ក្រសួងអប់រំយុវជន និងកីឡា និងទីភ្នាក់ងារសហប្រតិបត្តិការអន្តរជាតិជប៉ុន (JICA) បានដាក់ឲ្យប្រើប្រាស់កម្មវិធីវិទ្យាសាស្ត្របច្ចេកវិទ្យា វិស្វកម្ម និងគណិតវិទ្យា ហៅកាត់ថា(Think!Think)របស់ជប៉ុន នៅសាលាបឋមសិក្សាវត្តបូព៌ ដើម្បីអភិវឌ្ឍជំនាញការគិត ភាពច្នៃប្រឌិត និងបំណិនទន់របស់សិស្សានុសិស្ស ដែលត្រូវបានគេស្គាល់ថា ជាបំណិនសតវត្សន៍ទី ២១។
លោកស្រី Shiori Tokugawa ជាអ្នកគ្រប់គ្រងផ្នែកវិស័យអប់រំ របស់អង្គការ JICA មានប្រសាសន៍នៅក្នុងពិធីប្រគល់កម្មវិធីនៅសាលារៀនវត្ដបូព៌កាលពីថ្ងៃទី៥ខែកក្កដានេះថា ‘Think! Think!នេះ គឺជាកម្មវិធី Stem ឈានមុខគេពីប្រទេសជប៉ុន ដែលបានទទួលពានរង្វាន់ផ្នែកបច្ចេកវិទ្យាអប់រំ (Edtech) ល្អបំផុតរបស់ប្រទេសជប៉ុន និងពានរង្វាន់ Google លើកម្មវិធីល្អបំផុតសម្រាប់កុមារ។ លោកស្រីបន្ដថា ពួកយើងរីករាយក្នុងការបានដាក់ឲ្យប្រើប្រាស់កម្មវិធីនេះនៅសាលាបឋមសិក្សាវត្តបូព៌ ហើយលោកស្រីសង្ឃឹមថាកម្មវិធីនេះអាចជួយសិស្សឱ្យទទួលបានការអប់រំកាន់តែប្រសើរឡើង។ សាលាបឋមសិក្សាវត្ដបូណ៌នេះ គឺជាសាលាគោលដៅមួយក្នុងចំណោមសាលាគោលដៅចំនួន៩ក្នុង៦ខេត្ត ដែលជាកម្មវិធីកំពុងដំណើរការក្នុងភាពជាដៃគូសាធារណៈឯកជនជាមួយ JICA និង ក្រុមហ៊ុន WonderLab Co., Ltd.។លោកស្រីបន្ថែមថា Think!Think! គឺជាកម្មវិធីសិក្សា STEM ថ្មីមួយ ( STEM ជាពាក្យកាត់មកពីពាក្យពេញដែលមានន័យថា វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា) ពីប្រទេសជប៉ុន ដែលមានបំណងអភិវឌ្ឍជំនាញការគិត ភាពច្នៃប្រឌិត និងបំណិនទន់របស់សិស្ស ដូចជាការលើកទឹកចិត្ត និងការចង់ដឹងចង់ឃើញ ដែលត្រូវបានគេស្គាល់ថាជាបំណិនសតវត្សន៍ទី២១។
លោក សុខ ថា ប្រធាននាយកដ្ឋានបច្ចេកវិទ្យាព័ត៌មាន នៃក្រសួងអប់រំយុវជននិងកីឡា បានថ្លែងថា Think! Think! ដែលជាកម្មវិធីសិក្សាលេខ១ បង្កើតឡើងដោយប្រទេសជប៉ុន មានប្រយោជន៍ជួយដល់កុមារ ឱ្យពូកែខាងគណិតវិទ្យា ជួយឲ្យកុមារចូលចិត្តបច្ចេកវិទ្យា និងជួយឲ្យកុមារកែប្រែឥរិយាបទចូលចិត្តការសិក្សា។លោកបន្តថា Think!Think! គឺជាកម្មវិធីអប់រំដ៏អស្ចារ្យបំផុតមួយដែលជួយដល់ការអភិវឌ្ឍនូវជំនាញនៃការគិតបែបស៊ីជម្រៅ និងជំនាញទន់ផងដែរ វាអាចជួយឲ្យសិស្សានុសិស្ស បានរៀននូវជំនាញថ្មីៗ ដែលជាតម្រូវការចាំបាច់នាពេលអនាគត។កម្មវិធីសិក្សាថ្មីមួយនេះ ត្រូវបានដាក់ឲ្យប្រើប្រាស់ក្នុងសាលាចំនួន៩សាលារៀន រាប់ទាំងសាលាបឋមសិក្សាវត្ដបូព៌នេះ។ ហើយបន្ទាប់ពីនេះក៏រំពឹងផងដែរថាអាចនឹងធ្វើការពង្រីកនូវវិសាលភាពរបស់ខ្លួន ឲ្យក្លាយទៅជាកម្មវិធីសិក្សាថ្នាក់ជាតិ សម្រាប់ជំហានបន្ទាប់»៕
