រដ្ឋមន្ត្រីអប់រំ ជួបសំណេះសំណាល និងផ្តល់សម្ភារប្រើប្រាស់ គ្រឿងឧបភោគបរិភោគ សម្រាប់គណៈគ្រប់គ្រង លោកគ្រូ អ្នកគ្រូ នៃគ្រឹះស្ថានសិក្សាតាមបន្ទាត់ព្រំដែនក្នុងខេត្តបន្ទាយមានជ័យ

បន្ទាយមានជ័យ៖ នៅរសៀលថ្ងៃទី៩ ខែមីនា ឆ្នាំ២០២៦ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា រួមនឹងប្រតិភូអមដំណេីរ មានការចូលរួមពីឯកឧត្ដម អ៊ុំ រាត្រី អភិបាល នៃគណៈអភិបាលខេត្ត ជួបសំណេះសំណាល និងផ្តល់សម្ភារប្រើប្រាស់ គ្រឿងឧបភោគបរិភោគ សម្រាប់គណ:គ្រប់គ្រង លោកគ្រូ អ្នកគ្រូ នៃគ្រឹះស្ថានសិក្សាតាមបន្ទាត់ព្រំដែនក្នុងខេត្តបន្ទាយមានជ័យ សរុប២៨៥នាក់ នៅសាលប្រជុំធំ នៃមន្ទីរអប់រំ យុវជន និងកីឡាខេត្តបន្ទាយមានជ័យ។

មានមតិស្វាគមន៍ឯកឧត្តម អ៊ុំ រាត្រី ក៏បានលើកឡើងអំពីស្ថានភាពជាក់ស្តែងនៅតាមបន្ទាត់ព្រំដែនកម្ពុជា-ថៃ ក្រោយពីមានការផ្ទុះអាវុធជាលើកទី២ បណ្ដាលឱ្យហេដ្ឋារចនាសម្ព័ន្ធ ផ្ទះប្រជាពលរដ្ឋ សាលារៀន យោធាថៃបានប្រេីប្រាស់អាវុធធុនធ្ងន់បាញ់ផ្លោង បណ្តាល ឱ្យរងការខូចខាត។

ឯកឧត្តមអភិបាលខេត្ត ក៏បានថ្លែងអំណរគុណឯកឧត្តមរដ្ឋមន្ត្រីក្រសួងអប់រំ ដែលបានគិតគូរយកចិត្តទុកដាក់ពីសុខទុក្ខរបស់លោកគ្រូ-អ្នកគ្រូ សិស្សានុសិស្ស ព្រមទាំង បានរៀបចំថ្នាក់រៀនបណ្តោះអាសន្នជូនដល់សិស្សានុសិស្សដែលមិនទាន់អាចវិលត្រលប់ទៅលំនៅឋានវិញបាន។

ក្នុងឱកាសនោះដែរឯកឧត្តមបណ្ឌិតសភាចារ្យ ហង់ ជួនណារ៉ុនឧបកនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ក៏បានថ្លែងអំណរគុណដល់អាជ្ញាធរខេត្តបន្ទាយមានជ័យ ដែលកន្លងមកបានខិតខំយ៉ាងខ្នះខ្នែង រៀបចំទីតាំងសម្រាប់បងប្អូនជនភៀសសឹក ជាពិសេសកុមារ ក៏ទទួលបានការយកចិត្តទុកដាក់ជាខ្លាំង ហេីយឯកឧត្តមថ្លែងអំណរដល់មន្ទីរអប់រំយុវជន និងកីឡាខេត្ត បន្ទាយមានជ័យ លោកគ្រូ-អ្នកគ្រូ ដែលបានលះបង់បង្ហាត់បង្រៀនដល់កូនៗ ក្មួយៗភៀសសឹកឱ្យទទួលបានចំណេះដឹងបន្ថែមខណៈមិនទាន់អាវិលត្រលប់ទៅលំនៅឋានវិញបាន។

ឯកឧត្ដម ក៏បានបញ្ជាក់ថា ក្រោយពេលដែលយោធាថៃ បានដាក់បន្លាលួស ទូកុងតឺន័រ រំលោភដែនអធិបតេយ្យរបស់កម្ពុជា ប៉ះពាល់ដល់ពលរដ្ឋប្រមាណ៣០០០គ្រួសារ មិនទាន់អាចត្រលប់ទៅផ្ទះសំបែងវិញបាន ក្នុងនោះក៏មានលោក-អ្នកគ្រូចំនួន៣៨រូប បានបាត់បង់ទ្រព្យសម្បត្តិ និងផ្ទះសំបែង។

ឯកឧត្ដម បញ្ជាក់ថា ដេីម្បីសម្រាលទុក្ខលំបាកលោកគ្រូ-អ្នកគ្រូ ដែលបាត់បង់ទ្រព្យសម្បតិ្ត ផ្ទះសំបែង ក្រសួងក៏បានរៀបចំជាមូលនិធិសាមគ្គីមួយ ធ្វេីការប្រមូលសម្ភារៈ ក៏ដូចជាថវិកា ជួយដល់លោកគ្រូ-អ្នកគ្រូផងដែរ៕