សាមគ្គីគ្រួសារខ្មែរ៖ ចុងសប្តាហ៍នេះ មន្រ្តីអគ្គលេខាធិការដ្ឋានរដ្ឋសភា ចំណាយពេលវេលាក្នុងការឈប់សម្រាក ចូលរួមស្មោះស័្មគ្រ វេចខ្ចប់ លើកដាក់អង្ករនិងសម្ភារនានា. បញ្ជួនទៅឧបត្ថម្ភវីរយុទ្ធជន និងពលរដ្ឋដែលបានភៀសសឹក

ភ្នំពេញ៖ នៅថ្ងៃអាទិត្យទី៤ ខែមករាឆ្នាំ២០២៦ ទោះបីជាពេលវេលាចុងសប្តាហ៍និងចំពេលត្រូវឈប់សម្រាកក្នុងឱកាសចូលឆ្នាំសកលយ៉ាងណាក្តី ក៏ថ្នាក់ដឹកនាំនិងមន្រ្តីរាជការនៃអគ្គលេខាធិការដ្ឋានរដ្ឋសភា បានចូលរួមយ៉ាងសកម្ម ស្មោះស្ម័គ្រអស់ចិត្ត នៅក្នុងការវេចខ្ចប់ លើកដាក់អង្ករ សម្ភារប្រើប្រាស់ ព្រមទំាងគ្រឿងឧបភោគ បរិភោគដែលជាអំណោយរបស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បន្តបញ្ជួនទៅឧបត្ថម្ភគំាទ្រជូនវីរយុទ្ធជន នៅក្នុងសមរភូមិមុខនិងពលរដ្ឋដែលបានភៀសសឹក។

ចាប់តាំងពីខែកក្កដាឆ្នាំ២០២៥មក សប្បុរសជននានា ព្រមទំាងមន្រ្តីរាជការនៃអគ្គលេខាធិការដ្ឋានរដ្ឋសភា សមាជិកសមាជិការដ្ឋសភា ទីប្រឹក្សា ជំនួយការសម្តេចប្រធានរដ្ឋសភា បានចូលរួមបរិច្ចាគថវិកា សម្ភារនានា ក៏ដូចជាកម្លំាងកាយចិត្ត តាមរយៈសម្តេចប្រធានរដ្ឋសភា យ៉ាងច្រើនកុះករ ឆ្លើយតបការអំពាវនាវរបស់ប្រមុខរាជរដ្ឋាភិបាល សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងសម្តេចតេជោ ហ៊ុន សែន ប្រធានរដ្ឋសភា ក្នុងស្មារតីសមរភូមិក្រោយនៅជាប់ជានិច្ច និងគំាទ្រយ៉ាងពេញទំហឹង ចំពោះសមរភូមិមុខ នៅក្នុងគ្រាដ៏លំបាក ដែលប្រទេសជាតិត្រូវឆ្លងកាត់ការឈ្លានពាន រំលោភបូរណភាពទឹកដីពីប្រទេសជិតខាង។

មហាសាមគ្គីគ្រួសារខ្មែរ បានរួមគ្នាជាធ្លុងមួយបានផុសឡើងយ៉ាងរឹងមាំ និងខ្លាំងក្លាជាទីបំផុត ដោយមិនប្រកាន់និន្នាការនយោបាយ ទាំងក្នុង និងក្រៅប្រទេស បានឈរយ៉ាងស្វាហាប់ពីក្រោយរាជរដ្ឋាភិបាល និងវីរយុទ្ធជនរបស់យើង។

មន្រ្តីអគ្គលេខាធិការដ្ឋានរដ្ឋសភា អះអាងថា សកម្មភាពមនុស្សធម៌របស់ពួកគាត់ជាមួយមហាគ្រួសារខ្មែរនាពេលនេះ ជាការឆ្លើយតបចំពោះគុណបំបាច់ដ៏ធំធេងរបស់វីរយុទ្ធជននៅក្នុងកិច្ចការពារបូរណភាពទឹកដី យ៉ាងអង់អាចក្លាហាននៅតាមសមរភូមិជួរមុខ។

