សមាជិករដ្ឋសភា-ព្រឹទ្ធសភា នាំយកជំនួយសម្ភារៈនិងថវិកា គាំទ្រកងទ័ពនិង ជនភៀសសឹកនៅខេត្តព្រះវិហារ

ព្រះវិហារ៖ ក្នុងអំឡុងពេលដែលព្រះរាជាណាចក្រកម្ពុជា កំពុងប្រឈមមុខនឹងសង្គ្រាមឈ្លានពាន ដ៏ធ្ងន់ធ្ងរ បំពានច្បាប់អន្តរជាតិ ដោយបានរំលោភលើដែនអធិបតេយ្យភាពជាតិកម្ពុជាពីសំណាក់ប្រទេសថៃ ថ្នាក់ដឹកនាំរដ្ឋសភានិងព្រឹទ្ធសភា ដែលជាស្ថាប័ននីតិប្បញ្ញត្តិកំពូលរបស់ជាតិ បានធ្វើសកម្មភាពយ៉ាងផុសផុលជាច្រើនក្នុងការ ប្រកៀកស្មាជាធ្លុងមួយ ជាមួយរាជរដ្ឋាភិបាល ក្រោមម្លប់ដ៏ត្រជាក់នៃអង្គព្រះមហាក្សត្រ ដើម្បីគាំទ្រ សម្រាល ការលំបាករបស់ប្រជាជន និងលើកទឹកចិត្តដល់កងទ័ពជួរមុខក្នុងការការពារអធិបតេយ្យភាពជាតិ។

នៅថ្ងៃទី១៤ ខែធ្នូឆ្នាំ២០២៥ ឯកឧត្តម មាស សុភា ជាឧត្តមប្រឹក្សាផ្ទាល់ព្រះមហាក្សត្រ និងជាតំណាងរាស្រ្តមណ្ឌលខេត្តព្រះវិហារ ចូលរួមដោយ ឯកឧត្តម យស ផានីត្តា ប្រធានគណៈកម្មការសេដ្ឋកិច្ច ហិរញ្ញវត្ថុ និងសវនកម្ម (គណៈកម្មការទី ២) នៃព្រឹទ្ធសភា បាននាំអោយ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា និងសម្ភារៈវិជ្ជសាស្រ្ត មួយចំនួនទៀត ប្រគល់ជូន ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ សម្រាប់ចែកជូនបន្តដល់វីរៈកងព័ទនិងពលរដ្ឋភៀសសឹកក្នុងខេត្ត។

អំណោយប្រតិភូសភាប្រគល់ជូនរដ្ឋបាលខេត្តព្រះវិហារនៅក្នុងឱកាសនោះ មានអំណោយរបស់ សម្តេចរដ្ឋសភាធិបតី ឃួន សុដារី ប្រធានរដ្ឋសភា មានថវិកានិងសម្ភារៈ គ្រឿងឧបភោគបរិភោគ សរុបថវិកា ចំនួន៥០លានរៀល ព្រមទាំង ជំនួយផ្នែកសុខាភិបាលនិងសម្ភារៈជាច្រើនទៀត របស់ ឯកឧត្តម យស ផានីត្តា និង លោកជំទាវ ឡោក ខេង ប្រធានគណៈកម្មកាទី៨រដ្ឋសភា និងម៉ាសការពារផ្សេងពុលដែលជាអំណោយរបស់ ឯកឧត្តម កែប ជុតិមា ប្រធានគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន នៃរដ្ឋសភា ផងដែរ។

សកម្មភាពមនុស្សធម៌របស់ថ្នាក់ដឹកនាំជាន់ខ្ពស់រដ្ឋសភា និងព្រឹទ្ធសភានេះ ត្រូវបានអនុវត្តក្រោមការអំពាវនាវរបស់នាយឧត្តមសេនីយ៍ផ្កាយមាស ៥ ផុតលេខ ហ៊ុន សែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្នុងគោលដៅការពារបូរណភាពទឹកដី និងអាយុជីវិតរបស់ប្រជាជនស៊ីវិលពីការធ្វើសង្គ្រាមបំពានច្បាប់អន្តរជាតិរបស់ថៃ។

ជំនួយមនុស្សធម៌ខាងលើ មានសារៈសំខាន់ណាស់ក្នុងការធានាថា កងទ័ពដែលរងរបួស និងជនភៀសសឹកដែលត្រូវការការថែទាំសុខភាពបន្ទាន់ ទទួលបានការព្យាបាលទាន់ពេលវេលា ខណៈដែលការវាយប្រហាររបស់ថៃនៅតែបន្តធ្វើបច្ចុប្បន្ននេះ។

ជារួមសកម្មភាពរួមគ្នានេះរបស់ថ្នាក់ដឹកនាំ សមាជិកសមាជិកាព្រឹទ្ធសភានិងរដ្ឋសភានេះ បានគូសបញ្ជាក់យ៉ាងច្បាស់ពី ភាពរឹងមាំនៃខឿនការពារជាតិ ដោយមានការគាំទ្រជាធ្លុងមួយពីស្ថាប័នកំពូលរបស់ជាតិ ឆ្លុះបញ្ចាំងពីគោលដៅរួម “ធ្វើអ្វីៗគ្រប់យ៉ាងដើម្បីសន្តិភាព និងអាយុជីវិតរបស់ប្រជាពលរដ្ឋកម្ពុជាគ្រប់រូប” ក្នុងស្មារតី “ខ្មែរជួយខ្មែរ”៕