អភិបាលខេត្តកំពត អញ្ជើញដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្ត ដើម្បីពង្រឹងសន្តិសុខ សណ្តាប់ធ្នាប់ ក្នុងភូមិសាស្ត្រខេត្ត

កំពត៖ នៅព្រឹកថ្ងៃទី១៦ ខែមករា ឆ្នាំ២០២៦ ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត បានអញ្ជើញដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្ត ដើម្បីពង្រឹងសន្តិសុខ សណ្តាប់ធ្នាប់ និងដាក់ចេញទិសដៅការងារសំខាន់ៗក្នុងភូមិសាស្ត្រខេត្ត។

ក្នុងកិច្ចប្រជុំនេះ អង្គប្រជុំបានផ្ដោតការយកចិត្តទុកដាក់ខ្ពស់លើការផ្សព្វផ្សាយ អនុក្រឹត្យលេខ ០៣ អនក្រ.បក ចុះថ្ងៃទី៥ ខែមករា ឆ្នាំ២០២៦ របស់រាជរដ្ឋាភិបាលកម្ពុជា ស្តីពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្តុំ ព្រមទាំងបានស្ដាប់នូវសេចក្តីរាយការណ៍ពីកងកម្លាំងប្រដាប់អាវុធទាំងបីប្រភេទ និងអភិបាលក្រុង-ស្រុក អំពីស្ថានភាពសន្តិសុខ និងបញ្ហាប្រឈមនានានៅតាមមូលដ្ឋាន។

ទន្ទឹមនឹងការងារសន្តិសុខ ឯកឧត្តម អភិបាលខេត្ត ក៏បានលើកយកករណី គ្រូមត្តេយ្យសហគមន៍ មកពិភាក្សាដោះស្រាយបន្ត បន្ទាប់ពី ឯកឧត្តម បានជួបសំណេះសំណាល និងទទួលយកសំណូមពរកាលពីម្សិលមិញ។

ដោយសារករណីខ្លះតម្រូវឱ្យមានការសម្របសម្រួលផ្ទាល់ជាមួយអាជ្ញាធរឃុំ ស្រុក ទើប ឯកឧត្តម បាននាំយកបញ្ហានេះមកដាក់ក្នុងកិច្ចប្រជុំ ដើម្បីស្វែងរកដំណោះស្រាយសមស្រប និងប្រកបដោយប្រសិទ្ធភាព សំដៅលើកកម្ពស់វិស័យអប់រំកុមារតូច និងឆ្លើយតបទៅនឹងតម្រូវការជាក់ស្តែងរបស់បងប្អូនគ្រូបង្រៀន ក៏ដូចជាប្រជាពលរដ្ឋក្នុងខេត្តកំពតទាំងមូល៕