សម្តេចរដ្ឋសភាធិបតី ឃួន សុដារី ធ្លាប់បានគូសបញ្ជាក់ថាសកម្មភាពមនុស្សធម៌ក្នុងមហាគ្រួសារខ្មែរនាពេលនេះ ជាការចូលរួមចំណែកដ៏បានឆ្លុះបញ្ចាំងអំពីការចូលរួមរបស់ ឯកឧត្តម លោកជំទាវ ឧកញ៉ា លោក និងលោកស្រី ក្នុងស្មារតីសាមគ្គីភាព ស្នេហាជាតិ ក្នុងនាមខ្មែរជួយខ្មែរ នៅគ្រប់កាលៈទេសៈជាមួយរាជរដ្ឋាភិបាល។

សម្តេចប្រធានរដ្ឋសភា បានថ្លែងអំណរគុណជ្រាលជ្រៅ ជូនថ្នាក់ដឹកនាំរដ្ឋសភា សមាជិកសមាជិការដ្ឋសភា និងមន្រ្តីអគ្គលេខាធិការដ្ឋានរដ្ឋសភា និងសប្បុរសជនទំាងអស់ដែលបានចំណាយថវិកា កម្លំាងកាយចិត្ត និងពេលវេលាចូលរួមជាមហាសាមគ្គីខ្មែរនៅក្នុងឱកាសនេះ។ សម្តេចសង្កត់ធ្ងន់ថា សាមគ្គីជាជ័យជម្នះរបស់កម្ពុជា។

សូមជម្រាបថាចំពោះអំណោយសប្បុរសធម៌ របស់សម្តេចប្រធានរដ្ឋសភា ក៏ដូចជាសមាជិកសមាជិករដ្ឋសភា និងអំណោយដែលរដ្ឋសភាទទួលបាន តាមរយៈសម្តេចប្រធានរដ្ឋសភា បានធ្វើការបែងចែកជូនដល់រដ្ឋបាលខេត្តជាប់ព្រំដែនកម្ពុជា-ថៃ មានដូចជាខេត្តព្រះវិហារ ខេត្តឧត្តរមានជ័ន ខេត្តបន្ទាយមានជ័យ ខេត្តបាត់ដំបង ខេត្តពោធិ៍សាត់ ខេត្តកោះកុង សម្រាប់ធ្វើការបែងចែកបន្តជូនវិរកងទ័ពនិងពលរដ្ឋភៀសសឹក។ ក្រៅពីនេះថវិកានិងសម្ភារៈមួយចំនួនទៀត សម្រាប់ចែកជូនវីរយុទ្ធជនដែលសម្រាកព្យាបាលនៅតាមមន្ទីរពេទ្យ និងសម្រាប់ជូនក្រុមគ្រួសារវីរយុទ្ធជន ដែលបានពលីជីវិតជាដើម។

រដ្ឋសភានៅតែបន្តទទួលអំណោយសម្បុរធម៌ហើយធ្វើការបែងចែកអំណោយទាំងអស់នោះតាមគោលដៅតម្រូវការ ធ្វើយ៉ាងណាផ្តល់ភាពកក់ក្តៅ និងផ្សារភ្ជាប់ជានិច្ចរវាងយុទ្ធជនជួរមុខនិងពលរដ្ឋជួរក្រោយ។

ជាមួយគ្នានេះ សម្តេចប្រធានរដ្ឋសភា បានថ្លែងអំណរគុណជូនដល់ប្រជាពលរដ្ឋទំាងអស់ដែលមានការជឿជាក់លើថ្នាក់ដឹកនាំមាន សម្តេចតេជោ ហ៊ុន សែន ប្រធានព្រឹទ្ធសភា សម្តេចបវរធិបតី ហ៊ុន ម៉ាណែត នាយករដ្ឋមន្រ្តី និងថ្នាក់ដឹកនាំកម្ពុជាទាំងអស់ ក្នុងការដោះស្រាយបញ្ហាព្រំដែនជាមួយប្រទេសជិតខាងដោយសន្តិវិធី ប្រើប្រាស់យន្តការអន្តរជាតិនិងយន្តការទ្វេភាគី ខិតខំការពារបូរណភាពទឹកដី មិនឱ្យបាត់មួយមីលីម៉ែត្រនោះឡើយ៕