តម្លៃប្រេងពិភពលោកស្រកចុះតិចតួចវិញ បន្ទាប់ពីលោក ដូណាល់ ត្រាំ អំពាវនាវឱ្យប្រទេសធំៗ បញ្ចេញកម្លាំងជួយការពារច្រកសមុទ្រ Hormuz
Reuters៖ បើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃចន្ទ ទី១៦ ខែមីនា តម្លៃប្រេងពិភពលោក បានស្រកចុះតិចតួចវិញ បន្ទាប់ពីប្រធានាធិបតីអាមេរិក លោក ដូណាល់ ត្រាំ អំពាវនាវឱ្យប្រទេសដទៃទៀត បញ្ចេញកម្លាំងជួយការពារច្រកសមុទ្រ Hormuz ដែលជាសរសៃឈាមដ៏សំខាន់ សម្រាប់ការដឹកជញ្ជូនប្រេង និងឧស្ម័នជាសកល។
ប្រៀបធៀបនឹងការជួញដូរកាលពីថ្ងៃសុក្រសប្តាហ៍មុន ឥឡូវនេះប្រេងឆៅ Brent មានតម្លៃ ១០២.៩០ដុល្លារក្នុងមួយបារ៉ែល ធ្លាក់ចុះ ០.២៣ភាគរយ រីឯប្រេងអាមេរិក West Texas Intermediate មានតម្លៃ ៩៧.៦៤ភាគរយក្នុងមួយបារ៉ែល ធ្លាក់ចុះ ១.០៨ភាគរយ។
ទោះបីជាបែបនេះក្តី តម្លៃប្រេងទាំងពីរប្រភេទមានការកើនឡើងជាង ៤០ភាគរយនៅក្នុងខែនេះ គឺដល់កម្រិតខ្ពស់បំផុតមិនធ្លាប់មាន ចាប់តាំងពីឆ្នាំ ២០២២ ដោយសារតែសង្រ្គាមអ៉ីស្រាអែល-អាមេរិក ជំរុញឱ្យអ៉ីរ៉ង់ រារាំងការដឹកជញ្ជូនតាមច្រកសមុទ្រ Hormuz ប៉ះពាល់មួយភាគប្រាំនៃការផ្គត់ផ្គង់ប្រេងសកល។
លោក ត្រាំ កាលពីថ្ងៃអាទិត្យបាននិយាយថា ទីក្រុងវ៉ាស៉ីនតោនកំពុងពិភាក្សាជាមួយប្រទេសជាច្រើន អំពីការត្រួតពិនិត្យចរចរណ៍តាមផ្លូវទឹកមួយនេះ៕
