ថ្នាក់ដឹកនាំអគ្គលេខាធិការដ្ឋានរដ្ឋសភា ស្នើសាកលវិទ្យាល័យថុងជី ប្រទេសចិន លើកកម្ពស់ការងារស្រាវជ្រាវជាមួយរដ្ឋសភាកម្ពុជា
ភ្នំពេញ៖ នៅរសៀលថ្ងៃទី១៥ ខែមករា ឆ្នាំ២០២៦ ឯកឧត្តមបណ្ឌិត ឈាង វណ្ណារិទ្ធ អគ្គលេខាធិការរង និងជាប្រធានក្រុមទីប្រឹក្សារដ្ឋសភា បានទទួលជួបពិភាក្សាការងារជាមួយ លោក ម៉េង ហុងហួរ (Meng Honghua) ព្រឹទ្ធបុរសមហាវិទ្យាល័យវិទ្យាសាស្រ្តនយោបាយ និងទំនាក់ទំនងអន្តរជាតិ និងជាប្រធានវិទ្យាស្ថានស្រាវជ្រាវយុទ្ធសាស្រ្តចិន នៃសាកលវិទ្យាល័យថុងជី នៅវិមានរដ្ឋសភា។
កិច្ចពិភាក្សានេះបានផ្តោតសំខាន់លើចំណងមិត្តភាពជាប្រពៃណីរវាងប្រជាជននិងប្រជាជន កម្ពុជា-ចិន និងការលើកកម្ពស់ការងារស្រាវជ្រាវរវាងរដ្ឋសភាកម្ពុជា ជាមួុយគ្រឹះស្ថានឧត្តមសិក្សានៃប្រទេសចិន។
ឯកឧត្តមបណ្ឌិត ឈាង វណ្ណារិទ្ធ បានទទួលស្វាគមន៍យ៉ាងកក់ក្តៅចំពោះគណៈប្រតិភូសាកលវិទ្យាល័យថុងជី ដោយបានឆ្លុះបញ្ចាំងពីទំនាក់ទំនងដ៏ជិតស្និទ្ធរវាងប្រទេសទាំងពីរ ជាពិសេសទំនាក់ទំនងរវាងប្រជាជននិងប្រជាជន និងកម្មវិធីផ្លាស់ប្តូរវិស័យសិក្សាស្រាវជ្រាវ។
ឯកឧត្តមបណ្ឌិត បានបង្ហាញក្តីសង្ឃឹមថា ភាគីចិននឹងបន្តលើកកម្ពស់ និងជំរុញបន្ថែមនូវកម្មវិធីផ្លាស់ប្តូរការសិក្សាស្រាវជ្រាវ និងការផ្លាស់ប្តូររវាងប្រជាជននិងប្រជាជន ពីព្រោះទំនាក់ទំនងរវាងប្រទេសទាំងពីរត្រូវបានពង្រឹងដោយយកប្រជាជនជាស្នូល។
លើសពីនេះ ឯកឧត្តមបណ្ឌិត ក៏បានលើកឡើងពីសារៈសំខាន់នៃការពង្រឹងយន្តការពិភាក្សាជាយុទ្ធសាស្ត្ររវាងប្រទេសទាំងពីរ ដើម្បីធ្វើដំណើររួមគ្នាទៅមុខក្នុងអនាគត បញ្ចៀសហានិភ័យផ្សេងៗ និងបង្កើនភាពធន់របស់កម្ពុជា។
ឯកឧត្តមបណ្ឌិត បានបញ្ជាក់ថា «កម្ពុជាមិនចូលរួមក្នុងសម្ព័ន្ធណាមួយទេ ប៉ុន្តែកម្ពុជាផ្តល់អាទិភាពជាចម្បងដល់ផលប្រយោជន៍ជាតិ» កម្ពុជាតែងយកប្រជាជនជាស្នូលក្នុងអភិបាលកិច្ច និងគោលនយោបាយអន្តរជាតិ ហើយកិច្ចសហប្រតិបត្តិការត្រូវបានកំណត់ដោយផលប្រយោជន៍ស្នូលរបស់ជាតិ និងបរិបទជាក់លាក់នៅក្នុងតំបន់ និងអន្តរជាតិ។
លោកព្រឹទ្ធបុរស Meng Honghua បានសង្កត់ធ្ងន់ថា ការកើនឡើងវិញនៃការប្រកួតប្រជែងរវាងអំណាចធំៗ បានបង្កើនតម្រូវការសម្រាប់ការចូលរួមប្រកបដោយទំនួលខុសត្រូវក្នុងតំបន់។ ក្នុងបរិបទនេះ ភាគីចិនបានគូសបញ្ជាក់ពីតួនាទីរបស់ប្រទេសចិន ក្នុងការគាំទ្រស្ថិរភាព និងការអភិវឌ្ឍនៅតំបន់អាស៊ី។
លើសពីនេះទៀត ភាគីចិនបានវាយតម្លៃខ្ពស់លើទំនាក់ទំនង «ដែកថែប» រវាងកម្ពុជា និងចិន ហើយបានបន្តជំរុញឲ្យទំនាក់ទំនងទ្វេភាគីនេះត្រូវបានលើកកម្ពស់ទៅកម្រិតខ្ពស់ជាងមុន។ ភាគីចិនក៏បានបញ្ជាក់ថា កម្ពុជាត្រូវបានចាត់ទុកជាមិត្តពិសេសដ៏សំខាន់មួយរបស់ចិននៅក្នុងតំបន់។
លោកព្រឹទ្ធបុរស បានលើកឡើងថា ដំណើរទស្សនកិច្ចរបស់លោកមានគោលបំណងស្វែងយល់ឲ្យបានកាន់តែច្បាស់អំពីបរិបទបច្ចុប្បន្នរបស់ប្រទេសកម្ពុជាដោយផ្ទាល់ ហើយលោកបានសម្តែងចំណាប់អារម្មណ៍វិជ្ជមានចំពោះកម្ពុជា ទោះបីជាមុននេះ លោកធ្លាប់មានការព្រួយបារម្ភខ្លះៗទាក់ទងនឹងភាពតានតឹងថ្មីៗក៏ដោយ៕
