រដ្ឋមន្ត្រីការបរទេសរុស្ស៊ី ត្រៀមជួបជាមួយរដ្ឋមន្ត្រីការបរទេសអាមេរិក ប៉ុន្តែផលប្រយោជន៍រុស្ស៊ីត្រូវតែគិតគូរជាមុន ដើម្បីឱ្យមានសន្តិភាពនៅអ៊ុយក្រែន
មូស្គូ៖ បើតាមការចេញផ្សាយ ដោយទីភ្នាក់ងារព័ត៌មាន Reuters រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយថា លោកបានត្រៀមខ្លួនជួបជាមួយរដ្ឋមន្ត្រីការបរទេសអាមេរិក លោក Marco Rubio ប៉ុន្តែផលប្រយោជន៍របស់រុស្ស៊ីត្រូវតែត្រូវបានគិតគូរជាមុន ដើម្បីឱ្យមានសន្តិភាពនៅអ៊ុយក្រែន។
ការលើកឡើងនេះ ធ្វើឡើងបន្ទាប់ពីវិមានក្រឹមឡាំងបានច្រានចោលការសង្ស័យនានាដែលថា លោក Lavrov លែងត្រូវបានពេញចិត្តដូចមុនពីសំណាក់លោក វ៉្លាឌីមៀ ពូទីន បន្ទាប់ពីកិច្ចខិតខំប្រឹងប្រែងរៀបចំជំនួបកំពូលមួយរវាងលោក ពូទីន និងលោក ត្រាំ ត្រូវបានផ្អាកកាលពីខែមុន។
ប្រព័ន្ធផ្សព្វផ្សាយជាច្រើនបានរាយការណ៍ថា ទីក្រុងវ៉ាស៊ីនតោនបានលុបចោលជំនួបកំពូលនោះ បន្ទាប់ពីក្រសួងការបរទេសរុស្ស៊ី បានផ្ញើសារមួយបង្ហាញថា ទីក្រុងមូស្គូមិនបានត្រៀមខ្លួនក្នុងការសម្របសម្រួលពីការទាមទាររបស់ខ្លួនលើអ៊ុយក្រែនឡើយ។
លោក Lavrov បានថ្លែងប្រាប់អ្នកសារព័ត៌មានថា «រដ្ឋមន្ត្រីការបរទេស Marco Rubio និងខ្ញុំយល់ពីភាពចាំបាច់នៃការប្រាស្រ័យទាក់ទងគ្នាជាប្រចាំ…វាសំខាន់សម្រាប់ការពិភាក្សាលើបញ្ហាអ៊ុយក្រែន និងការជំរញរបៀបវារៈទ្វេភាគី»៕
