អ្នកវិទ្យាសាស្ត្ររកឃើញសំបុកពីងពាងដ៏ធំសម្បើមមួយ មានទំហំពាក់កណ្តាលនៃតារាងវាយកូនបាល់ នៅក្នុងរូងភ្នំមួយនៅតាមព្រំដែនរវាងប្រទេសក្រិក និងអាល់បានី

អាថែន៖ បើយោងតាមការចេញផ្សាយរបស់សារព័ត៌មានអន្តរជាតិជាច្រើន បានឱ្យដឹងថា អ្នកវិទ្យាសាស្ត្របានរកឃើញសំបុកពីងពាងដ៏ធំសម្បើមមួយ ដែលមានទំហំប្រហែលពាក់កណ្តាលនៃតារាងវាយកូនបាល់ (tennis court) និងមានសត្វពីងពាងរស់នៅប្រមាណ ១១១,០០០ក្បាល នៅក្នុងរូងភ្នំមួយនៅតាមព្រំដែនរវាងប្រទេសក្រិក និងអាល់បានី។

យោងតាមការសិក្សាមួយដែលចុះផ្សាយក្នុងទស្សនាវដ្តី Subterranean Biology សំបុកពីងពាងនៅក្នុង «រូងស្ពាន់ធ័រ» (Sulfur Cave) នៃតំបន់ Vromoner Gorge នេះ គ្របដណ្តប់លើផ្ទៃដីប្រហែល ១០៦ម៉ែត្រការ៉េ។ ក្នុងនោះមានពីងពាងផ្ទះ (domestic house spiders) ប្រមាណ ៦៩,០០០ក្បាល និងពីងពាងតម្បាញតឿ (dwarf weavers) ជាង ៤២,០០០ក្បាល។

ក្រុមអ្នកស្រាវជ្រាវមកពីសាកលវិទ្យាល័យ និងសារមន្ទីរប្រវត្តិសាស្ត្រធម្មជាតិក្នុងប្រទេសអាល់បានី រ៉ូម៉ានី បែលហ្ស៊ិក អាល្លឺម៉ង់ និងអ៊ីតាលី បានហៅការរកឃើញនេះថាជា «ករណីដំបូងដែលត្រូវបានកត់ត្រាអំពីការបង្កើតសំបុកបែបអាណានិគម» នៃប្រភេទសត្វដែលជាធម្មតារស់នៅតែឯកឯងទាំងពីរប្រភេទនេះ។ អ្នកជំនាញបានពន្យល់ថា រចនាសម្ព័ន្ធដ៏ធំនេះកើតឡើងពី «សំបុកពីងពាងរាងជាបំពង់ផ្សែង (funnel-shaped) រាប់មិនអស់» ដែលតភ្ជាប់គ្នា។

គួរបញ្ជាក់ថា រូងភ្នំនេះត្រូវបានគេហៅថា «រូងស្ពាន់ធ័រ» ដោយសារវាសម្បូរទៅដោយសារធាតុមួយនេះ។ ទីតាំងរបស់វាស្ថិតនៅលើខ្សែបន្ទាត់ព្រំដែនតែម្តង ដោយច្រកចូលស្ថិតនៅប្រទេសក្រិក ប៉ុន្តែផ្នែកខាងក្នុងស្ថិតនៅក្នុងទឹកដីអាល់បានី។ ក្រុមអ្នកស្រាវជ្រាវចាត់ទុកថា សំបុកពីងពាងដ៏ធំនេះមានលក្ខណៈពិសេស និងកម្របំផុត ព្រោះសត្វពីងពាងរាប់សែនក្បាលអាចរស់នៅប្រមូលផ្តុំគ្នាយ៉ាងច្រើន ដោយសារតែមានចំណីអាហារសម្បូរបែបនៅក្នុងរូងភ្នំនោះ៕