ក្រុមប្រឹក្សាខេត្តកំពង់ស្ពឺ បើកវេទិកាផ្សព្វផ្សាយ និងពិគ្រោះយោបល់ លើកទី២ នៅស្រុកសំរោងទង ដើម្បីទទួលយកសំណូមពរ បញ្ហាប្រឈម និងក្តីកង្វល់ពលរដ្ឋ

កំពង់ស្ពឺ៖ ដើម្បីឆ្លើយតបចំពោះគោលបំណង និងសំណូមពររបស់ប្រជាពលរដ្ឋនៅមូលដ្ឋាន ក្រុមប្រឹក្សាខេត្តកំពង់ស្ពឺ បានបើកវេទិកាផ្សព្វផ្សាយ និងពិគ្រោះយោបល់ ជាលើកទី២ សម្រាប់អាណត្តិទី៤ ឆ្នាំ២០២៥ ក្នុងស្រុកសំរោងទង ដែលវេទិកានេះធ្វើឡើងក្រោមវត្តមាន ឯកឧត្តម យឹម សុខុម ប្រធានក្រុមប្រឹក្សាខេត្ត និងឯកឧត្តមបណ្ឌិត ជាម ចន្ទ័សោភ័ណ អភិបាលខេត្តកំពង់ស្ពឺ នៅថ្ងៃទី២៥ ខែវិច្ឆិកា ឆ្នាំ២០២៥ នាសាលាស្រុកសំរោងទង។

ឯកឧត្តម យឹម សុខុម បានលើកឡើងថា វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត គឺជាឧបករណ៍ដ៏មានសារៈសំខាន់មួយសម្រាប់លើកកម្ពស់គណនេយ្យភាព តម្លាភាព និងការចូលរួមរបស់ប្រជាពលរដ្ឋទាំងអស់ ក្នុងកិច្ចដំណើរការអភិបាលកិច្ចរបស់ក្រុមប្រឹក្សានៃរដ្ឋបាលថ្នាក់ក្រោមជាតិ ព្រមទាំងផ្តល់ឱកាស ក្នុងការពិភាក្សាប្រកបដោយតម្លាភាពគ្រប់ជ្រុងជ្រោយ ការទទួលបាននូវពហុគំនិតពីរដ្ឋបាលថ្នាក់ក្រោមជាតិ សង្គមស៊ីវិល សាធារណជននានាដែលអាចទទួលបាននូវការផ្ទៀងផ្ទាត់ប្រកបដោយសុច្ចរិតភាព និងយុត្តិធម៌ក្នុងសង្គមកាន់តែល្អប្រសើរឡើង។

ជាមួយនឹងការបញ្ចេញមតិយោបល់ជា សំណួរ ឬសំណូមពរររបស់ប្រជាពលរដ្ឋ, ប្រធានក្រុមប្រឹក្សាខេត្តកំពង់ស្ពឺ ឯកឧត្តម យឹម សុខុម ក៏បានបញ្ជាក់ដោយប្តេជ្ញាចិត្តថា នឹងរួមគ្នាយ៉ាងម៉ឺងម៉ាត់ដោយស្មារតីទទួលខុសត្រូវខ្ពស់ ក្នុងការដោះស្រាយនូវរាល់សំណើរ សំណូមពររបស់ប្រជាពលរដ្ឋ សំដៅលើកកម្ពស់ប្រសិទ្ធភាព នៃគោលនយោបាយកំណែទម្រង់ស៊ីជម្រៅរបស់រាជរដ្ឋាភិបាល អាណត្តិទី៧ និងដើម្បីធានាចីរភាពក្នុងកិច្ចអភិវឌ្ឍន៍ ពង្រឹងសន្តិភាព ស្ថេរភាពសង្គម សេដ្ឋកិច្ច សង្គមកិច្ច ជំរុញ និងលើកកម្ពស់ការផ្តល់សេវាសាធារណៈ បម្រើប្រជាពលរដ្ឋដោយភាពស្មោះត្រង់ ប្រកបដោយសមធម៌ គុណធម៌ ក្នុងគោលដៅដើម្បីសេចក្តីសុខ សុភមង្គ និងផលប្រយោជន៍ពិតប្រាកដរបស់ប្រជាពលរដ្ឋ និងសង្គមជាតិទាំងមូល។

ឆ្លើយតបនឹងក្តីកង្វល់ពីប្រជាពលរដ្ឋដែលថា ស្រុកសំរោងទង មិនមានបរិស្ថានល្អ ពោរពេញ ដោយសំរាម ដីធ្លីមានវិវាទច្រើន សេវាសុខាភិបាលនៅមានកម្រិត ឯកឧត្តមបណ្ឌិត ជាម ចន្ទ័សោភ័ណ អភិបាលខេត្តកំពង់ស្ពឺ បានលើកឡើងថា បច្ចុប្បន្នខេត្តមានការអភិវឌ្ឍន៍ខ្លាំង រោងចក្រសហគ្រាសមានចំនួនជាង១៣០០រោងចក្រ សហគ្រាស កម្មករនិយោជិកមានជាង ៣០ម៉ឺននាក់កំពុងធ្វើការ ដែលធ្វើឱ្យការគ្រប់គ្រងផ្នែកបរិស្ថាននៅមានកម្រិត ថង់ប្លាស្ទិកត្រូវបានហោះហើរពាសវាលពាសកាលពេញផ្លូវ។ ករណីនេះបើគេមើលមួយជ្រុងឃើញថា មានប្រជាពលរដ្ឋមួយចំនួនធំ បានចាប់ផ្តើមចេះសម្អាតអនាម័យ ប្រមូល វេចខ្ចប់ និងទុកដាក់សំរាមបានត្រឹមត្រូវរួចហើយ នៅឡើយតែពលរដ្ឋមួយចំនួនតូចប៉ុណ្ណោះ ដែលនៅមិនទាន់យល់ដឹងពីការទុកដាក់សំរាមឱ្យបានត្រឹមត្រូវ ជាពិសេសគឺបងប្អូនជាកម្មករ កម្មការិនីបានបោះចោលគ្មានសណ្តាប់ធ្នាប់ក្រោយវេចខ្ចប់ និងបរិភោគរួច៕