អភិបាលខេត្តរតនគិរី ជម្រុញឱ្យថ្នាក់ដឹកនាំ និងបុគ្គលិកសុខាភិបាលនៅក្នុងខេត្ត ត្រូវកែលម្អរចំនុចខ្វះខាតមួយចំនួន ដើម្បីទទួលបានទំនុកចិត្តពីប្រជាពលរដ្ឋ

រតនគិរី៖ ឯកឧត្តម ញ៉ែម សំអឿន អភិបាលខេត្តរតនគិរី បានជម្រុញឱ្យថ្នាក់ដឹកនាំ និងបុគ្គលិកសុខាភិបាលនៅក្នុងខេត្ត ត្រូវកែលម្អរចំនុចខ្វះខាតមួយចំនួន ដើម្បីទទួលបានទំនុកចិត្តពីប្រជាពលរដ្ឋ។

ការជម្រុញនេះធ្វើឡើង ក្នុងឱកាសដែលឯកឧត្តមអញ្ជើញជាអញ្ជើញជាអធិបតីភាពក្នុងពិធីបិទសិក្ខាសាលា បូកសរុបលទ្ធផលការងារសុខាភិបាលប្រចាំ ឆ្នាំ២០២៥ និងលើកទិសដៅការងារបន្តសម្រាប់ឆ្នាំ ២០២៦ ដែលបានប្រារព្ធធ្វើឡើងនៅសាលប្រជុំមន្ទីរសុខាភិបាលខេត្ត (អគារទីតាំងថ្មី)រសៀលថ្ងៃទី១០ ខែមីនា ឆ្នាំ២០២៦ ។

ឯកឧត្តម ញ៉ែម សំអឿន បញ្ជាក់ថា ចំនុចដែលត្រូវកែលម្អរ រួមមាន៖
១.បន្តពង្រឹង និងពង្រីក ហេដ្ឋារចនាសម្ព័ន្ធ មន្ទីរពេទ្យខេត្ត ស្រុក និងមណ្ឌលសុខភាព បុស្តិ៍សុខភាព
២.បន្តលើកកម្ពស់ និងបណ្តុះបណ្តាលសមត្ថភាពបន្ថែមទៀតដល់មន្ត្រី
៣.ពង្រឹងសាមគ្គីភាព វិន័យក្នុងពេលបំពេញការងារ និងការផ្តល់សេវា ២៤ម៉ោង/២៤ម៉ោង និង ៧ថ្ងៃ/សប្តាហ៍
៤.ពង្រឹងការលើកកម្ពស់គុណភាព សុវត្ថិភាពនៃសេវា ដើម្បីបង្កើនទំនុកចិត្តពីប្រជាពលរដ្ឋ
៥.ពង្រឹងលើការធ្វើបដិសណ្ឋារកិច្ច ក្នុងការផ្តល់សេវាថែទាំដល់អ្នកជំងឺ
៦.ពង្រឹងប្រព័ន្ធព័ត៌មាន តាមដាន និងវាយតម្លៃ ក្នុងយន្តការសុខភាពឌីជីថលលូបនីយកម្ម និងការវាយ តម្លៃឱ្យបានជាប្រចាំក្នុងមណ្ឌលសុខភាព និងមន្ទីរពេទ្យបង្អែក
៧.បន្តរួមគ្នាដោះស្រាយបញ្ហាក្នុងមូលដ្ឋានរបស់ខ្លួនឱ្យបានច្រើន និងប្រសិទ្ធភាព ជាពិសេសប្រជា ពលរដ្ឋដែលមានការលំបាក និងខ្វះធនធាន
៨.បន្តធ្វើការសហការឱ្យបានខ្ពស់ជាមួយអជ្ញាធរ និងដៃគូ ក្នុងការអភិវឌ្ឍវិស័យសុខាភិបាល ពិសេស ការពង្រីកសេវានៅតាមសហគមន៍
៩.ពង្រឹងក្រមសីលធម៌ និងវិជ្ជាជីវៈ (គុណធម៌គ្រូពេទ្យ) “សម្ដីផ្អែម រួសរាយ រាក់ទាក់ គឺជាថ្នាំព្យាបាលដំបូងសម្រាប់អ្នកជំងឺ” ហើយត្រូវចាត់ទុកអ្នកជំងឺដូចជាសាច់ញាតិខ្លួនឯង។

