នាយករដ្ឋមន្ត្រីតៃវ៉ាន់ថា «គ្មានព័ត៌មាន» អំពីកិច្ចសហប្រតិបត្តិការណាមួយជាមួយកូរ៉េខាងត្បូងទាក់ទងនឹងបញ្ហាពន្ធលើបន្ទះឈីបរបស់សហរដ្ឋអាមេរិកនោះទេ

បរទេស៖ បើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី២៥ ខែវិច្ឆិកា ឆ្នាំ២០២៥ លោក Cho Jung-tai នាយករដ្ឋមន្ត្រីតៃវ៉ាន់បានថ្លែងនៅថ្ងៃអង្គារនេះថា រដ្ឋាភិបាលរបស់លោក «គ្មានព័ត៌មាន» អំពីកិច្ចសហប្រតិបត្តិការណាមួយជាមួយកូរ៉េខាងត្បូងទាក់ទងនឹងបញ្ហាពន្ធលើបន្ទះឈីបរបស់សហរដ្ឋអាមេរិកនោះទេ។

សេចក្តីថ្លែងការណ៍នេះធ្វើឡើងបន្ទាប់ពីរដ្ឋមន្ត្រីពាណិជ្ជកម្មកូរ៉េខាងត្បូងបានលើកឡើងនៅថ្ងៃចន្ទថា អាចមានលទ្ធភាពនៃកិច្ចសហប្រតិបត្តិការលើបញ្ហាពន្ធនេះ។ ទោះជាយ៉ាងណាក៏ដោយ លោក Cho បានសង្កត់ធ្ងន់ថា បច្ចុប្បន្ន តៃវ៉ាន់កំពុងធ្វើការចរចា មួយទល់មួយ តែជាមួយសហរដ្ឋអាមេរិកប៉ុណ្ណោះ។

លោក Cho បានប្រាប់សមាជិកសភានៅក្នុងសភាទីក្រុងតៃប៉ិថា៖ «មិនមានព័ត៌មានបែបនេះទេ (អំពីកិច្ចសហប្រតិបត្តិការជាមួយកូរ៉េខាងត្បូង) ប៉ុន្តែយើងបានកត់សម្គាល់ព័ត៌មានបែបនេះហើយ»។

លោកបានបន្ថែមថា គោលដៅចម្បងរបស់តៃវ៉ាន់គឺការចរចាជាមួយអាមេរិក ដើម្បីកាត់បន្ថយពន្ធបច្ចុប្បន្ន ២០% លើការនាំចេញទំនិញទូទៅរបស់ខ្លួន (ទោះបីជាពន្ធនេះមិនរួមបញ្ចូលបន្ទះឈីបក៏ដោយ)។ ទន្ទឹមគ្នានេះ តៃវ៉ាន់ក៏ចង់ពង្រឹងកិច្ចសហប្រតិបត្តិការជាមួយប្រទេសនានាដែលជាកត្តាបំពេញបន្ថែមនៅក្នុងខ្សែសង្វាក់ផ្គត់ផ្គង់ឧស្សាហកម្មរបស់ខ្លួនផងដែរ។

គួរជម្រាបថា ក្នុងនាមជាមហាអំណាចបន្ទះឈីប ដែលមានក្រុមហ៊ុនយក្ស TSMC តៃវ៉ាន់បានកត់សម្គាល់ពីការប្រកួតប្រជែង «មានលក្ខណៈល្អ» រវាងខ្លួន និងកូរ៉េខាងត្បូង ដែលមានក្រុមហ៊ុន Samsung Electronics និង SK Hynix នៅក្នុងវិស័យបច្ចេកវិទ្យាជឿនលឿននេះ។ តាមរយៈការបញ្ជាក់ថា «គ្មានព័ត៌មាន» អំពីកិច្ចសហប្រតិបត្តិការរួមជាមួយកូរ៉េខាងត្បូង លោក Cho កំពុងបង្ហាញថា តៃវ៉ាន់ផ្តោតលើយុទ្ធសាស្ត្រចរចាដោយឯកតោភាគីរបស់ខ្លួនជាមួយសហរដ្ឋអាមេរិក៕