ឯកឧត្តម អូន ព័ន្ធមុនីរ័ត្ន វាយតម្លៃខ្ពស់ដល់ក្រុមការងារទាំងខាងរាជរដ្ឋាភិបាល និងខាងវិស័យឯកជន ដែលកន្លងមកបានធ្វើកិច្ចសហការល្អ ក្នុងការដោះស្រាយបញ្ហាប្រឈម សំណូមពរ និងក្តីកង្វល់ពាក់ព័ន្ធនឹងការធ្វើធុរកិច្ច

ភ្នំពេញ៖ កាលពីថ្ងៃទី១០ ខែមីនា ឆ្នាំ២០២៦ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ និងជាសហប្រធានក្រុមការងារផ្នែកនីតិកម្មពន្ធដារ និងអភិបាលកិច្ច “ក្រុម ឃ” នៃវេទិការាជរដ្ឋាភិបាល-ផ្នែកឯកជន រួមជាមួយនឹងលោក អានូដ ដាក (Arnaud Darc) សហប្រធាន “ក្រុម ឃ” មកពីខាងផ្នែកឯកជន បានសហការដឹកនាំកិច្ចប្រជុំ “ក្រុម ឃ” ដោយមានការអញ្ជើញចូលរួមពីថ្នាក់ដឹកនាំ និងមន្រ្តីជំនាញពាក់ព័ន្ធ ដែលជាសមាជិក-សមាជិកា ក្រុម«ឃ» នៃភាគីរាជរដ្ឋាភិបាល និង សមាជិក-សមាជិកា ក្រុម «ឃ»ផ្នែកឯកជន មកពីសភាពាណិជ្ជកម្មកម្ពុជា, សភាពាណិជ្ជកម្មអន្តរជាតិព្រមទាំងតំណាងក្រុមហ៊ុន និង សមាគមធុរកិច្ចជាតិ និង អន្តរជាតិ។

កិច្ចប្រជុំនេះធ្វើឡើងក្នុងគោលបំណងពិនិត្យ ពិភាក្សាលើបញ្ហាប្រឈម និងសំណូមពរក៏ដូចជា ដើម្បីដាក់ចេញវិធានការដោះស្រាយសមស្របជូនវិស័យឯកជននៅក្នុងប្រទេសកម្ពុជា, កិច្ចប្រជុំត្រូវបានរៀបចំដោយផ្ទាល់ និងតាមប្រព័ន្ធអនឡាញ បានពិនិត្យពិភាក្សាលើរបៀបវារៈ ចំនួន ៨ រួមមាន៖
១. ការប្រយុទ្ធប្រឆាំងនឹងពាណិជ្ជកម្មខុសច្បាប់,
២. ការស្នើសុំកម្រៃសេវារបស់ក្រុមហ៊ុនអន្តរការីធានារ៉ាប់រង គឺជាចំណូលមិនជាប់អាករ,
៣. ពន្ធនាំចេញលើការប្រមូលរ៉ែទង់ដែង,
៤. ការលក់ក្រៅព្រំដែនកម្ពុជា,
៥. ការប្រមូលពន្ធលើផ្ទាំងផ្សព្វផ្សាយ,
៦. នីតិវិធីក្នុងការប្រកាសការបង់អាករលើតម្លៃបន្ថែម,
៧. ការបង្កើតក្របខ័ណ្ឌសម្រាប់ការប្រកាសផ្សាយនូវបទប្បញ្ញតិ្ត និងលិខិតបទដ្ឋានគតិយុត្ត, និង
៨. ការបង្កើតស្ថាប័នជំនាញសម្រាប់ដោះស្រាយបញ្ហាវិវាទលើបំណុលដែ លមានកិច្ចធានា ។

ដើម្បីឆ្លើយតបនឹងសំណូមពររបស់ផ្នែកឯកជន, ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្រ្តី បានបញ្ជាក់ថា កន្លងមក រាជរដ្ឋាភិបាលបានដាក់ចេញនូវគោលនយោបាយ បទប្បញ្ញត្តិ យន្តការស្ថាប័ន និងវិធានការនានា ដើម្បីដោះស្រាយនិង ឆ្លើយតបទៅនឹងសំណូមពររបស់វិស័យឯកជន ទាំងកម្រិតនយោបាយ កម្រិតថ្នាក់ដឹកនាំ និង កម្រិតបច្ចេកទេស។ សំណូមពរ និងអនុសាសន៍របស់វិស័យឯកជន ត្រូវបានទទួលយកមកសិក្សា និងជាធាតុចូលសម្រាប់បន្តពិភាក្សា ស្វែងរកដំណោះស្រាយបន្ថែម។

ជាលទ្ធផល, អង្គប្រជុំបានឆ្លើយបំភ្លឺ និងដោះស្រាយសំណូមពររបស់វិស័យឯកជន ព្រមទាំង ប្រគល់ភារកិច្ចជូនក្រសួង-ស្ថាប័ន និងវិស័យឯកជនដែលមានការពាក់ព័ន្ធ អនុវត្តតាមការសម្រេចរបស់អង្គប្រជុំ។លេខាធិការដ្ឋាននៃក្រុមការងារ ត្រូវបន្តតាមដានជាមួយក្រសួង-ស្ថាប័ន ជំរុញការអនុវត្តនូវការសម្រេចរបស់អង្គប្រជុំ ដោយសកម្ម និង ការទទួលខុសត្រូវ ។

កិច្ចប្រជុំថ្ងៃនេះ, គឺជាការរួមចំណែកនូវកិច្ចខិតខំប្រឹងប្រែង និង កិច្ចសហការរួមគ្នា រវាងរាជរដ្ឋាភិបាល និង វិស័យឯកជន ក្នុងការជំរុញការវិនិយោគ និងការអភិវឌ្ឍសង្គមសេដ្ឋកិច្ច ខណៈដែលកម្ពុជាបាន និង កំពុងទទួលរងផលប៉ះពាល់ពីខាងក្រៅក្នុងពេលថ្មីៗនេះ។

ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្រ្តី ក៏បានវាយតម្លៃខ្ពស់ដល់ក្រុមការងារទាំងខាង រាជរដ្ឋាភិបាល ពិសេស អគ្គនាយកដ្ឋានពន្ធដារ, អគ្គនាយកដ្ឋានគយ និង រដ្ឋាករកម្ពុជា ក៏ដូចជា ខាងវិស័យឯកជន ដែលកន្លងមកបានធ្វើកិច្ចសហការល្អ ក្នុងការដោះស្រាយបញ្ហាប្រឈម សំណូមពរ និងក្តីកង្វល់ពាក់ព័ន្ធនឹងការធ្វើធុរកិច្ច ហើយបានអនុញ្ញាតឱ្យមានការពិភាក្សាដោយបើកចំហរ រវាងភាគីវិស័យឯកជន និង រាជរដ្ឋាភិបាល លើរបៀបវារៈទាំង ៨ខាងលើ៕