ក្រុមក្រឡាហោមមនុស្សធម៌ នាំយកអំណោយសម្តេចក្រឡាហោម ស ខេង  និងលោកជំទាវ ជូនដល់រដ្ឋបាលខេត្តសៀមរាប និងខេត្តព្រះវិហារ

ភ្នំពេញ៖ ប្រតិបត្តិតាមអនុសាសន៍ណែនាំដ៏ខ្ពង់ខ្ពស់ពី សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ និងជាតំណាងរាស្រ្តមណ្ឌលបាត់ដំបង នៅថ្ងៃទី១៥ ខែធ្នូ ឆ្នាំ២០២៥ ក្រុមក្រឡាហោមមនុស្សធម៌ ដឹកនាំដោយឯកឧត្តម ច័ន្ទ សុផល តំណាងរាស្រ្តមណ្ឌលខេត្តបាត់ដំបង និងជាអនុប្រធានគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន នៃរដ្ឋសភា (គណ:កម្មការទី៤) និងឯកឧត្តម ខាន់ ម៉ាណេរ រដ្ឋលេខាធិការក្រសួងសាធារណការ និងដឹកជញ្ជូន បាននាំយកអំណោយសម្តេចក្រឡាហោម ស ខេង  និងលោកជំទាវ រួមមាន៖ អង្ករ១០តោន មី២០០
កេស កន្សែងពោះគោ២០០ អំបុក៤០០ថង់ ទឹកបរិសុទ្ធ១០០កេសធំ និងនំក្រៀម១០កេសធំ ម៉ាសការពារផ្សែងពុល១០០ប្រអប់ និងសម្ភារៈមួយចំនួនទៀត ចូលរួមចំណែកជាមួយរដ្ឋបាលខេត្តសៀមរាប និងខេត្តព្រះវិហារ ដើម្បីយកទៅចែកជូនជនភៀសសឹក និងវីរៈកងទ័ពជួរមុខ។

ក្នុងឱកាសនោះ ឯកឧត្តម ច័ន្ទ សុផល និងឯកឧត្តម ខាន់ ម៉ាណេរ បាននាំនូវការផ្ដាំផ្ញើសាកសួរសុខទុក្ខពីសំណាក់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា សម្តេចក្រឡាហោម ស ខេង និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ព្រមទាំងឯកឧត្តមអភិសន្តិបណ្ឌិត ស សុខា បានថ្លែងនូវការកោតសរសើរដល់រដ្ឋបាលខេត្តទាំងពីរ ដែលជានិច្ចជាកាលបានយកចិត្តទុកដាក់ផ្គត់ផ្គង់ដល់សមរភូមិមុខ និងបានរៀបចំកន្លែងសុវត្ថិភាព ជូនបងប្អូនជាជនភៀសសឹក ព្រមទាំងផ្គត់ផ្គង់តម្រូវការគ្រប់បែបយ៉ាងជូនពួកគាត់។

បន្ថែមលើនេះ សម្តេចក្រឡាហោម និងឯកឧត្តមអភិសន្តិបណ្ឌិត បានផ្តាំផ្ញើបន្ថែមឱ្យបន្តយកចិត្តទុកដាក់លើសុវត្តិភាពក្នុងការរស់នៅ អនាម័យ ផ្គត់ផ្គង់ម្ហូបអាហារ ទឹកភ្លើង ឱ្យបានគ្រប់គ្រាន់ជូនបងប្អូនជនភៀសសឹក៕