យោធាអាមេរិក បើកការវាយប្រហារលើទូកដឹកគ្រឿងញៀន១គ្រឿងទៀត នៅតំបន់សមុទ្រ Caribbean ផ្តាច់ជីវិតមនុស្ស៣នាក់

បរទេស៖ បើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃអាទិត្យ ទី២ ខែវិច្ឆិកា ឆ្នាំ២០២៥ រដ្ឋមន្រ្តីការពារជាតិអាមេរិក លោក Pete Hegseth នាថ្ងៃអាទិត្យនេះ បានឱ្យដឹងថា យោធាអាមេរិក បានបើកការវាយប្រហារលើទូកដឹកគ្រឿងញៀន១គ្រឿងទៀត នៅតំបន់សមុទ្រ Caribbean ផ្តាច់ជីវិតមនុស្ស៣នាក់នៅលើនោះ។
សហរដ្ឋអាមេរិក បានចល័តនាវាចម្បាំងនិងយន្តហោះចម្បាំង ទៅកាន់តំបន់ Caribbean ក្រោមយុទ្ធនាការដាក់ពង្រាយយោធា ក្នុងទ្រង់ទ្រាយធំ ដែលទីក្រុងវ៉ាស៉ីនតោនអះអាងថា មានគោលដៅបង្រ្កាបសកម្មភាពរត់ពន្ធគ្រឿងញៀន។
ជាច្រើនសប្តាហ៍មកនេះ ការវាយប្រហាររបស់យោធាអាមេរិកសរុបច្រើនជាង១៥លើក លើទូកដែលត្រូវបានចោទថា លួចដឹកជញ្ជូនគ្រឿងញៀន នៅ Caribbean និងនៅតំបន់ប៉ាស៉ីហ្វិក បានសម្លាប់មនុស្សយ៉ាងហោច៦៥នាក់ ជាហេតុនាំឱ្យមានការរិះគន់ពីសំណាក់រដ្ឋាភិបាល នៅក្នុងតំបន់៕

