បញ្ជាការដ្ឋានរថក្រោះ បើកវគ្គហ្វឹកហ្វឺនបំប៉នជំនាញ អ្នកបើកបរ អ្នកបាញ់កាំភ្លើងលើរថក្រោះ ជូននាយទាហាន នាយទាហានរង ពលទាហាន សម្រាប់ចូលរួមប្រកួតកីឡាកងទ័ពអន្តរជាតិ ឆ្នាំ២០២២ នៅរុស្សី

ភ្នំពេញ៖ នៅបញ្ជាការដ្ឋានរថក្រោះ នាថ្ងៃទី៥ ខែកក្កដា ឆ្នាំ២០២២ បានបើកវគ្គហ្វឹកហ្វឺន បំប៉នជំនាញ អ្នកបើកបរ អ្នកបាញ់កាំភ្លើងលើរថក្រោះជូនដល់សិក្ខាកាម ត្រៀមទៅចូលរួមប្រកួតកីឡាកងទ័ពអន្តរជាតិ ឆ្នាំ២០២២ នៅប្រទេសរុស្សី ក្រោមអធិបតីភាព ឧត្តមសេនីយ៍ឯក ពៅ ស៊ីថា មេបញ្ជាការរង កងទ័ពជើងគោក ជាមេបញ្ជាការ បញ្ជាការដ្ឋានរថក្រោះ ។

ឧត្តមសេនីយ៍ត្រី កុយ សិរីវុឌ្ឍី មេបញ្ជាការរង បញ្ជាការដ្ឋានរថក្រោះ និងជានាយសេនាធិការ បានឡើងថ្លែងក្នុងកម្មវិធីបើកវគ្គហ្វឹកហ្វឺនទៅប្រកួតកីឡាកងទ័ព នៅប្រទេសរុស្សី ដែលប្រទេសកម្ពុជាយើងមានកិត្តិយសបានចូលរួមក្នុង ឆ្នាំ២០២២នេះ ការប្រកួតកីឡាកងទ័ពនេះ មានឧបសគ្គជាច្រើន ដូចនេះត្រូវសិក្សាស្វែងយល់បន្ថែមដើម្បីទៀត រៀនស្វែងយល់ពីវិញ្ញាសារប្រឡងរថក្រោះឲ្យកាន់តែច្បាស់ជាងនេះទៅទៀត ។

ក្នុងនោះដែរតំណាងឲ្យកម្មសិក្សាការី វគ្គបំប៉នជំនាញរថក្រោះ ត្រៀទៅប្រកួតកីឡាកងទ័ព ឆ្នាំ២០២២ នៅប្រទេសរុស្សីទាំងអស់ លោកអនុសេនីយ៍ទោ សុង រដ្ឋ បានឡើងបេជ្ញាចិត្ត គោរពបទវិន័យ ទូទៅរបស់កងយោធពលខេមរភូមិន្ទ គោរពបទបញ្ជាយ៉ាងម៉ឺងម៉ាត់របស់អង្គភាព ខិតខំរៀនសូត្របន្ថែម ដើម្បីលើកកម្ពស់សមត្ថភាពក្នុងការប្រើប្រាស់ រថក្រោះ រថពាសដែកឲ្យបានស្ទាត់ជំនាញ ។ លើកកម្ពស់ស្មារតីគ្រប់គ្រង់ថែរក្សា គ្រឿងចក្រឲ្យបានល្អ ដើម្បីធានាក្នុងការប្រយុទ្ធ និងត្រៀមប្រយុទ្ធ ជាពិសេសប្តេជ្ញា លើកកម្ពស់ស្មារតីក្នុងការប្រកួតកីឡាកងទ័ពអន្តរជាតិ ឆ្នាំ២០២២ នៅប្រទេសរុស្សីឲ្យទទួលបានលទ្ធផលល្អជូនជាតិមាតុភូមិ ។

លោកមេបញ្ជាការ បានផ្ដាំផ្ញើ និងជូនពរដល់សិក្ខាកាមទៅប្រកួតកីឡាកងទ័ពនៅប្រទេសរុស្សីទាំអស់ ត្រូវខិតខំយកចិត្តទុកដាក់ក្នុងការរៀនសូត្រ ត្រៀមទៅប្រកួតឲ្យមានការស្ទាត់ជំនាញ ដើម្បីលើកកម្ពស់ដល់ទាហានយើង និងមុខមាត់របស់ប្រទេសជាតិរបស់យើង ។ សូមជូនពរដល់សិក្ខាកាមទាំងនៅពេលធ្វើដំណើរទៅមក សូមឲ្យមានសុវត្ថិភាពទាំងអស់គ្នា វិលមកមាតុប្រទេសរបស់យើងវិញ ៕