វគ្គហ្វឹកហ្វឺនបំប៉ន ពង្រឹងវរសេនាតូច បានបិទបញ្ចប់ក្រោមអធិបតីភាព មេបញ្ជាការរងកងតូចថ្មើរជើងលេខ២១
ភ្នំពេញ៖ នៅទីបញ្ជាការវរសេនាតូចថ្មើរជើងលេខ២១៤ បានប្រារព្ធពិធីបិទវគ្គហ្វឹកហ្វឺនបំប៉នពង្រឹងវរសេនាតូច ក្រោមអធិបតីភាព ឧត្តមសេនីយ៍ត្រី សេង សុផាត មេបញ្ជាការរងកងតូចថ្មើរជើងលេខ២១ តំណាងដ៏ខ្ពង់ខ្ពស់ នៃឯកឧត្តម ឧត្តមសេនីយ៍ទោ អ៊ិន ស៊ីដារ៉ា មេបញ្ជាការកងពល បានអញ្ជើញជាគណអធិបតី ក្នុងពិធីបិទវគ្គហ្វឹកហ្វឺនបំប៉នពង្រឹងវរសេនាតូច។
លោកវរសេនីយ៍ទោ ពេជ្រ ហុង មេបញ្ជាការវរសេនាតូចថ្មើរជើងលេខ២១៤បានឡើងអានរបាយការណ៍ហ្វឹកហ្វឺនបញ្ជាក់ពីលទ្ធផលដែលសម្រេចបានមាន សិក្ខាកាមចំនួន១០០នាក់ គ្រូ១០នាក់។ ក្រោយពីបានហ្វឹកហាត់ទាំងទ្រឹស្តី និងការអនុវត្តជាក់ស្តែងអស់រយៈពេល៣៥ថ្ងៃ សិក្ខាកាមទាំងអស់ទទួលបាននិន្ទេសល្អ ១១នាក់ បង្គួរ៥៨នាក់ និងមធ្យម៣១នាក់។
ឧត្តមសេនីយ៍ត្រី សេង សុផាត មេបញ្ជាការរងកងតូចថ្មើរជើងលេខ២១ បានប្រគល់ប័ណ្ណសរសើរចំនួន៥នាក់ និងលិខិតសរសើរចំនួន១០នាក់ ។
ឧត្តមសេនីយ៍ត្រី សេង សុផាត បានសម្តែងនូវការកោត សរសើរ និងវាយតម្លៃខ្ពស់ ចំពោះការយកចិត្តទុកដាក់ខិតខំប្រឹងប្រែង ហ្វឹកហាត់ រៀនសូត្រ របស់សិក្ខាកាមទាំងអស់ ។លោកបានបន្តក៏បានឲ្យដឹង ទៀតថាការហ្វឹកហ្វឺនកន្លងមកនេះ គឺជាការឆ្លើយតបដ៏សមស្របទាន់ពេលវេលាទៅនឹងគោល នយោបាយ របស់រាជរដ្ឋាភិបាល ក្នុងការកសាងធនធានមនុស្ស ប្រកបដោយសមត្ថភាព គុណភាពខ្ពស់ ដើម្បីបំពេញភារកិច្ច បំរើជាតិ មាតុភូមិរបស់យើង ជាពិសេស ការពារបាននូវច្បាប់រដ្ឋធម្មនុញ្ញ ការពារព្រះមហាក្សត្រ និងការពាររាជរដ្ឋាភិបាលស្របច្បាប់អោយបានដាច់ខាត៕
