ប្រេសិតពិសេសប្រធានអាស៊ាន៖ ខ្ញុំសង្ឃឹមថានឹងត្រលប់មកវិញក្នុងពេលឆាប់ៗ ហើយបន្តបេសកកម្មនេះដើម្បីប្រទេស និងប្រជាជនមីយ៉ាន់ម៉ា
ភ្នំពេញ៖ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសកម្ពុជា និងជាប្រេសិតពិសេស របស់ប្រធានអាស៊ានស្ដីពីមីយ៉ាន់ម៉ា បានថ្លែងដោយសង្ឃឹមថា ឯកឧត្តមនឹងត្រលប់បំពេញទស្សនកិច្ច នៅមីយ៉ាន់ម៉ាវិញក្នុងពេលឆាប់ៗ ហើយបន្តបេសកកម្មដើម្បីប្រទេស និងប្រជាជនមីយ៉ាន់ម៉ា ។
តាមរយៈបណ្ដាញសង្គមហ្វេសប៊ុក នៅថ្ងៃទី៥ កក្កដា ឯកឧត្តមឧបនាយករដ្ឋមន្ត្រី ប្រាក់ សុខុន បានលើកឡើងថា ឯកឧត្តម បានបញ្ចប់បេសកកម្មនៅមីយ៉ាន់ម៉ាលើកនេះ ដែលប្រើពេលប្រាំមួយយប់ ប្រាំពីរថ្ងៃ និងប្រាំបីជើងហោះហើរ។
ឯកឧត្តមឧបនាយករដ្ឋមន្ត្រី បន្តថា ទស្សនកិច្ចមួយនេះហាក់បីដូចជារាងយូរបន្តិច ប៉ុន្តែមានអត្ថប្រយោជន៍ច្រើនគួរសម ដោយឯកឧត្តម និងគណៈប្រតិភូកម្ពុជាមានឱកាសបានរៀនសូត្រ និងស្វែងយល់ពីប្រទេសមីយ៉ាន់ម៉ា ក៏ដូចជាប្រជាជននៅទីនោះបានច្រើនជាងការរំពឹងទុក។
ឯកឧត្តម បន្ថែមថា បាហ្កាន ដែលជាទីក្រុងដ៏អស្ចារ្យមួយពោរពេញទៅដោយប្រវត្តិសាស្រ្ត និងវប្បធម៌ដ៏សម្បូរបែប គឺជាទីកន្លែងបេសកកម្មចុងក្រោយរបស់ពួកយើងមុនពេលធ្វើមាតុភូមិនិវត្តន៍។ ឯកឧត្តមក៏បានថ្លែងអំណរគុណយ៉ាងជ្រាលជ្រៅដល់ភាគីម្ចាស់ផ្ទះ និងអ្នកពាក់ព័ន្ធទាំងអស់សម្រាប់ការបដិសណ្ឋារកិច្ចដ៏កក់ក្តៅ និងអនុស្សាវរីយ៍ថ្មីមួយនេះ ៕
