រាជរដ្ឋាភិបាលសម្រេចផ្តល់គោលការណ៍លើកទឹកចិត្តពិសេសដល់គម្រោងចំនួន១៩បន្ថែមទៀត នៅខេត្តព្រះសីហនុ ក្រោមទុនវិនិយោគ ២៧៦លានដុល្លារ
ភ្នំពេញ៖ រាជរដ្ឋាភិបាលកម្ពុជា បានសម្រេចផ្តល់គោលការណ៍លើកទឹកចិត្តពិសេសដល់គម្រោងចំនួន១៩បន្ថែមទៀត ក្រោមទុនវិនិយោគប៉ាន់ស្មានសរុបចំនួន២៧៦លានដុល្លារអាម៉េរិក។
ឯកឧត្ដម ហ៊ាន សាហ៊ីប ទីប្រឹក្សាសម្តេចនាយករដ្ឋមន្រ្តី និជាប្រធានក្រុមការងារជំរុញការវិនិយោគក្នុងខេត្តព្រះសីហនុ បានបញ្ជាក់កាលពីរសៀលថ្ងៃទី២៤ ខែវិច្ឆិកាថា ក្នុងចំណោមគម្រោងវិនិយោគទាំង១៩ មានគម្រោងថ្មីចំនួន១២ និងគម្រោងអគារកំពុងជាប់គាំងចំនួន៧ ដែលអាចបង្កើតការងារបានប្រមាណ១៨៤៥កន្លែង។
គម្រោងទាំងនេះមានដូចជា៖ គម្រោងសណ្ឋាគារ, អគារពហុមុខងារ, រោងចក្រផលិតឧបករណ៍ជួសជុលរថយន្ត, សិប្បកម្មផលិតក្តារបន្ទះ, រោងច្រកផលិតគ្រឿងសង្ហារឹម, រោងចក្រផលិតដំណាប់ផ្លែឈើ និងកែច្នៃគ្រាប់ធញ្ញជាតិ, និងគម្រោងរោងចក្រផលិតទឹកស្អាត និងផ្គត់ផ្គង់អគ្គិសនី។
កម្មវិធីពិសេសជំរុញការវិនិយោគខេត្តព្រះសីហនុ ត្រូវបានអនុវត្តជាគំរូសម្រាប់ទាក់ទាញ និងថែទាំវិនិយោគ ដើម្បីចូលរួមចំណែកអភិវឌ្ឍខេត្តព្រះសីហនុ ឱ្យក្លាយទៅជាទីតាំងវិនិយោគពហុបំណង។
សូមជម្រាបថា គិតចាប់តាំងពីឆ្នាំ២០២៤ រហូតដល់ខែតុលា ឆ្នាំ២០២៥ រាជរដ្ឋាភិបាលបាន ផ្តល់ការលើកទឹកចិត្តពិសេសជូនគម្រោងវនិយោគចំនួន៣៩២ (អគារជាប់គាំង១៨៦) នៅខេត្តព្រះសីហនុ ដែលមានទុនវិនិយោគប៉ាន់ស្មានសរុប៧៨៧១លានដុល្លារអាម៉េរិក និងអាចបង្កើតការងារជូនប្រជាពលរដ្ឋបាន៥០៦៧០កន្លែង៕
