ឯកឧត្តមបណ្ឌិត ជ្រុន ថេរ៉ាវ៉ាត អញ្ជើញចុះពិនិត្យផ្លូវក្រាលកៅស៊ូពីរជាន់ (DBST) ចំនួន ១ខ្សែ ប្រវែង ២០០០ម៉ែត្រ ស្ថិតនៅឃុំសំរោងលើ ស្រុកបន្ទាយមាស

កំពត៖ នៅព្រឹកថ្ងៃទី២១ ខែកុម្ភៈ ឆ្នាំ២០២៦នេះ ឯកឧត្តមបណ្ឌិត ជ្រុន ថេរ៉ាវ៉ាត រដ្ឋលេខាធិការក្រសួងអភិវឌ្ឍន៍ជនបទ បន្ទាប់ពីទទួលបានការណែនាំដ៏ខ្ពង់ខ្ពស់ពីឯកឧត្តមរដ្ឋមន្រ្តី បានដឹកនាំគណៈប្រតិភូអញ្ជើញចុះពិនិត្យការងារស្ថាបនាផ្លូវក្រាលកៅស៊ូពីរជាន់ (DBST) ចំនួន ១ខ្សែ ប្រវែង ២ ០០០ម ទទឹង ៧ម ចិញ្ចើមផ្លូវសងខាង ក្រាលដីល្បាយក្រួស ទទឹងម្ខាងៗ ១ម កម្រាស់ ០,២ម សាងសង់លូគ្រប់ប្រភេទចំនួន ៧កន្លែង ស្ថិតនៅភូមិត្រាំសសរ និងភូមិបរិវាស ឃុំសំរោងលើ ស្រុកបន្ទាយមាស ខេត្តកំពត (គម្រោងលេខ DRR-NC-2024-No.053)។

ក្នុងពេលចុះពិនិត្យជាក់ស្តែង ឯកឧត្តមបណ្ឌិត បានជួបជាមួយលោក ហ៊ុន ម៉ាន់ មេឃុំសំរោងលើ ,ជំទប់ និងស្មៀនឃុំ ព្រមទាំងប្រជាពលរដ្ឋរស់នៅសងខាងផ្លូវកំពុងសាងសង់នេះ ដើម្បីស្តាប់មតិយោបល់ពួកគាត់ ហើយពួកគាត់បានថ្លែងអំណរគុណយ៉ាងជ្រាលជៅបំផុតចំពោះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងឯកឧត្តម ឆាយ ប្ញទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ ដែលបានផ្តល់ផ្លូវកៅស៊ូមួយខ្សែប្រវែង២ គម ដ៏មានសារ:សំខាន់នេះ ។

អាជ្ញាធរ និងប្រជាពលរដ្ឋរស់នៅសងខាងផ្លូវនេះ បានសន្យាថា នឹងខិតខំសហការអោយបានល្អជាមួយក្រុមហ៊ុនទទួលសាងសង់ ក្នុងការដោះស្រាយផលប៉ះពាល់ និងសន្យាថា មិនបង្កជាឧបសគ្គដល់ផែនការសាងសង់ផ្លូវនេះឡើយ ។

ឯកឧត្តមបណ្ឌិត ក៏បានថ្លែងអំណរគុណចំពោះអាជ្ញាធរ និងប្រជាពលរដ្ឋ ដែលបានយោគយល់ ចំពោះផលប៉ះពាល់ខ្លះៗដូចជាការហុយធូលី និងរអិលជាយថាហេតុ ពេលក្រុមហ៊ុនស្រោចទឹកលើផ្លូវការពារកុំអោយហុយជាដើម ។

ជាមួយគ្នានោះដែរ ឯកឧត្តមបណ្ឌិត ក៏បានណែនាំអោយក្រុមហ៊ុនសាងសង់យកចិត្តទុកដាក់ខ្ពស់លើគុណភាព និងពន្លឿនការសាងសង់អោយបានលឿនតាមដែលអាចធ្វើទៅបាន ។ ឯកឧត្តមបណ្ឌិត ក៏បានថ្លែងអំណរគុណចំពោះក្រុមហ៊ុនសាងសង់ ដែលបានជួយបំពាក់អំពូលភ្លើងសូឡានៅតាមលូ និងស្ពាន និងបានជួយបន្ថែមបង្គោលសុវត្ថិភាពចរាចរណ៍ និងចំណាំងផ្លាតត្រង់ផ្លូវកោង ដើម្បីធានានូវសុវត្ថិភាពបើកបរ និងចូលរួមកាត់បន្ថយអត្រាមរណភាពដោយគ្រោះថ្នាក់ចរាចរណ៍ផងដែរ ។