជ្ញាធរមូលដ្ឋាន រួមនិងមន្រ្តីពាក់ព័ន្ធត្រូវធ្វើចលនាអប់រំផ្សព្វផ្សាយ និងជំរុញបន្ថែមទៀតលើការងារចាក់វ៉ាក់សាំងការពារជំងឺកូវីដ១៩ ដូសទី២ ដូសទី៣ ដូសទី៤ និងដូសទី៥ ជូនដល់ប្រជាពលរដ្ឋអោយបានគ្រប់ៗគ្នា ដើម្បីជារនាំងការពារពីការឆ្លងជំងឺកូវីដ១៩ កុំឱ្យកើតមានឡើងនៅក្នុងសហគមន៍របស់យើង។
សូមជម្រាបជូនដែរថា បើយោងតាមរបាយការណ៍របស់ មន្ទីរសុខាភិបាលខេត្តតាកែវ កាលពីថ្ងៃទី៣០ ខែមិថុនា ឆ្នាំ២០២២នេះ បានឱ្យដឹងថា ចំនួនអ្នកបានចាក់វ៉ាក់សាំងជំងឺកូវីដ១៩ លើកទី១ សរុបចំនួន ៩០៥,៥៦៣នាក់នាក់ ស្មើនឹង ១១៨%, ចំនួនអ្នកបានចាក់វ៉ាក់សាំងជំងឺកូវីដ១៩ លើកទី២ សរុបចំនួន ៨១៧,៦៩៥នាក់ ស្មើនឹង ៩០%, ចំនួនអ្នកបានចាក់វ៉ាក់សាំងជំងឺកូវីដ១៩ លើកទី៣ សរុបចំនួន ៥២៥,៣៥២នាក់ ស្មើនឹង ៦៥%, ចំនួនអ្នកបានចាក់វ៉ាក់សាំងជំងឺកូវីដ១៩ លើកទី៤ សរុបចំនួន ១១៦,១៩៩នាក់ ស្មើនឹង ២៦%, ចំនួនអ្នកបានចាក់វ៉ាក់សាំងជំងឺកូវីដ១៩ លើកទី៥ សរុបចំនួន ៥,១០៥នាក់ ស្មើនឹង ០៤% ៕
