អភិបាលខេត្តកំពត បង្ហាញពីចក្ខុវិស័យក្នុងដំណើរការអភិវឌ្ឍខេត្តបន្តទៅមុខទៀត ដោយបង្កើតឱ្យមានសមិទ្ធផលទេសចរណ៍ថ្មីៗ ដើម្បីលើកកម្ពស់ជីវភាពរស់នៅរបស់ពលរដ្ឋ

កំពត៖ ឯកឧត្តម ម៉ៅ ធនិន អភិបាលខេត្តកំពត បានបង្ហាញពីចក្ខុវិស័យរបស់រដ្ឋបាលខេត្ត ក្នុងដំណើរការអភិវឌ្ឍខេត្តបន្តទៅមុខទៀត ដោយបង្កើតឱ្យមានសមិទ្ធផលទេសចរណ៍ថ្មីៗ ដើម្បីលើកកម្ពស់ជីវភាពរស់នៅរបស់ពលរដ្ឋ។

ការលើកឡើងរបស់ ឯកឧត្តម ម៉ៅ ធនិន នាឱកាសអញ្ជើញទទួលជួបពិភាក្សាការងារជាមួយ គណៈប្រតិភូគណៈកម្មការទី៧ នៃព្រឹទ្ធសភា ដឹកនាំដោយឯកឧត្តម ឈិត សុខុន ប្រធានគណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ នៃព្រឹទ្ធសភា នាថ្ងៃទី២៤ ខែកុម្ភៈ ឆ្នាំ២០២៦។

កិច្ចប្រជុំនេះរៀបចំឡើងក្នុងគោលបំណងពិភាក្សាការងារដើម្បីស្វែងយល់ពីវឌ្ឍនភាព បញ្ហាប្រឈម វិធានការដោះស្រាយ និងចក្ខុវិស័យទៅមុខរបស់រដ្ឋបាលខេត្ត ក៏ដូចជាមន្ទីរជំនាញពាក់ព័ន្ធនឹងវិស័យអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ ដែលស្ថិតក្នុងសមត្ថកិច្ចរបស់គណៈកម្មការទី៧ នៅភូមិសាស្ត្រខេត្តកំពត។

ក្នុងឱកាសនោះដែរ ឯកឧត្តម ឈិត សុខុន ប្រធានគណៈកម្មការទី៧ ព្រឹទ្ធសភា បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់រដ្ឋបាលខេត្ត និងមន្ទីរជំនាញពាក់ព័ន្ធ ដែលបានអនុវត្តភារកិច្ចដោយការទទួលខុសត្រូវ និងប្តេជ្ញាចិត្តខ្ពស់ ដើម្បីរួមគ្នាអនុវត្តន៍តាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាបាលបានល្អប្រសើរលើគ្រប់វិស័យ។

ទន្ទឹមនឹងនោះ តាមការចុះសិក្សា និងពិនិត្យជាក់ស្តែងរបស់ គណៈកម្មការសង្កេតឃើញ ថា ក្នុងរយៈពេលដ៏ខ្លីខេត្តកំពតមានការអភិវឌ្ឍយ៉ាងឆាប់រហ័សលើគ្រប់វិស័យ ទាំងវិស័យអប់រំ វប្បធម៌ សាសនា ពិសេសវិស័យទេសចរណ៍ ដោយនៅក្នុងខេត្តក្តី តាមបណ្តារមណីយដ្ឋាន សហគមន៍ទេសចរណ៍ និងកន្លែងកម្សាន្តនានាក្តីគឺមានការប្រែប្រួលយ៉ាងឆាប់រហ័ស ពិសេសសមិទ្ធិផលទេសចរណ៍ឯកថ្មីៗ ប្លែក និងទាក់ទាញ ពិសេសហេដ្ឋារចនាសម្ព័ន្ធផ្លូវថ្នល់ស្អាត អនាម័យបរិស្ថានស្អាត ដែលធ្វើឱ្យទេសចរដែលមកលេងកម្សាន្តមិនចេះនឿយណាយចិត្ត។

ជាមួយគ្នានេះដែរ ឯកឧត្តម ម៉ៅ ធនិន អភិបាលខេត្តកំពត ក៏បានបង្ហាញពីចក្ខុវិស័យរបស់រដ្ឋបាលខេត្ត ក្នុងដំណើរការអភិវឌ្ឍខេត្តបន្តទៅមុខទៀតដោយបង្កើតឱ្យមានសមិទ្ធផលទេសចរណ៍ថ្មីៗ ហេដ្ឋារចនាសម្ព័ន្ធនៅគ្រប់មូលដ្ឋានភូមិ ឃុំ ក្រុង-ស្រុក ដើម្បីបង្ករភាពងាយស្រួលដល់ពលរដ្ឋ ពិសេសលើកកម្ពស់ជីវភាពរស់នៅរបស់ពលរដ្ឋ។

ទន្ទឹមនឹងនោះដែរ អាជ្ញាធរគ្រប់លំដាប់ថ្នាក់ នឹងបន្តខិតខំប្រឹងប្រែងក្នុងការអភិវឌ្ឍលើគ្រប់វិស័យហើយបន្តលើកកម្ពស់វិស័យអប់រំ ដោយការលើកកម្ពស់គុណភាពបង្រៀន និងសិក្សា ការអភិវឌ្ឍយុវជន និងកីឡា រួមជាមួយការអភិរក្ស និងលើកតម្កើងវប្បធម៌ប្រពៃណី ក៏ដូចជាការជំរុញវិស័យទេសចរណ៍ឱ្យមានកំណើនប្រកបដោយចីរភាពភាព៕