ឯកឧត្តម កេត សោផាន់ ចូលរួមសន្និបាតសហប្រជាជាតិ ស្តីពីសមុទ្រ ក្រោមប្រធានបទការអភិរក្ស និងការប្រើប្រាស់ធនធានសមុទ្រ-មហាសមុទ្រ

ភ្នំពេញ៖ ឯកឧត្តម កេត សោផាន់ ឯកអគ្គរាជទូតកម្ពុជាប្រចាំប្រទេសបារាំង បានអញ្ជើញចូលរួមសន្និបាត សហប្រជាជាតិស្តីពីសមុទ្រ ក្រោមប្រធានបទ «ការអភិរក្ស និង ការប្រើប្រាស់ ធនធានសមុទ្រ និងមហាសមុទ្រប្រកបដោយនិរន្តភាព សម្រាប់ការអភិវឌ្ឍន៍ប្រកបដោយចីរភាព» នៅរដ្ឋធានីលីសស្បូន(Lisbon) ប្រទេសព័រទុយកាល់។

ឯកឧត្តមបានមានប្រសាសន៍ថ្លែងក្នុងអង្គសន្និបាតថា កម្ពុជាមានប្រជាជនប្រមាណ១០% ដែលរស់នៅតំបន់មាត់សមុទ្រគ្របដណ្តប់លើផ្ទៃដីប្រមាណ ៤០៥គីឡូម៉ែត្រក្រឡា នៃខេត្តជាប់មាត់សមុទ្រចំនួន៤ និងមានកោះប្រមាណជាង ៦០ ដែលកំពុងដើរតួនាទីយ៉ាងសំខាន់សម្រាប់សេដ្ឋកិច្ច មិនត្រឹមតែធានាសន្តិសុខស្បៀងសម្រាប់ផលិតផលជលផល ប៉ុណ្ណោះទេ តែជាតំបន់ដ៏សំខាន់មួយក្នុងការទាក់ទាញវិស័យទេសចរណ៍និង រកប្រាក់ចំណូលជូនសេដ្ឋកិច្ចជាតិផងដែរ។

តំបន់សមុទ្រ និង ដែនសមុទ្រកម្ពុជា ដែលក្នុងនោះរួមមាន ផលិតផលជលផល កំពង់ផែ ការដឹកជញ្ជូនទំនិញ និងវិស័យទេសចរណ៍តាមតំបន់ឆ្នេរ បានរួមចំណែកប្រមាណ១៦%នៃផលិតផលក្នុងស្រុកសរុប(GDP)។ ប្រជាសហគមន៍តាមតំបន់ឆ្នេរកំពុងតែរងគ្រោះដោយសារផលប៉ះពាល់ពីការប្រែប្រួលអាកាសធាតុ ជាពិសេសការកើនឡើងនៃកំពស់ទឹកសមុទ្រ និង ការជ្រៀតចូលទឹកប្រៃ ទៅក្នុងអាងទឹកសាប ដែលអាចនាំឱ្យខូចគុណភាពទឹកក្រោមដី រួមទាំងប្រភពទឹកផឹក និងផលវិបាកផ្សេងៗទៀត ដែលកំពុងតែគំរាមកំហែងជីវភាពរបស់ពួកគាត់ និង វិស័យកសិកម្ម។

តាមរយៈនេះរាជរដ្ឋាភិបាលកម្ពុជា ក្នុងនោះក្រសួងបរិស្ថាន បានរៀបចំនូវយន្តការផ្នែកច្បាប់ និងយន្តការបច្ចេកទេស ដូចជា ក្របខណ្ឌគោលនយោបាយអភិវឌ្ឍន៍ដោយចីរភាព សេចក្តី្រពាងក្រមបរិស្ថាន និង ធនធានធម្មជាតិ ដោយធ្វើបច្ចុប្បន្នភាពកាន់តែល្អប្រសើរនូវ កិច្ចគាំពារបរិស្ថាន និងការអភិរក្សជីវចម្រុះតំបន់មាត់សមុទ្រ ផែនការជាតិបន្ស៊ាំនឹងការប្រែប្រួលអាកាសធាតុ និងការលើកកម្ពស់ជីវភាពប្រជាសហគមន៍តាមរយៈទេសចរណ៍ផ្សារភ្ជាប់ទឹកដីជាដើម។

សន្និបាតនេះមានរយៈពេល ៥ថ្ងៃ ចាប់ផ្តើមពីថ្ងៃទី២៧ ខែមិថុនា ដល់ថ្ងៃទី១ ខែកក្កដា ឆ្នាំ២០២២ ៕