ក្នុងឱកាសនេះ ឯកឧត្តម អភិបាលខេត្តក៏បានសម្តែងនូវការកោតសរសើរ និងអរគុណដោយចំពោះ លោកប្រធានមន្ទីរសុខាភិបាលខេត្ត និងមន្ត្រីសុខាភិបាលគ្រប់លំដាប់ថ្នាក់ ដែលបានខិតខំប្រឹងប្រែងជម្នះរាល់ឧបសគ្គបំពេញភារកិច្ចអស់ពីកម្លាំងកាយចិត្តប្រកបដោយស្មារតីរទទួលខុសត្រូវខ្ពស់ ក្រមសីលធម៌ គុណភាព ប្រសិទ្ធភាព និងមានសុវត្ថិភាព ដើម្បីបម្រើសេវាសុខាភិបាលជូនប្រជាពលរដ្ឋ ក្នុងខេត្តរតនគិរី ទទួលបានលទ្ធផលគួរជាទីមោទនជាពិសេសនៅតាមតំបន់ដាច់ស្រយាល ដែលមកដល់ពេលនេះ យើងទទួលបានការជឿទុកចិត្តពីប្រជាពលរដ្ឋ ក្នុងការមកទទួលសេវាសុខាភិបាលកាន់តែច្រើនឡើង និង សូមសំដែងនូវការកោតសរសើរ និងវាយតម្លៃខ្ពស់ដល់មន្ត្រីសុខាភិបាលដែលជាកងទ័ពអាវ ស មានទឹកចិត្តមុះមុតអង់អាចក្លាហាន តស៊ូ ក្នុងការទៅចូលរួមអន្តរាគមន៍ជួយសង្គ្រោះបន្ទាន់ដើម្បីពិនិត្យ ព្យាបាល និងថែទាំសុខភាពជូនវីរកងទ័ព នគរបាល និងប្រជាជនភៀសសឹក ក្នុងអំឡុងពេលរងផលប៉ះ ពាល់ការឈ្លានពានពីប្រទេសថៃផងដែរ។

