រដ្ឋធានីហ្សាការតា បានវ៉ាដាច់រាជធានីតូក្យូ ក្លាយជារដ្ឋធានីដែលមានប្រជាជនរស់នៅច្រើនជាងគេបំផុតរបស់ពិភពលោក

បរទេស៖ យោងតាមរបាយការណ៍ទស្សនវិស័យនគរូបនីយកម្មពិភពលោកឆ្នាំ២០២៥ របស់អង្គការសហប្រជាជាតិ រដ្ឋធានីហ្សាការតា បានវ៉ាដាច់រាជធានីតូក្យូ ក្លាយជារដ្ឋធានីដែលមានប្រជាជនរស់នៅច្រើនជាងគេបំផុតរបស់ពិភពលោក ដោយបច្ចុប្បន្នមានប្រជាជនរស់នៅជិត៤២លាននាក់។

ការផ្លាស់ប្ដូរនេះ គឺជាពេលវេលាប្រវត្តិសាស្ត្រមួយនៅក្នុងឋានានុក្រមទីក្រុងសកល និងគូសបញ្ជាក់ពីរបៀបដែលទីក្រុងនានានៅអាស៊ី កំពុងពង្រីកយ៉ាងឆាប់រហ័ស។ តួលេខចុងក្រោយបំផុតរបស់អង្គការសហប្រជាជាតិបង្ហាញថា នៅឆ្នាំ២០២៥ រដ្ឋធានី និងរាជធានីនានា មានប្រជាជនរស់នៅ៤៥ភាគរយនៃប្រជាជន៨,២ពាន់លាននាក់របស់ពិភពលោក ច្រើនជាងទ្វេដងនៃចំណែក២០ភាគរយក្នុងឆ្នាំ១៩៥០។ ទីប្រជុំជនមានចំនួន៣៦ភាគរយទៀត ខណៈតំបន់ជនបទឥឡូវនេះ មានប្រជាជនរស់នៅត្រឹមតែ១៩ភាគរយនៃចំនួនប្រជាជនពិភពលោក។

រដ្ឋធានីហ្សាកាតាឈរនៅលំដាប់កំពូលនៃបញ្ជីទីក្រុងធំៗរបស់ពិភពលោក បន្ទាប់មក គឺរដ្ឋធានីដាកានៅប្រទេសបង់ក្លាដែស មានប្រជាជនរស់នៅប្រហែល៣៧លាននាក់ និងរាជធានីតូក្យូនៅប្រទេសជប៉ុន មានប្រជាជនរស់នៅ៣៣លាននាក់ ធ្វើឱ្យតូក្យូដែលធ្លាប់ជារាជធានីលេខមួយជាយូរមកហើយ ធ្លាក់ចុះមកចំណាត់ថ្នាក់ទីបី។ របាយការណ៍នេះបង្ហាញពីរបៀបដែលផែនទីទីក្រុងត្រូវបានគូរឡើងវិញយ៉ាងខ្លាំង ក្នុងរយៈពេលកន្លះសតវត្សរ៍ចុងក្រោយនេះ។ ចំនួនទីក្រុងធំៗ ដែលមានប្រជាជនរស់នៅ១០លាននាក់ ឬច្រើនជាងនេះ បានកើនឡើងបួនដង ដោយកើនពី៨នៅឆ្នាំ១៩៧៥ ដល់៣៣នៅឆ្នាំ ២០២៥ ក្នុងនោះ១៩ទីក្រុងស្ថិតនៅក្នុងទ្វីបអាស៊ី។ នៅឆ្នាំ២០៥០ ចំនួនសរុបនោះត្រូវបានគេព្យាករថា នឹងឡើងដល់៣៧ ខណៈទីក្រុងដូចជា Addis Ababa, Dar es Salaam, Hajipur និងរាជធានីគូឡាឡាំពួរ លើសពីកម្រិត១០លាននាក់។

អង្គការសហប្រជាជាតិកត់សម្គាល់ថា ពីរភាគបីនៃកំណើនប្រជាជនពិភពលោក ចាប់ពីពេលនេះដល់ឆ្នាំ២០៥០ នឹងកើតឡើងនៅក្នុងទីក្រុង ខណៈចំនួនប្រជាជននៅជនបទត្រូវបានគេរំពឹងថា នឹងឡើងដល់កំពូលនៅទសវត្សរ៍ឆ្នាំ២០៤០ ហើយបន្ទាប់មកធ្លាក់ចុះ។ ដោយក្រឡេកមើលទៅអនាគត តុល្យភាពក្នុងចំណោមទីក្រុងធំៗនឹងបន្តផ្លាស់ប្ដូរ។ ទីក្រុងដាកា និងសៀងហៃ ត្រូវបានគេរំពឹងថា នឹងស្ថិតក្នុងចំណោមទីក្រុងធំៗមានការរីកចម្រើនលឿនបំផុត ដោយមានអត្រាកំណើនជិត៥ភាគរយក្នុងមួយឆ្នាំ រវាងឆ្នាំ២០២៥ និង២០៥០។ នៅពាក់កណ្តាលសតវត្សរ៍នេះ រដ្ឋធានីដាកាត្រូវបានគេព្យាករថា នឹងក្លាយជាទីក្រុងធំជាងគេបំផុតរបស់ពិភពលោក ដោយមានប្រជាជនប្រហែល៥២,១លាននាក់ នាំមុខរដ្ឋធានីហ្សាការតា ដែលមានប្រជាជន៥១,៨លាននាក់ ខណៈចំនួនប្រជាជនរាជធានីតូក្យូ ត្រូវបានគេព្យាករថានឹងថយចុះមកត្រឹមប្រហែល៣០,៧លាននាក់ និងធ្លាក់ចុះមកត្រឹមចំណាត់ថ្នាក់ទីប្រាំពីរនៅក្នុងចំណាត់ថ្នាក់ពិភពលោក។

ការផ្លាស់ប្ដូរប្រជាសាស្ត្រកំពុងកើតឡើង ខណៈប្រទេសឥណ្ឌូណេស៊ី ដែលឥឡូវនេះមានប្រជាជនប្រហែល២៨៦លាននាក់ និងជាប់ចំណាត់ថ្នាក់ជាប្រទេសដែលមានប្រជាជនច្រើនជាងគេលំដាប់ទីបួននៅលើពិភពលោក កំពុងរៀបចំផ្លាស់ប្ដូររដ្ឋធានីរបស់ខ្លួនពីរដ្ឋធានីហ្សាការតាទៅកាន់ទីក្រុងនូសាន់តារ៉ា ដែលទើបសាងសង់ថ្មីនៅលើកោះ Borneo៕