ក្រសួងបរិស្ថាននិងសហភាពអឺរ៉ុប បង្ហាញឆន្ទៈគាំទ្រដល់ការចូលរួមគ្រប់គ្រង និងកែច្នៃសំរាម សំណល់រឹងទីប្រជុំជននៅក្នុងខេត្តសៀមរាបនិងបន្ទាយមានជ័យ

ភ្នំពេញ៖ ប្រតិភូក្រសួងបរិស្ថាន និងសហភាពអឺរ៉ុបប្រចាំកម្ពុជា EU Cambodia បានវាយតម្លៃខ្ពស់ចំពោះកិច្ចខិតខំប្រឹងប្រែង របស់រដ្ឋបាលខេត្តសៀមរាប និងខេត្តបន្ទាយមានជ័យ លើកការគ្រប់គ្រងសំរាម សំណល់ទីប្រជុំជន។

ប្រតិភូក្រសួងបរិស្ថាន ដឹកនាំដោយឯកឧត្តម សាបូ អូហ្សាណូ រដ្ឋលេខាធិការក្រសួងបរិស្ថាន និងប្រតិភូអឺរ៉ុបដឹកនាំដោយលោក Koen Everaert នៃស្ថានប្រតិភូសហភាពអឺរ៉ុបប្រចាំនៅកម្ពុជា បានធ្វើទស្សនកិច្ចស្វែងយល់ជាក់ស្តែងពីសក្តានុពល និងកាលានុវត្តវិនិយោគលើការគ្រប់គ្រងសំរាមសំណល់រឹងទីប្រជុំជន របស់ក្រុមហ៊ុនGAEA នៅខេត្តសៀមរាប នារសៀលថ្ងៃទី២៦ ខែមករា ឆ្នាំ២០២៦ ភាគីទាំង២។

ក្រោយពីមានបទបង្ហាញពីតំណាងក្រុមហ៊ុន និងកិច្ចពិភាក្សាជាមួយតំណាងពាក់ព័ន្ធ ក្រសួងបរិស្ថាន និងប្រតិភូនៃស្ថានឯកអគ្គរដ្ឋទូតសហភាពអឺរ៉ុបប្រចាំកម្ពុជា បានបង្ហាញពីឆន្ទៈលើកទឹកចិត្តឱ្យរដ្ឋបាលថ្នាក់ក្រោមជាតិបន្តបង្កើនកិច្ចសហការជាមួយក្រុមហ៊ុនប្រមូល និងទុកដាក់សំរាម សំណល់ទីប្រជុំជន ដែលជំរុញឱកាសវិនិយោគដល់វិស័យឯកជន លើការផ្តល់សេវាគ្រប់គ្រងសំរាម សំណល់រឹងទីប្រជុំជន រួមទាំងគម្រោងធ្វើការកែច្នៃសំរាមនៅតាមទីលានជាមួយបច្ចេកវិទ្យាថ្មី និងបំលែងជាថាមពលអគ្គិសនី ឱ្យទៅជាសក្តានុពលសេដ្ឋកិច្ច ដោយមានការចូលរួម និងការគាំទ្រពីក្រសួងបរិស្ថាន ដៃគូអភិវឌ្ឍន៍ ដើម្បីធ្វើឱ្យប្រសើរឡើងអនាម័យបរិស្ថាន លើកកម្ពស់សោភ័ណភាពទីក្រុង ដែលឆ្លើយតបនឹងយុទ្ធសាស្រ្តរបស់រាជរដ្ឋាភិបាល ជាពិសេស ជំរុញប្រសិទ្ធភាពនៃការអនុវត្តយុទ្ធសាស្រ្តចក្រាវិស័យបរិស្ថាន ដែលមានសសរស្តម្ភ៣គឺ ភាពស្អាត ភាពបៃតង និងចីរភាព និងការទាញយកឥណទានកាបូនកាត់បន្ថយការបញ្ជេញឧស្ម័នផ្ទះកញ្ចក់ទៅក្នុងបរិយាកាស៕