អភិបាលខេត្តតាកែវ៖ សន្តិភាពដែលយើងកំពុងមាននៅពេលនេះ គឺជារតនសម្បត្តិដ៏វិសេស វិសាលបំផុត ដែលមនុស្សគ្រប់រូបមិនត្រូវមើលរំលងឡើយ

តាកែវ៖ ឯកឧត្តម វ៉ី សំណាង អភិបាលខេត្ត នៃគណៈអភិបាលខេត្តតាកែវ បានលើកឡើងថា «សន្តិភាព ដែលយើងកំពុងមាននៅពេលនេះ គឺជារតនសម្បត្តិដ៏វិសេស វិសាលបំផុត ដែលមនុស្សគ្រប់រូបមិនត្រូវមើលរំលងឡើយ»។

ក្នុងឱកាសអញ្ជើញជួបសំណេះសំណាលជាមួយ ក្រុមគ្រួសារវីរៈកងទ័ពភៀសសឹក និងគ្រួសារស៊ីវិលភៀសសឹក កំពុងស្នាក់នៅបណ្ដោះអាសន្ន នៅមូលដ្ឋានស្រុកសំរោង ចំនួន ២៨៧គ្រួសារ នាព្រឹកថ្ងៃពុធ ទី៧ ខែមករា ឆ្នាំ២០២៦ ឯកឧត្តម វ៉ី សំណាង បានមានប្រសាសន៍បន្តទៀតថា ជាធម្មតាមនុស្ស យើងតែងតែមើលរំលងអ្វីដែលមាននៅក្នុងដៃ ប៉ុន្តែនៅពេលដែលអ្វីៗទាំងនោះ ត្រូវបានបាត់បង់ ទើបយើងដឹងថាវាមានតម្លៃ ថាពាក្យ «អរគុណសន្តិភាព» មានតម្លៃមហាសាល។

ឯកឧត្តម អភិបាលខេត្ត បន្តថា ការចុះជួបសំណេះ សំណាលជាមួយបងប្អូននៅក្នុងមូលដ្ឋានស្រុកសំរោង ថ្ងៃនេះ គឺជាការបង្ហាញពីការដឹងគុណ ចំពោះអ្នកដែលបានលះបង់សាច់ស្រស់ឈាមស្រស់ ដើម្បីបញ្ចប់សង្គ្រាម។

ឯកឧត្តម បានចាត់ទុកបងប្អូនអតីតយុទ្ធជនថា ជា «សាក្សីរស់» ដែលដឹងច្បាស់បំផុតពីទុក្ខវេទនានៃភ្លើងសង្គ្រាម និងជាអ្នកដែលយល់ច្បាស់បំផុតពីតម្លៃនៃពាក្យថា «អរគុណសន្តិភាព»។

ឯកឧត្តម វ៉ី សំណាង ក៏បានជំរុញឱ្យអាជ្ញាធរ និងប្រជាពលរដ្ឋទាំងអស់ រួមគ្នារក្សានូវសមិទ្ធផលដែលកើតចេញ ពីសន្តិភាព ព្រោះបើគ្មានសន្តិភាព ក៏គ្មានការអភិវឌ្ឍ សាលារៀន វត្តអារាម និងជីវភាពធូរធារដូចសព្វថ្ងៃនេះដែរ។ សន្តិភាព គឺជាដង្ហើមនៃជីវិត និងជាគ្រឹះនៃក្តីសង្ឃឹម ដូច្នេះយើងទាំងអស់គ្នាមានកាតព្វកិច្ច ថែរក្សាវាឱ្យបានទោះ ក្នុងតម្លៃណាក៏ដោយ៕