ថ្នាក់ដឹកនាំនិងមន្រ្តីរាជការនៃមន្ទីរសេដ្ឋកិច្ចកំពង់ឆ្នាំងចូលទស្សនាស្វែងយល់ពីសមុច្ច័យក្នុងសារមន្ទីរខេត្តកំពង់ឆ្នាំង

កំពង់ឆ្នាំង៖ នៅរសៀលថ្ងៃទី៣ ខែធ្នូ ឆ្នាំ២០២៥ លោក អ៊ូ ជួបកុសល ប្រធានមន្ទីរសេដ្ឋកិច្ចនិងហិរញ្ញវត្ថុខេត្តកំពង់ឆ្នាំង បានដឹកនាំមន្រ្តីរាជការក្រោមឱវាទ ចូលទស្សនាស្វែងយល់ពីសមុច្ច័យ ដែលបានដាក់តាំងបង្ហាញក្នុងសារមន្ទីរខេត្ត។
លោកប្រធានមន្ទីរសេដ្ឋកិច្ចនិងហិរញ្ញវត្ថុខេត្ត បានថ្លែងកោតសរសើរនូវការខិតខំប្រឹងប្រែងបំពេញការងាររបស់មន្រ្តីរាជការនៃមន្ទីរវប្បធម៌ខេត្ត ក្នុងបេសកកម្មចូលរួមថែរក្សា ការពារនូវវប្បធម៌និងប្រពៃណី អត្តសញ្ញាណរបស់ជាតិ។
លោក ប៊ុនថន សុខាណារិទ្ធ ប្រធានមន្ទីរវប្បធម៌និងវិចិត្រសិល្បៈខេត្ត រួមទាំង លោក លោកស្រីអនុប្រធានមន្ទីរ មន្រ្តីរាជការក្រោមឱវាទបានស្វាគមន៍ចំពោះគណប្រតិភូដែលបានចំណាយពេលវេលាដ៏មានតម្លៃមកស្វែងយល់ពី វត្ថុបុរាណ សិល្បៈ ប្រវត្តិសាស្ត្រ ដែលមានតាំងបង្ហាញនៅសារមន្ទីនេះ។
បន្ទាប់ពីពិធីសំណេះសំណាលខាងលើ ក៏មានការសម្តែងនូវរបាំជូនពរ ដែលសម្តែងដោយសិស្សានុសិស្សបន្តវេនមកពីសាលានានា ក្នុងខេត្ត។
សូមបញ្ជាក់ថា សារមន្ទីរខេត្តកំពង់ឆ្នាំង មានទីតាំងស្ថិតនៅក្នុងភូមិទី១ សង្កាត់ខ្សាម ក្រុងកំពង់ឆ្នាំង ខេត្តកំពង់ឆ្នាំង។ សារមន្ទីរនេះតាំងបង្ហាញនូវវត្ថុបុរាណ សិល្បៈ ប្រវត្តិសាស្ត្ររបស់ខេត្តកំពង់ឆ្នាំង រួមមាន ប្រតិមា កុលាលភាជន៍ (ឆ្នាំងដី) និងសមុច្ច័យធ្វើអំពីលោហៈផ្សេងៗ ដែលជាស្នាដៃរបស់បុព្វបុរសខ្មែរ ដើម្បីឱ្យភ្ញៀវជាតិ និងអន្តរជាតិបានស្គាល់អំពីអរិយធម៌ និងវប្បធម៌ដ៏មានតម្លៃ។ សារមន្ទីរនេះបើកទទួលភ្ញៀវជាតិ និងអន្តរជាតិជារៀងរាល់ថ្ងៃ ក្នុងពេលម៉ោងធ្វើការ (ជាទូទៅពេលព្រឹក និងពេលរសៀល)៕ កិច្ចការពារបេតិកភណ្ឌវប្បធម៌ ជាភារកិច្ចរបស់កូនខ្មែរគ្រប់ៗរូប !