សូមបញ្ជាក់ថា បើតាមការលើកឡើង ពីសំណាក់ លោក
ជា សានិត ប្រធានមន្ទីរសុខាភិបាល នៃរដ្ឋបាលខេត្តរតនគិរីសមិទ្ធិសំខាន់ៗ ដែលសម្រេចបានក្នុងឆ្នាំ២០២៥ លើការផ្តល់សេវា បានបន្តស្ថិតនៅលើមាគារវឌ្ឍនភាព តាមរយៈកំណើននៃការប្រើប្រាស់សេវាថែទាំសុខភាពរបស់ប្រជាជនក្នុងនោះ ករណីពិនិត្យជម្ងឺក្រៅមានចំនួនសរុប ១៧៩,៦៥៤នាក់ និង សំរាកព្យាបាលមានចំនួនសរុប ២១,៨០៨នាក់ ក្នុងនោះ ករណីវះកាត់ធំមានចំនួន ៥១៤ ករណី។ រីឯអត្រាស្លាប់របស់អ្នកជម្ងឺសំរាកព្យាបាលមានចំនួន ០.៨២%។ ការសំរាលកូននៅមូលដ្ឋានសុខាភិបាលមានចំនួន ៤,៧៥៥នាក់ នៃចំនួនស្ត្រីមានគភ៌រំពឹងទុក ៤,៦០៧ នាក់។ វឌ្ឍនភាពនេះធ្វើអោយអត្រាមរណៈភាពមាតា និងទារកមានការថយចុះថែមទៀតនៅក្នុងបណ្តាឆ្នាំខាងមុខ ខណៈដែលសេវាសម្ភពសង្គ្រោះបន្ទាន់ និងថែទាំទារកត្រូវបានពង្រីកដើម្បីជួយសង្គ្រោះជីវិតស្ត្រីមានគភ៌ប្រឈមនឹងគ្រោះថ្នាក់នៅពេលសំរាល និងទារកកើតមិនគ្រប់ខែ។ ការគ្រប់ ដណ្តប់នៃវ៉ាក់សាំងបង្ការជំងឺសម្រេចបាន ៩៧% នៃកុមារចំណុចអាយុ ក្រោម១ឆ្នាំ។ កុមារអាយុក្រោម៥ឆ្នាំដែលបានមកពិនិត្យជម្ងឺករណីថ្មីមានចំនួន ៣២,៣៥៣នាក់ ឬជាមធ្យមកុមារម្នាក់បាន មកពិនិត្យជំងឺ ១.១៨ដង ក្នុង១ឆ្នាំ។ដោយឡែកអន្តរាគមន៍អាហារូបត្ថម្ភ បានផ្ដោតជាបឋមលើការបំបៅដោះទារកដោយទឹកដោះម្តាយ ក្នុងអំឡុង១ម៉ោងដំបូងនៃកំណើត ការផ្តល់មីក្រូសារជាតិដល់ស្ត្រីមានគភ៌ និងស្ត្រីក្រោយសំរាល និងកុមារ។ កម្មវិធីប្រយុទ្ធនឹងជំងឺឆ្លងរាតត្បាតថ្មីៗ កំពុងស្ថិតនៅលើមាគ៌ាវឌ្ឍនភាព។ ការព្យាបាលដោយ ឱសថប្រឆាំង មេរោគអេដស៍បានចំនួន ២៨៦នាក់ នៃចំនួនអ្នកផ្ទុកមេរោគអេដស៍/ជំងឺ អេដស៍ដែលបានចុះបញ្ជីទទួលការព្យាបាល។ អត្រាព្យាបាលជោគជ័យនៃជំងឺរបេង ៨៥%។ ករណីឈឺនៃជំងឺគ្រុនចាញ់ ក្នុងឆ្នាំ២០២៥ និងអត្រាស្លាប់ទាបបំផុត ០.០០ ក្នុងប្រជាជន១សែននាក់។វឌ្ឍនភាពនេះនឹងបន្តឈានទៅសម្រេចគោលដៅរបស់រាជរដ្ឋាភិបាលក្នុងការលប់បំបាត់ជម្ងឺគ្រុនចាញ់នៅក្នុងប្រទេសកម្ពុជា។ ការពង្រីកការគ្រប់ដណ្តប់នៃសេវាពិនិត្យ និងព្យាបាលជំងឺមិនឆ្លងរ៉ាំរ៉ៃ បានធ្វើអោយមានកំណើននៃការប្រើប្រាស់សេវាទាំងនោះគួរអោយកត់សំគាល់ដូចជាប្រជាជនអាយុពី ២៥-៦៤ឆ្នាំ ដែលមានជម្ងឺលើសសម្ពាធឈាម បានទទួលការពិគ្រោះបានកើនឡើងពី ៩,៩៤១ នាក់ ក្នុងឆ្នាំ២០២៥ និងប្រជាជនអាយុពី ២៥ – ៦៤ឆ្នាំ ដែល មានជម្ងឺទឹកនោមផ្អែម បានទទួលការពិគ្រោះ ៤,៦៩៣នាក់ ក្នុងរយៈពេលដូចគ្នានេះ។សេវាសុខភាពមាត់-ធ្មេញ បង្ការភាពងងឹតភ្នែករបួសដោយសារគ្រោះថ្នាក់ចរាចរណ៍ សុវត្ថិភាពចំណីអាហារ សុខភាពបរិស្ថាន កំពុងស្ថិតនៅក្នុងវឌ្ឍនភាព៕